Oseas 6 - DAWAN BÎLA AISKA

Israel kli Dawan ra balaia aisisa

¹ Man nani sut bal, bara Dawan ra yawan kli wap; witin mita yuya man wan daukan sakuna, wan sikniska nani wina sin kli wan rakbia; witin ai klalka mita wan wîna insauhkan, sakuna witin sin kli sîka wan daukbia.

² Ningkara, siknis âpu wan daukan kabia, yawan na kli wan bukbia, witin ai mawanra raya iwi kaia.

³ ¡Yawan karna wapi kap, Dawan kakaira takaia! Dawan yawan ra balbia, kasak pali titan yu baiwi uli baku, kasak pali lî auhi tasba buski ba baku mani lapta luan, lî auhaia piua ra baku aula.

Dawan pana aisi ba

⁴ Dawan aisisa: “Efraín, ¿man wal yang dîa daukamna? Juda, ¿man wal yang dîa daukamna? Man nani bui yang ra latwan ai kaikisma lâmka ba, titan mukuska baku sa, lalma kahbi kan diwaska laya baku, tisku kan pat lap tiwisa.

⁵ Baha mita prapit nani aisin ba baku, yang bui man nani ra yuya baman mai daukri; yang bîli smalkanka ba ni, man nani mai ikri. Kasakki lâka ba ingni baku ingwisa.

⁶ Yang bui man nani wina brin ai dauki ba sika, man nani latwan ai kaikma, sakripais nani dauki aikisma ba lika apia; Gâdkam baku ai kakaira taks, bara man nani daiwan aiska angki aikisma ba lika apia.

⁷ “Sakuna yang upliki nani, Adam wal baku sa, lâika witin nani wal daukri ba krikan, bara maipara saura pali daukan.

⁸ Galaad ba saura dadaukra nani tawanka takan, tawan aiska ra mina taibanka nani, tala alki lâwan ba baman sa.

⁹ Prîs nani ba âimplikra daknika kum takan, Siquem ra waia yabalka ra, upla nani bîla aihwakisa; upla nani ba iki, witin nani ai nina sauhkisa.

¹⁰ Israel watla bilara yang diara saura pali nani kaikri: Efraín urkira takan; Israel ba tâski pali takan.

¹¹ Bara Juda, man dukiamra sin, klala briaia piua ba, yang pat aisari sa. “Upliki Israel luhpia nani ba kli piua yamni yabaia lukuna ba ra,