Oseas 2 - DAWAN BÎLA AISKA

¹ Bara man nani bui muihkam nani ra wima: “Man nani, Dawan uplika nani”, bara lamkra mairin nani ra lika: “Dawan mita latwan kaikan nani”.

Israel luhpia nani Dawan lâka swin ba

² Dawan aisi wisa: “¡Man nani yaptikam lâka aisi dauks, dahra sâks, kan witin ba, yang mayi apia takan sa, yang sin witin ai maya waitna apia sna! ¡Ur mairin lâka ba swibia ai waitnika nani ba, ai lamkuka wina saki batakbia!

³ Witin baku daukras kabia kaka, susu dauki swimna: witin aisubi takan ba yua ra, dîa luha kata ba baku, upla iwras tasbaya baku daukamna, tasba lâwan baman kabia, bara lî diran bla yarka prubia.

⁴ Luhpia nani ra sin umpira kaikamna apia, urkira luhpia nani takan bamna.

⁵ Man yaptikam ba, rug lâka daukan; ai kulkanka ba tikan naha aisin ba ra: “Waitniki laitwankira nani ba pliki wamni, witin nani wina plun, lî aikisa, sîp taya kwalka, linin sin, batana laya, diranki nani sin aikisa.”

⁶ “Baha mita ai yabalka ba, kiaya nani ni prakamni bara kaina kir kutbamna, bara ai yabalka nani ba pliki sâkbia apia.

⁷ Ai waitnika latwankira nani nina blîkbia, sakuna sip bliki alkbia apia; plikbia, sakuna sip pliki sâkbia apia. Bara witin aisabia: ‘Mayi almuk ra kli tawi wamni, witin wal kapri, kau pain ai bri kan.’

⁸ “Sakuna witin aisaras kan yang wina plawar, wain, batana laya yabi kapri; yang sika silbar, gul ailal yabi kapri ba, witin baha brih, ai gâdka bahki nani lilka paski kan ba.

⁹ Baha mita kli tawi balamni, bara plawarki mâ bara wainki nani ba dâkaia piua ra kli brimni, sîpki taya kwalka, lininki kwalka sin ai taya prakaia yabri ba, kli wahbi brimni.

¹⁰ Ai waitnika latwankira nani kaiki kaka, prâka daiki taya man swimna. ¡Upla kumi sin witin ba, mihti wina dakbi sâkbia apia!

¹¹ Ai liliaka dauki ba takaskamna, lilia daukaia yua nani bri ba, kati raya ra, ris yua nani bri ba, bara lilia tara daukaia yua nani sut bri ba sin.

¹² Wainka nasla bara kwah damni dusa nani bri ba sut sauhki tikamna. Baha nani dukiara sika aisisata ba: ‘Naha ni sika laitwankira nani maina aibapan ba.’ Nasla ba yarka inma man pâwbia, bara daiwan wail nani man pibia.

¹³ Piua luan ra, witin nani kîa yamni angki, gâd bahki nani ra yabi kan ba mana klala yabaisna, mihtadingka nani, lilura nani ni ai prana dauki, ai waitnika latwankira nani nina bliki kan, yang ra ai âuya ai tiki si. Yang Dawan, baha kasak aisisna.

Dawan bui Israel ra latwan kaikisa

¹⁴ “Yang bui witin ra laik takaisna: twi langnika tasbaya ra bri si, ai kupia kat aisamna.

¹⁵ Ningkara ai wainka nasla nani ba kli yabamna, Acor ilka langnika ba witin mapara bîla kaiki kaia durka daukamna. Bahara, witin tiara kan piua ra baku ai aisabia, sim Idsip wina takata baku.

¹⁶ Baha yua ra ‘Yang Baalki’ ai wiaia watlika ra, man ‘Yang mayi ai wima.’ Yang Dawan, baha kasak aisisna.

¹⁷ Baal nina ba, un nani wina dikamni, witin nani kli Baal nani nina mâki aisabia apia.

¹⁸ “Baha yua ra, Israel dukiara yamni daukamni: daiwan wail nani ba wal lâ kum daukamni, tnawira, piuta nani aikuki; pantamangka, sord, war aiklabaia dukia nani ba, naha kuntrika wina sauhki âpu daukamni, yang upliki nani ba, ai âuyapah ris bri kabia dukiara.

¹⁹ Israel, yang mayi mai daukamna ban kaia ra, bara man mayi aihwa pali kakma, lâ tânka kat, kan latwan pali mai kaikisna bamna.

²⁰ Yang mayi mai brimna bara man wal kasak kamna, bara yang lika man dawankam sna ba, ai kaikma.

²¹ Yang Dawan, baha kasak aisisna: Baha yua ra, yang kasbrika purara ba ra aisamna, bara kasbrika pura ba mita tasba ra aisabia;

²² bara tasba bui plawar mâ, wain mâ ra bara batana laya ra aisabia; bara witin nani tawi Jezreel ra aisabia.

²³ Upliki nani ba, yang yakan upliki nani kaia tasba ra swimni. Lo-ruhama ra latwan kaikamni, Lo-amí ra wimni: ‘Man nani ba yang upliki nani sma’, bara witin ai wibia: ‘¡Man ba yang Gâdki sma!’ ”