Nihimaya 6 - DAWAN BÎLA AISKA

Nihimaya mapara buaia lâka daukan

¹ Baha yua ra wan waihla nani Sambalat, Tobías, Guesem Arabia uplika ba, bara wan waihla wala nani sin walan tawan kutbanka nani ba yang nani pat paski tnata danh taki sut lalaubi praki banhri ba (ban sakuna kau durka nani ba baman ai pliska ra mangkras kata),

² bara Sambalat wihki Guesem wal ai bîla blikan, wamna wisi, bara Onó twiya tawanka sirpi kum ra asla takaia dukiara. Sakuna witin nani ai lukanka ba lika saura ai munaia luki kan.

³ Bara yang pana upla wala wal bîli bliki wîri, yang wark tara kumi daukisna, bamna sip apia kamna waia, kan yang wamna kaka warkka na takaskbia.

⁴ Bara witin nani bui yang ra aima walhwal ai paiwan sim sturka wal, bara yang sin pana dîa aisari ba kat wîri.

⁵ Bamna Sambalat aima matsip ra lika ai albika pali blikan wauhtaya kumi ai mihta ra param bri balan,

⁶ witin ulbi ai win: “Upla nani ai tilara aisisa, bara Guesem sin aisisa, man Ju nani aikuki wan kingka mapara buaia warkka kum daukisma, bara baha mita baha kutbanka ba man nani paskisma. Upla nani aisi ba sika, man bui witin nani ai kingka aimakaia daukisma,

⁷ baku sin ya prapit kaia ba sin pat mangkram bara man sturkam Jerusalem ra aisisa, wisa Juda ra pat king nâra sa. Baha aisanka nani ba king kiama ra waia apia sa, bamna bal bara yawan aikuki asla taki aisi kaikpi.”

⁸ Bara yang pana witin ra bîli bliki wîri, baha sturka aisan ba baku apia sa, sakuna baha lika ai kupia ra luki baku aisisa.”

⁹ Witin nani sut pali mita nahki sirang wan ikaia pliki kan, witin nani luki kan wan lukanka swapni takbia bara warkka dauki ba takaskaia; sakuna warkka ba yang kau karna daukri.

¹⁰ Bamna yang Semaías watla ra wari, Delaías luhpia waitna Mehetabel mulika ba, witin ai watla praki bâra kan, bara witin mita naku ai win: “Kaisa Gâd tempelka ra waia, baha bilara yawan asla takaia, bara yawan dur ba prakaia, kan witin nani naha tihmia mai ikaia balaia lukisa bamna.”

¹¹ Sakuna yang pana wîri: “Yang baku waitna nani ba lika, plapras bara tempel ra sin dimras pruaia apia dukiara. Yang lika tempel ra dimamna apia.”

¹² Baha purkara yang tânka briri, Gâd bui witin ra aisin bîla brih yang ra aisaras, sakuna Sambalat bara Tobías wal yang maipara aisin bîla ba witin ra taibi munan;

¹³ yang ra sirang ai ikaia mana baha nani witin ra pat aibapan, baku ai wibia, bara yang ba saura daukamna dukiara. Witin nani baku ai dauki ba natka ra, saura nini sauhkaia, bara kulkanka brisna ba wina sin ai batakaia.

¹⁴ ¡Yang Gâdki: kupiam ra bri bas, Tobías bara Sambalat wal diara daukan ba! ¡Noadías baha prapitka mairin daukan ba sin âmya tikpara, bara prapit wala nani ba sin yang ra sirang ai ikaia daukan ba!

¹⁵ Bamna tawan kutbanka paski danh takan ba Elul katka yua 25 aimakan ra, warkka ba yu 52 ra dauki tnata alkan.

¹⁶ Wan waihla nani ba baha walan ba ra, nisan wala nani wan lamara iwi kan nani ba sin tâ iwan yang nani dukira, prautka lâka ba sin mâyara iwan, kan ai dahra walan naha warkka na daukaia, yang nani Gâdki tâi baiki kan ba.

¹⁷ Baha yua nani ra Juda wihtka nani mita wauhtaya nani ailal pali Tobías ra bliki kan, bara Tobías sin pana witin nani ra wauhtaya nani bliki kata,

¹⁸ kan Juda ra upla ailal ba Tobías ra kulkanka yabi kan, witin ba Árah luhpia waitna Secanías dapnika kan ba mita, bara Johanán Berequías luhpia waitna ba Mesulam luhpia mairin ba ai maya brin bamna.

¹⁹ Baku sika upla nani bal yang maiwanra Tobías warkka yamnika ba dukiara baman aisi kan, bara uplika nani ba lika kli yang aisinki nani ba sut witin ra win. Bara baku sin Tobías wauhtaya ulbi ai bliki kan sibrin ai dingkaia dukiara.