Nihimaya 9 - DAWAN BÎLA AISKA

Upla nani ai saurka dahra sakisa

¹ Baha sim katka ra lapta yua 24, Israel luhpia nani plun piras asla taki banhwan, ai kupia kriwan sari tukinka kwalka ba dimi, yamhpus ai purara yakaban;

² baha purkara sin Israel lupia nani ba, upla sât wala idan nani ba tila wina dakwi takan, witin nani saura daukan ba ai dahra walan, bara ai damika nani kasak apia kan ba sin.

³ Sut pali ai pliska kat bûi kan awar yumhpa, bara Dawan ai Gâdka lâka wauhkataya ba aisi kaiki banhwan, bara awar yumhpa wala ba lika ai saurka nani dahra saki Dawan ra mayuni banhwi kan.

⁴ Baha ningkara Libait nani Jasua, Binuy, Cadmiel, Sebanías, Binui, Serebías, Baní bara Quenaní kat, bûi aisaia pliska paskan ba ra uli, witin nani sut ai bîla tara aisi Dawan ra winan;

⁵ baha ningkara Libait nani Jasua, Cadmiel, Binuy, Hasabnías, Serebías, Hodías, Sebanías bara Petahías sin buan bara win: “Bûi banhs, bara Dawan Gâdkam ra yamni wis ban kaia ra ban kabia. ¡Yamni wis ai nina pranakira mayunra sut pali wal kau purkara ba!”

⁶ Bara Esdras aisin: “Man lika Dawan sma, bara kau wala âpu. Man kasbrika pura ba daukram, bara kasbrika nani kau purkara ba sin, slilma nani ba, tasba ba, baha bilara dîa dîa bâra ba sin man daukram, bara kabu nani ba, kabu bilara dîa dîa bri ba sin man daukram. Baha mita sika, slilma nani ba kasbrika pura wina mamyuni ba.

⁷ “Man sika, Dawan, Ebram ra bâk sakatma ba Gâdka; witin ba Ur tasbaya ba wina paiwram, Caldea uplika nani tawanka ba wina, bara ai nina sin Ebraham mâkram.

⁸ Kaikram witin ba waitna kum man ra kasak luki kan, bara man bui witin wal aisi lâ daukram: Kenan uplika nani, hitita nani, amorreo nani, ferezeo nani, Jebús uplika nani bara gergeseo nani tasbaya ba, witin ra bara ai kiamka nani ra sin yabaia wiram; bara man lâ aisi daukram ba bîlam kat daukram, ¡kan man kasakkira sma ba mita aisisma ba kat daukisma!

⁹ Baku sin wan damika nani Idsip ra pât bri kan ba kaikram, bara winanka Kabu Pauni lamara daukan ba sin walram.

¹⁰ Bara wark aihkakira pali sin daukram king fero mapara, ai warkka uplika nani mapara, ai tasbaya uplika nani aiska mapara sin, kan man kaiki kapram witin nani praut lâka ra uplikam nani ra taibi kan ba. Baku sika man mita pura lui ninam ba tara pali daukram, naiwa kat kulkanka ban brisma.

¹¹ Witin nani kaikan man kabu ba tar baikram ba, bara tasba lâwan bâk uplikam nani ba tapahki brih waram; sakuna witin nani nina bliki banhwi nani kan ba sut, kabu tihuka ra rungkram, walpa kumi lî tihuka ra lulkan dimwi ba baku.

¹² Baha ningkara kakna ra kasbrika playka kum ni witin nani ra tâ bri kapram, bara tihmia ra lika pauta playka ba ni, ai yabalka impaki kan ba ingni yabi kapram.

¹³ “Baha ningkara, Sainai ilka bahna ra bal iwram, bara witin nani wal aisaram laih kasbrika pura ba wina; bara witin nani ra lâ kasak kat daukaia lâka yaram, smalkanka kasak nani, lâ nani bara adar yamni nani ba sut.

