Nihimaya 5 - DAWAN BÎLA AISKA

Witin nani ai tilara blahwanka bri kan ba

¹ Bamna tawan uplika, Ju nani ai tilara waitna bara mairin nani aikuki, ai muihni nani mapara karna aisin.

² Tila upla nani ba aisi kan, witin nani luhpa waitna nani bara luhpa mairin nani sin ailal brisa, baha mita witin nani plawar kau want sanglang pruaia apia dukiara;

³ bara tila upla wala nani sin aisi kan plun wahwan tâka ba mita witin nani ai tasbaya nani, nasla, watla nani sut bri ba lal ra lalah saki plun atki piaia brin;

⁴ bara tila wala nani sin aisi kan witin nani sin lalah lin taki bri banhwan ai tasbaya bara ai wainka nasla nani lal ra king ra lal mana aibapaia dukiara. Baha purkara sin witin nani aisin:

⁵ “Yang nani muihki aikuki tawanki kumi kiamka sna; yang nani luhpi nani witin nani ai luhpia nani wal sim sât sa. Ban sakuna kaiks, yang nani luhpi waitna nani bara luhpi mairin nani alba lâka ra pat mangki banhri sa. Pat baku daukan sa luhpi mairin nani tila pat alba lâka ra sa, sakuna yang nani sip takaskras, kan tasbayi nani bara wan nasla nani sin pat upla wala dukia takan sa bamna.”

⁶ Baha brukwanka bîla nani ba walri ba ra, yang kasak pali kupi baiwan.

⁷ Bamna yang aman luki kaikri bara wihta nani ba bara wark tâ brabrira nani ra sin lawi daukri, witin nani ai taya ai tawanka uplika nani purara nahki wirhika baku kahbisa. Bara baha purkara paiwanka tara kum paiwri upla sut witin nani ra balaia, baha lâka aisaia.

⁸ Bara witin nani ra naku wîri: “Yang nani nahki sip katna ba kat wan muihni Ju nani ba swaki sakaia daukri, upla sât wala nani ra atkan kan ba mihta wina; ¿bara nanara man nani mita kli muihkam nani ba alba kaia atkisma, bara yang nani bui witin nani ba atki pri sakaia sna ki?” Bara baku witin nani ai bîla praki sâp banhwi kan, diara kumi sin aisaia âpu kan.

⁹ Bara kau wîri: “Man nani daukisma ba yamni apia sa. Man nani wan Gâdka sibrinka ra tauki banhras sma, upla sât wala wan waihla nani ba mita wan swira paski kaia apia dukiara.

¹⁰ Yang taiya nani sin, yang wal wark taki nani ba bara yang sin, witin nani ra lalah bara plawar lin munri; baku bamna, ¡yawan kaisa witin nani traska ba ban swika tiwaia!

¹¹ Baku sin naiwa mamkabisna ai tasbaya nani ba, ai wainka nasla nani ba, ai batana dusa nani ba bara ai watla nani ba sin witin nani ra kli yama; baku sin ai traska nani ba sut swih tikma, lalah sapa, plawar sapa, wain sapa bara batana laya sapa, witin nani brin sa kaka.”

¹² Bara witin nani sut win: “Yang nani baha sut kli yabamna, diara kumi dukiara sin karna aisi banhwamna apia. Dîa man wisma ba kat dauki banhwamna.” Bara prîs nani ba paiwri balan, bara witin nani mawanra yabri dîa aisan ba kat daukaia win.

¹³ Baha aisin ningkara, yang prâika ba singbri, bara wîri: “Naku Gâd mita man nani wamtla ba wina singbi mai sâkbia bara warkkam ba wina sin singbi mai sakan kabia, ani waitnika naha lâka daukaia swer takan ba kulkras kabia kaka, naku singbi diara âpu mai daukbia.” Bara upla sut ba mita win: “Baku kabia.” Bara witin nani Dawan ra mayunan. Bara upla sut dîa aisin ba kat daukan,

Nihimaya kupia swapnika ba

¹⁴ baku sin king mita wihta ai mangki ai blikan ba yua wina Artajerjes pat 20 mani king aimaki kan ba piua ba wina 32 mani alkan ba kat, yang 12 mani muihki nani aikuki, wihta tara pata baku pi kaia hilpka aikan ba wina piras katna.

¹⁵ Sakuna wihta wala nani yang kainira aimaki kan ba tawan purara wirhika kum; kan yu bani witin nani silbar mâ 40 upla nani wina dakbi kan, baha ba plun piaia bara wain diaia mana saki kan. Baha purkara witin nani wal wark taki nani kan ba mita tawan ra taibi muni kan. Sakuna yang lika baku daukras, Gâd ra sibrin lukisna bamna.

¹⁶ Ba purkara sin, naha tawan kutbaia warkka na tilara yang sin mihti dingkri, sakuna yang nani tasba wisi atki bri banhras kapri, bara yang albiki nani sin sut pali asla warkka na tilara bâra kan.

¹⁷ Ju nani tawan wina bara gabamint wal wark taki nani ba sin, ban 150 kat yang tibilki ra plun pi kan, nisan wala nani wan lamara nani ba wina bal wan kaiki nani ba lika baha tilara kau kulkras.

¹⁸ Yu bani yang waitla ra bîp wainhka kum bara sîp nani kau pain ba matlalkahbi iki piaia pata dauki kan, daiwan tnawira nani sin; bara yu matawalsip bani wain ba ban pura lui kan. Sakuna baha sut ba tilara, yang aima kumi sin wihta tara baku baha wina piaia hilpka aiki kan ba makabras katna, kan upla nani purara wirhka taibi ba uba tara kan.

¹⁹ ¡Yang ra yamni luki bas, yang Gâdki, baku sin diara sut pali naha tawanka na hilpka daukri ba!