Nahum 2 - DAWAN BÎLA AISKA

¹ ¡Ninibi, âpu mai sauhki daukaia uplika ba man mampara dimi aula sa! ¡Kan kahbaika pliska ra mahka aihwaks! ¡Yabal bîla nani ba, aihwaki kaiki bas! ¡Sordkam ba maisam ra wilki bris! ¡Karnikam nani brisma ba asla dauki bris!

² Kan Dawan bui Jekob aimayunanka ba kli paski karna daukaisa. Israel aimayunanka ba sin blasi bri kata ba baku kan, ai waihla nani ba ai dukia nani bri kata ba implikras kan piua ra, baha ningkara sim wain kiwka ra mâ nani sut dakbi daukan kata ba baku swibia.

³ Ninibi sasauhkra nani aula ba, ai kan kahbaika ba mapla pauni brisa, ai war aiklaklabra daknika kwalka dimi ba mapla pauni sa. ¡Witin nani aiklabaia ridi pali sa! War waginka nani bri ba, wan nakra ra pauta klauhan biulwi ba baku sa. Araska nani ba ihbi baman ai mina pruki ai wîna tatatwisa, mahka plapaia dukiara.

⁴ Ninibi suldiar waginka nani ba, tawan yabalka nani ra, tnaya kumi wina tnaya wala kat plapi luisa, sin lamp angkan klauhi ba baku, imyula lipi ba baku.

⁵ King ba war aiklaklabra wihta tara nani ra winisa, bara witin nani ai mina pruki kauhisa, tawan kutban ba ra plapi auya, baha pâtka ridi dauki swin ba ra.

⁶ Awala un ra getka nani ba kriwi param takisa, bara lisamra tara mita king watla ba slingbi tikisa.

⁷ Kwin mairin ba alki priski, alba lâka ra brih auya, bara albika mairin nani witin wal brih auya, baha nani butkuka lawi baku ai mamna lulki, ai lama pruki inisa.

⁸ Lî watla tara baiwan wina lî karna plapi ba baku, Ninibi uplika nani ba taki plapi kan. “¡Takaski banhs! ¡Kli tawi bal!” upla bui wini kan, sakuna kumi sin tawi balras kata.

⁹ ¡Silbar ba impliks! ¡Gul ba impliks! ¡Ninibi yuyaka nani ba tnata âpu sa!

¹⁰ Ninibi ba sauhkan sa, diara âpu bîla baman sa, ami luan baku sa. Sibrin mita upla nani sut kupia ba untrira baku takan sa, lula nani ba sin tatatwisa, upla sut ba karnika âpu takisa, bara upla sut mawan tâlia sin âpu takisa.

¹¹ ¿Layan watla untika nani ba ra kau dîa takaskuya ki, layan luhpia nani takaski yukuwaika ba ra? Bahara sika layan nani ba, ai luhpia nani aikuki, ai yukuwaika watla karnakira bri kan ba; upla kumi bahara dimi, witin nani ra sirang ikaia âpu kata.

¹² Layan ba ai daiwra iki kan ba, layan mairin ra bara ai luhpia nani wal yui pi kan, bara ai watla ba daiwan ikan wîna ni banhki dauki kata.

Ninibi tawanka aiska sauhki tikanka ba

¹³ Dawan karnika sut bri ba kasak aisisa: “Kaiks, yang Dawan, man nani mampara buisna. War aiklabaia waginka nani brisma ba, yang mita angki kiasma man daukaisna; layankam luhpia nani sut ikamna; tasbayam ra implikan lâka nani bâra ba âpu daukamna, bara kau dahra twatwilkra bîla baikra ba wali kama apia.”