Nihimaya 1 - DAWAN BÎLA AISKA

Nihimaya ai uplika nani dukiara ai pura sunisa

¹ Naha sika Hacalías luhpia waitna, Nihimaya rayaka sturka nani ba. Artajerjes ba pat 20 mani Persia kingka aimaki kan piua ra, Quisleu katka ra, yang, Nihimaya, Susa kan kahbaika pliska bri ba ra kapri.

² Muihki nani tila wina kum nina Hananí, witin bara Juda waitnika wala nani kum kum aikuki balan. Bara yang bui witin nani ra makabi walri, Jerusalem ba nahki sa, bara Ju nani priski Babilon ra brih waras swakwan nani ba sin nahki sa.

³ Bara witin nani naku ai wi banhwan: “Baha nani priski brih waras, upla iwras pliska wina swak takan nani ba, ai tasbaya ra witin nani saura pali swira lâka tara tilara bâra banhwisa. Bara Jerusalem sin, walpaya kutbanka kata ba sin aiska pali batakan sa, bara getka nani ba sut sin pauta ni angkan luan sa.”

⁴ Baha sturka nani walri ba ra, yang mahka iwi inri, kupi sin kriwan bara baku yu ailal kasak sari briri, plun sin piras kasbrika purara Gâdka ra puri sunri.

⁵ Bara witin ra wîri: “Dawan, man laih pura Gâdka, Gâd tara sibrinkira sma, lâ daukisma ba dutki alki brisma, dîa aisi daukram ba kat kulkisma, baha nani man lâmka bîla kulki latwan mai kaiki nani sut ra.

⁶ Mamkabisni, tihmia ra bara kakna ra man ra puri sunisna na, man nampakan Israel luhpia nani tâwan, kiamam pri tniki yang ra wals. Kaikisni yang nani Israel luhpia nani, man mamwanra saura daukri ba, yang bara aisiki watla uplika nani sut sin saurka dauki banhwan sa.

⁷ Yang nani bui man mampara dîa daukri ba, saura pali sa; lâmka daukaia ulbanka nani ulbi Moses ra yaram, yang nani baku daukaia katna ba, baku daukras.

⁸ Nanara man kupiam krauks, baha bîla nani albikam Moses ra yabram kan ba, man wiram yang nani saurka daukamna kaka, tasba aiska ra yakabi ai swima;

⁹ sakuna yang nani kli man ra tawi balamna bara lâmka bîla nani ba brimna, bara baha warkka daukamna kaka, ban ai yakabi ai swiram sa, sakuna tasba aiska kir ba wina, yang nani na kli asla ai daukma, bara man ninam bâra kaia pliska bâk sakram ba, bahara kli wan brih wama.

¹⁰ “Yang nani na man albikam bara uplikam nani sna, man karnikam tara ni bara man mihtam karnika ni atki sakram ba.

¹¹ Dawan, yang bui man ra mamkabisna puri sunra na man wali kaiks, nampakan nani makabi ba sin, witin nani brin dauki ba sika naha baman sa: man ra yamni mai kulkaia. Bamna yang sin mamkabisna, diara sut yang ra yamni takaia ba aik, king ba sin tatuks bûi yang ra luki tniwaia.”