Oseas 12 - DAWAN BÎLA AISKA

¹ Efraín ba, pâsa pih ai biara banhwisa: yu aiska, lalma payaska krawi ba ninara auya. Kunin aisi ba kau aisaia, lâ krikanka nani dauki ba kau daukaia lan takisa. Asiria wal lâ nani daukisa ba ra, batana laya prisantka nani, Idsip ra blikisa.”

² Dawan bui Israel ra blahwanka kum ra dingkan sa. Jekob kiamka ba klala yabaisa, witin nani ai lâka bri ba tâwan; witin dîa daukan ba kat mana aibapaisa.

³ Jekob, witin kau aisubi takras kan ba ra, ai muihni kan dakbi pat mina ra alkan, waitna almuk takan ba ra, Gâd wal aitwaki kan.

⁴ Insal kum wal aitwaki, pura luan; inan bara makaban witin ra umpira kaikbia. Gâd lika witin wal Betel ra prawan bara bahara witin wal aisin.

⁵ ¡Dawan, Gâd karnika sut bri ba: witin ai nina sika Dawan!

⁶ Baku bamna, Israel, Gâdkam ra kli tawi bal; kunin âpu wapni lâka ra diara dauks, bara piu sut Gâdkam ra baman kasak luki bas.

⁷ Dawan ba aisisa: “Kenan ai mihta ra implikaia paunka ba brisa, kan witin lika upla ra implikaia lihki bamna.

⁸ Efraín aisisa: ‘¡Âu, yang yuyakira takri, kan yang sans pain pali kum wal prawri; sakuna upla kumi sin sip daihra aisabia apia naha dukia nani brisna na saura dauki natka bâk saki briri!’

⁹ Yang, Dawan ba, man Gâdkam sna, Idsip ra katna ba wina, yang kli maikrika tint watla ra iwi kama, upla iwras tasbaya ra yawan aikuki prawan yua nani ra takata ba baku.

¹⁰ “Yang mita prapit nani ra aisari bara diara nani bal takaia lilka ba ailal marikri, witin nani aisinka bâk dahra praki aisaia bîla nani manis aisari.

¹¹ Galaad ra idan gâdka nani bâra sa, sakuna baha nani sut ba kuninkira baman. Guilgal ra bîp wainhka nani sakripaiska daukisa; walpa ailalka baku altar nani ba ai lainka ra paski brisa.”

¹² Jekob, Aram tasbaya nani ra plapi wih, bâra kan ai maya briaia dukiara, sîp main kaikaia warkka dauki kan.

¹³ Prapit kum paiwanka bâk, Israel luhpia nani ba Dawan mita Idsip wina sakan; ¡prapit kum wark dauki kan ba tâka bâk, Dawan bui witin ra main kaiki kan!

¹⁴ Efraín uplika nani mita kasak Dawan kupia sauhkan, munan kupia baiwanka ba tahpla takan. Baha mita Dawan bui witin nani ra munka, baha lâ krikanka nani daukan ba mana sut aibapbia. Dawan bui daukbia watawi nani sut daukan ba mana bara ai watawanka nani pali ba kli witin nani purara munka kauhbia.