¹⁴ Bara witin nani ra sin smalkram, man yuam ra ris briaia ba aihka saki sunu pali kulkaia, bara lâ smalkanka nani ba sin yaram albikam Moses mita smalkan ba.

¹⁵ Pura wina brit sin yabram, plun dauki kan ba dakakaia dukiara, bara diranka daskaia dukiara walpa wina lî yabram. Ba ningkara sin witin nani ra wiram yabaia tasbaya ra wih tasba ba bribia.

¹⁶ “Sakuna witin nani bara wan damika nani sut kiamapara kan tâka mita, adarkam ba wali dauki banhras kan.

¹⁷ Witin nani baha walaia ai brinka apia kan, purkara sin man bui diara aihkakira bara tara witin nani ai hilpka ra daukram ba ai kupia krawras kan, ai kiamapara lâka ra, ai tâ brabrira kum mangkan bara kli alba lâka ra Idsip ra brih wan. Ban sakuna, man sika Dawan, upla pâtka swih tatikra Gâdka, kupiam swapni, umpira kaikan lâka brisma, pat pali kupiam baiwras, bara latwan kaiki bara umpira kaikan lâka sin manis pali brisma, ba mita lulki swiras kapram.

¹⁸ Ba purkara witin nani sin lilka bahki, bîp kum lilka paskan bara win baha sika witin nani gâdka Idsip wina sakan ba, bara naha wal diara yamni apia nani daukan,

¹⁹ sakuna man, upla ra umpira kaikan lâka uya pali brisma ba mita, upla iwras tasbaya ra lulki swiras kapram. Kasbrika playka ba kakna ra, witin nani yabalka wina tnaya ra tawras kan, yabal bâk brih waia dukiara. Tihmia ra sin pauta klauhi ingni ba yabram, impaki kan yabalka bâk, witin nani auya ba ra.

²⁰ Bara man spiritkam yamni pali sin blikram witin nani ra smalki kaia, bara ai pata manâ ba sin bîla wina sakras kapram, baha purkara lî sin yabi kapram ai diranka ba daski kaia dukiara.

²¹ Mani 40 upla iwras tasbaya ra plun dakaki kapram, diara kumi sin luha witin nani apia kan; prâka nani sin sip almuk takras kan, bara ai mina nani sin puskras kata.

²² “King tasbaya lâka nani bara nisan nani sin yabram, tasbaya ba pîs pîs yui sut ra yabram, bara witin nani Hesbón tasbaya ba ai tasbaya brin, king Sihón tasbaya, bara Og Basán kingka tasbaya ba sin.

²³ Yaram ai luhpia nani sin ailal, kasbrika ra slilma nani ba baku sahwan, baku sin yaia wiram ba tasbaya ra brih waram, bahara ai tasbaya bribia, ai aisika nani ra yaia wiram tasbaya ba.

²⁴ Witin nani baha tasbaya ra dimi Kenan uplika nani ba pura luan; tasbaya uplika nani ba, yaram witin nani ai mawan kat bawi banhwan, kingka nani kan ba sin, bara tasbaya wala uplika nani ba sin sut, witin nani wal dîa daukaia lukan ba swiram witin nani daukan.

²⁵ Bara tawan karna nani paskan kan ba wina, tasba disang nani kan ba wina, utla bilara diara kau pain nani kukan ba wina, liwanhta nani pat bâra kan ba, wain nasla nani bâra kan ba wina, oliv dusa nani, bara dus wala ailal mâ bri ba wina, witin nani pin ai âuyapah takan ba kat, batanwi banhwan bara yamnika tara pali liliaka brin.

²⁶ “Sakuna witin nani man bîlam wali daukras kan, mampara buan, bara man lâmka ba bahki kulkan. Baha purkara, prapitkam nani ba witin nani mita ikan, kan baha nani witin nani ai mapara param aisi kan, bara win ai kupia lakbia, baha tâwan minam prukanka tara dauki kan.

