Nihimaya 8 - DAWAN BÎLA AISKA

¹ Bara upla nani ba sut aidrubi asla takan baha katka pas yua ra, pulaia pliska kum ra, lî watla getka ba lamara. Bara smasmalkra Esdras ra win, Moses ulbanka lâka wauhkataya ba bri balbia, Dawan mita Israel luhpia nani ra yaban ba.

² Bara prîs Esdras ba, lâ wauhkataya ba bri balan upla nani aslika ba mawanra; bâra kan waitna, mairin bara tuktan sut.

³ Bara lâ wauhkataya ba aisi kaikan lî watla getka ba lamara, titan wina yu wan lal kat. Bara lâ aisi kaiki kan ba, upla sut aman pali wali kan.

⁴ Bara dus ni plis kum paskan kata, bahara uli lâ aisi kaikaia pliska. Bara smasmalkra Esdras ba, baha pliska ra bûi aisi kaikan. Witin ai aihkika ra Matatías, Sema, Anías, Urías, Hilquías bara Maaseías sin bâra bûi kan. Bara ai smihka tani ra lika Pedaías, Misael, Malquías, Hasum, Hasbadana, Sakaraya bara Mesulam kat bûi kan.

⁵ Bamna upla nani sut kaiki kan lâ wauhkataya ba bukutban, taya pura ba upla sut kaikan bîla ba kwâkan, bara upla nani sut ba buan.

⁶ Bara Esdras bui Dawan ra mayunan, Gâd karnika sut bri ba ra yamni pali win, bara upla nani sut ba ai mita nani buki win: “Baku kabia, baku kabia.” Baha ningkara, witin nani bawikira Dawan ra mayunan, ai mawan nani tasba ra makupi.

⁷ Bara Libait nani Jasua, Baní, Serebías, Jamín, Acub, Sabtai, Hodías, Maaseías, Quelitá, Azarías, Jozabad, Hanán bara Pelaías, baha nani ba lâ tânka ba laki upla nani ra smalki kan. Bara upla sut lika ai pliska kat ban bâra kan,

⁸ lâ ulbanka ba witin nani ai bîla baikra karna aisi kaiki kan, bara wala nani ba mita tânka ba laki kau param aisi kan.

⁹ Lâ aisi kaiki ba wali upla sut ini kan, Nihimaya wihta tara ba, prîs smasmalkra Esdras sin; bara Libait nani bui lâ tânka param saki aisi kan nani ba mita upla nani sut sari bri ini kan ba ra win baha yua ba holi kulkaia sa, Dawan ai Gâdka yua sa, bamna sari brih inbia apia.

¹⁰ Ba purkara Esdras naku win: “Man nani was, plun aihwa pis, wain damni sin dis, bara ani uplika plun ridi daukan âpu sa kaka, man nani plun piaia brisma ba wina yas, kan wan Dawanka ra yaia yua bâk sakan bamna. Man nani sari kapara, liliam bas, Dawan liliaka ba wan karnika bamna.”

¹¹ Bara Libait nani aisin, upla nani ba ai bîla prakbia, bara karna aisin witin nani sâp takbia, inbia apia, yua na Dawan yua bâk sakan bamna.

¹² Bara upla nani ba plun piaia bara diaia wi banhwan, ai walka nani ra sin plun yabaia bara ai lilia tara pali briaia, baha bîla nani smalkan ba, witin nani tânka kasak brin bamna.

Utla Papakni liliaka daukan ba

¹³ Baha yua ba luan ningkara taika bani wihtka nani ba, prîs nani bara Libait nani sin asla taki smasmalkra Esdras ra balan, aikuki lâ wauhkataya tânka ba pliki kaikaia.

¹⁴ Witin nani aisi kaikan, bara sakan Dawan mita Moses ra dîa daukaia win lâka ba bahara ulban kan, Israel luhpia nani ra wibia kati 7 aimaki ba piua ra baha liliaka dauki bara Israel luhpia nani ba utla papakni nani ra dimi kaia sa.

¹⁵ Bamna Jerusalem aiska ra tawan wala nani ra, tawan sirpi nani sut ra maisa pakan bara upla nani ra win, sut pali il untika nani ra wabia, batana dusa wahia nani, dus tangnika pihni sâtka nani, kûku wahia sâtka nani, baku sin dus sâtka nani sut ai wahia pranakira nani bri ba bri balbia dukiara adar yaban, utla papakni mâkaia, lâ ra ulban ba baku daukaia.

¹⁶ Bara upla nani ba taki wih, dus wahia nani bri balan, bara utla papakni nani ba sin mâkan, upla nani ai pliska kat, ai latka nani bani ra, tempel latka ra luaika nani ra, lî watla getka lamara, pulaia pliska ra bara Efraín watla latka durka lama kat.

¹⁷ Bara upla nani sut alba lâka ra kan wina kli balan nani ba, utla papakni ba mâki bâra dimi banhwi kata, kan Nun luhpia waitna Jasua yua ba wina baha yua kat, Israel luhpia nani ba kau naha utla papakni na mâkras kan, bamna lilia lâka tara pali witin nani bri banhwi kan.

¹⁸ Bamna witin nani yu 7 baha yua liliaka ba dauki kan; bara yua pas ba wina Esdras yu bani Gâd lâka ulban ba wina wiria aisi kaiki kan, bara yu 8 aimakan ba ra upla asla takan, baha liliaka tara ba daukaia dukiara lâ ra ulban ba kat daukaia.