Oseas 10 - DAWAN BÎLA AISKA

Israel altarka nani sauhki tikan ba

¹ Israel ba, wain kiwka ra mâ ailal pali alkan ba baku sa; witin nani ba kau ailal alki kan ba ra, altar nani sin kau ailal paski kan; tasbaya kau painkira taki kan ba ra ai gâdka bahki nani walpaya ba sin, kau pranakira paski kan.

² Israel ai lukanka wâl brisa, bara nanara saura daukan ba mana ba aibapaisa. Dawan bal ai altarka nani ba slingbi tikbia, bara ai gâdka bahki nani altarka walpaya nani paskan ba sin slingbi tikbia.

³ Bâra lika witin nani naku aisabia: “Yawan king âpu na, kan yawan bui Dawan ra kulkanka yaras ba mita. Sakuna, ¿king kum sin yawan wan dukiara dîa daukaia sip sa ki?

⁴ Aisin, bara aisi baman sa, kunin baman pramis takisa bara wal lâ dauki nani ba, ulbi baman swisa; ai kasakka lâka ba inma puisinkira lainka ra mangkan wapni pâwi ba baku sa.”

⁵ Sameria uplika nani tatatwisa; Bet-avén ra ai bîpka lupia bri ba tiwuya ba dukiara inisa. Upla nani ba, prîs nani ba bîpka lupia ba pura mata inisa, ai prana ba lap tiwan bamna.

⁶ Bîpka pali ba sin Asiria ra brih wabia king tara ba ra prisant yabaia. Baku Efraín ba ai swira pali takbia: Israel sin aidul bri ba swira daukan kabia.

⁷ Sameria kingka ba, dus yuyaka lupia lî purara awi si lap tiwi ba baku lap tiwbia.

⁸ Idan nani ai pura sunaia watla nani mâkan ba, sauhki tikbia, bahara Israel luhpia nani saura dauki kan ba. Altarka nani ba purara kiaya kiwka, kiaya dusa nani pâwbia, bara upla nani ba il tara nani ra wibia: “¡Yang nani puri biks!”, il purara pali nani ba ra wibia: “¡Man nani, yang nani purira bal kauhs!”

Dawan ba Israel luhpia nani mapara lâ daukuya

⁹ Dawan aisisa: “Israel Guibeá ra wih saura daukan ba wina baha saurka swira dauki ban sa. ¡Ai saurka ra ban iwisa! Baha mita war ba Guibeá ra baha watawikira nani ba ra alkbia.

¹⁰ Yang klala yabamna naha tawanka ra, ansa piua ra yang want sna ba ra. Witin mapara nisan nani asla takaisa, ansa piua ra, yang klala yabamna ai saurka tara mata.

¹¹ “Efraín ba bîp tiara kum, pat tim takan ba baku kan, plun mâ taya sakaia lihki kan. Nana dusa painkira bara mangkaika dusa ba mangkri wagin ba wina kauhbia dukiara, bara Juda tasba baikaika ba wina kauhbia, Jekob sin baha dusa raski pahbi ba wina kauhbia.

¹² Yang bui witin nani ra wîri: Kasakka lâka mâ ba, man nani mangks bara latwan kaikaia mâ nani ba kriks. Tasba baiki dauks, mâ raya nani mangkaia dukiara, kan nanara mahka Dawan plikaia piua sa, witin balbia kat bara swaki mai sakan laya ba, man nani puramra auhbia.

¹³ Sakuna man nani lika, watawika lâka mâ nani mangkram bara watawika lâka mâ nani dakbram bara man nani kunin aisaia mâ nani piram. “War waginka nani brisma bara karnikam brisma lukram ba mita war aiklaklabra ailal brisma ba ra sin,

¹⁴ bahamna uplikam nani tilara unsaban bâra kabia, bara kan kahbaika pliskam nani ba sut bîla baman dauki swin kabia, king Salmón Bet-arbel ra war aiklaban yua ra âpu dauki swin ba, mairin nani luhpia nani aikuki iki âpu daukan ba baku.

¹⁵ Baha nani ra takan ba baku, Betel uplika nani, man nani ra sin takbia, watawika lâka tara daukram ba tâwan. ¡Israel kingka ba yu nan baiwbia ra pat ikan kabia!