²⁷ Baha mita man bui witin nani ra sin ai waihla nani mihta ra mangkram, waihla nani mita taibi kan. Witin nani ai pâtka saura wahwan bara man ra winan, bara man, laih kasbrika ba wina, witin nani ra umpira kaiki walram; bara tâ uplika nani yaram tataibra nani ba karnika wina pri sakaia.

²⁸ “Ban sakuna, witin nani piu prahni trabil âpu iwi banhwi kan ba ra, pat kli man lamamra kaikisma ba ra saura dauki kan; ba tâwan man mita kli lulki swiram waihla nani ba mita taibi kaia, sakuna witin nani kli man ra wini banhwi kan ba ra, man laih kasbrika ba wina wali kapram, bara man kupiam swapnika lâka uya brisma ba mita, aima ailal pât nani wina dakbi sakram.

²⁹ Bara man bui witin nani ra kupia kraukram, lâmka bîla wali kli man ra tawbia wiram, ani uplika lâmka ba alki daukbia kaka, witin nani raya kabia, ban sakuna witin nani ai kupia karna pali kan, bara man adarkam nani ba wali daukras pali takan, ban sin man lâ wapni yaram ba mapara saura daukan.

³⁰ Witin nani wal man kasak pali kupiam alki takaskram mani nani ailal; bara man spiritkam ni prapitkam nani bâk, witin nani ra aisaram; sakuna witin nani man ra walras kan; baha mita man bui witin nani ba baha tasbaika uplika nani mihta ra mangkram.

³¹ Ban sakuna, man kupiam swapnika lâka uya pali brisma ba mita sut âpu daukras kapram, lulki sin swiras kapram; kan man sika Gâd, kupiam swapni bara umpira kaikan lâka brisma ba tâwan.

³² “Baku bamna wan Gâdka, Gâd tara sma ba, karnakira, sibrinkira sin, wal aisi lâ daukram ba alki brisma latwankam lâka tara ba wal, man mamwanra ban lulki swipara pât saura nani ailal pali wahwan ba wan kingka nani, wihtki nani, prîski nani, damiki nani bara man uplikam sut, Asiria kingka nani yua nani ba wina naiwa yua kat.

³³ Âu, man lika kasak tânka ba kat daukram klin sma, pât nani sut pali yang nani purira balan ba tilara, man lâ wapni pali ba daukram, ban sakuna yang nani lika diara saura baman daukri.

³⁴ Yang nani kingki nani, wihtki nani, prîski nani, aisiki nani sin sut, man lâmka bîla ba kat alki daukras kan, walras baku kan man adarkam nani yabi ai kupia krauki kapram ba.

³⁵ Witin nani daukaia kan ba watlika ra, ai kingka tasbaya ra ai dukia kukanka nani, tasba tara disang witin nani ai mihta ra yabram ba brin, sakuna witin nani man mamyunra daukras kan, baku sin ai yabalka saura ba wina sip kli tawi balras kan.

³⁶ “Naiwa man bui yang nani ra ai kaiks, yang nani damiki nani ra yabatma ba tasbaya ra, baha wina plun saki duki kukanka nani bri kaia watlika ra, bahara alba banhwisna.

³⁷ Tasba wina plun mâ ailal pali saki ba, baha kingka nani man mita yang nani purira mangkram ba baman brisa, yang nani saura daukisna ba tâwan; baku sin yang nani bara daiwri nani ba dawanka aimakisa, bara ai kupia lâka dîa daukaia ba kat daukisa. Baha mita, yang nani uba kupi kriwan pali sna.”

Tawan uplika nani wal aisi daukan lâka ba

³⁸ Bamna baha sut takan ba tâka mita, yang nani ulbi kasak pramis takisna, bara wauhkataya ba ra yang nani wihtki nani, Libait nani, prîs nani ai nina ulbi sîl prakan.