Matiu 9 - DAWAN BÎLA AISKA

Jisas bui wakia lâwan waitnika kum rakisa

¹ Bara Jisas baha ningkara duri kum ra aimaki, lakun baila wala ra lui, ai tawanka pali ra wan.

² Bara wakia lâwi waitnika kum krikri ra tniki witin ra brih balan. Jisas baha uplika nani kasak lukanka ba kaiki, siknis waitnika ra win: —Luhpi, karnikam bris; saurkam nani ba ban swih tikan sa.

³ Bara Lâ Smasmalkra nani kum kum naku lukan: “Naha waitnika Gâd mapara saura aisisa.”

⁴ Sakuna nahki Jisas pat kaikan baha nani lukanka ba, bara makabi walan: —¿Dîa kan man nani ban lukanka saura bri banhwisma ki?

⁵ ¿Bamna nahki aisaia ba kau isi sa: ‘Saurkam nani ba swih tikan sa’, apia kaka wiaia: ‘Bus, bara mahka waps’?

⁶ Bamna, yang bui man nani ra mamrikamna Upla Luhpia Waitna naha tasba ra upla saurka nani swih tikaia karnika brisa. Baku ba ra, wakia lâwan waitnika ra win: —Bus, krikrikam bris, bara wamtla ra mahka was.

⁷ Wakia lâwan waitnika ba mahka ai watla ra wan.

⁸ Upla nani naha kaikan ba ra, sirang iwi banhwan, bara Gâd ra mayunan upla nani ra baku karnika yaban ba dukiara.

Jisas bui Matiu ra paiwisa

⁹ Jisas baha wina mahka wan, bara waitna kum wal prawan, ai nina Matiu. Witin ba lal mana wawahbra kan Rom ra yaia bara bahara iwi kata. Jisas mita win: —Nini blîks. Bara Matiu mahka bûi, ai nina blikan.

¹⁰ Bara baku takan, Jisas ai disaipilka nani aikuki utla kum ra tibil ra plun pi kan, bara Rom ra yaia lal mana wawahbra nani ba, kulkanka saura bri uplika nani ba sin ailal bahara balan. Bara witin nani sin Jisas lamara asla bahara iwan.

¹¹ Sakuna parisi nani baha kaiki, disaipil nani ra makabi walan: —¿Nahki kan smasmalkrikam ba, lal mana wawahbra nani bara saura dadaukra nani aikuki sin plun pîsa?

¹² Jisas baha wali, witin nani ra win: —Upla nani ai wîna pain ba daktar want apia sa, siknis uplika nani lika.

¹³ Man nani was, bara Ulbanka ra naha tânka na lan taks: ‘Yang want sna man nani uplikam ra umpira kaikma, daiwan nani sakripais daukanka ba lika apia.’ Kan yang lika upla kasakkira nani ba paiwaia balras, sakuna saura dadaukra nani lika.

Plun piras kaia dukiara

¹⁴ Jan Tatahbra disaipilka nani ba Jisas lamara balan, bara makabi walan: —¿Nahki kan yang nani bara parisi nani kira plun piras banhwisna, sakuna man disaipilkam nani lika baku daukras?

¹⁵ Jisas bila: —¿Marit pata ra paiwan uplika nani ba sip sa ki sari briaia, marit takan waitnika ba kau witin nani aikuki ba ra? Sakuna piua kum balbia, bara marit takan waitnika ba witin nani wina dakbi sakan kabia; bâra mika witin nani plun pibia apia.

¹⁶ “Upla kumi sin kwala almuk kum ra kwala raya ra sip mangkras, kan raya ba mita kwala almuk ba aubi kalkisa, bara kalwanka ba kau tara takisa.

¹⁷ Baku sin, wain raya ba daiwan taya batilka almuk nani ra laikras sa; kan baku daukbia kaka, daiwan taya nani ba kalwisa, bamna wain bara daiwan taya nani ba sin sut tiwbia. Baha mita, wain raya ba daiwan taya batilka raya nani ra mangkaia sa; baku lika wâlsut pain bri kabia.

Jairus luhpia mairin bara Jisas kwalka kangban mairka ba

¹⁸ Jisas witin nani ra kau naha dukia nani aisi kan ba ra, Ju wihtka kum bal ai mawan kat ai lula kriki, win: —Luhpi mairin bisiura pali pruan; sakuna man bal, ai purara mihtam kahma kaka, kli raya takbia.

¹⁹ Jisas mahka bûi, ai disaipilka nani kira, witin wal wan.

²⁰ Bara kaiks, mairin sikniskira kum balan. Pat witin mani 12 tala plapan sikniska bri kan, bara Jisas ninak bal, ai prâka tâ kangban;

²¹ kan witin naku luki kan: “Ai prâka tâ pan kangbamna kaka, rawamna.”

²² Sakuna Jisas ai ninara tawi, mairka ra kaiki, naku win: —Luhpi mairin, man karnikam bris; kasak lukram bamna, man rawram sa. Bara baha pali piua ra witin rawan.

²³ Ju nani wihtka watla ra Jisas wan ba ra, kaikan miusik uplika nani ba pat bikaia ridi kan, bara upla nani sin bin dauki kan.

²⁴ Bara baha nani ra Jisas mita win: —Man nani naha wina taki was, kan tuktika mairin na pruras, sakuna yapisa. Bara sut ai lawaska kiki kan.

²⁵ Upla nani ba latara yan takan ba ra, Jisas dimi, tuktika mairin mihta ra alkan, bara witin tit buan.

²⁶ Naha sturka na baha tasbaya aiska ra aisan kata.

Jisas bui blain wâl ra rakisa

²⁷ Jisas baha wina takan ba ra, blain wâl ai nina bliki, ai bîla baikra naku winan: —¡Debit Luhpia, yang nani ra umpira ai kaiks!

²⁸ Jisas utla ra diman bara blain nani ba ai lamara balan, bara witin bui makabi walan: —¿Man nani kasak lukisma ki yang naha na daukaia sip sna? Witin nani bila: —Âu, Dawan.

²⁹ Bara Jisas mita blain nakra nani ra kangbi, naku win: —Man nani kasak lukisma ba kat takan kabia.

³⁰ Bara ai nakra kli diara kaikan. Jisas mita karna smalki, naku wisata: —Man nani naha na upla kumi ra sin wipara.

³¹ Sakuna witin nani takan wal baku, Jisas diara daukan ba baha tasbaya aiska ra aisi taukan.

Jisas bui sturi aisaras uplika kum rakisa

³² Blain nani taki auya kan ba ra, upla kum kum mita sturi aisaras kum brih balan; witin ba pirit saura sin bri kan.

³³ Jisas mita pirit saura ba latara kangbi sakan wal baku, bîlas ba mahka sturi aisin. Bamna upla nani ba tâ iwi, naku aisan: —¡Yawan Israel tasbaya ra nahmuna dukia kau kaikras!

³⁴ Sakuna parisi nani aisi kan: —Pirit saura nani wihtka mita baha nani kangbi sakaia karnika yabisa.

Jisas bui upla nani ra umpira kaikisa

³⁵ Jisas lika tawan tara nani bara tawan sirpi nani ra sin tauki kan, bara tawan bani priaska watla nani ra smalki kan. Witin lika Gâd king aimaki ba lâka sturka yamni ba smalki kan, bara siknis sât sât, wan wîna latwanka nani sin raki kan.

³⁶ Upla nani ra kaiki, umpira pali kaikan, kan witin nani sarikira bara hilpkas banhwi kan, sîp nani sepadkas baku.

³⁷ Bara disaipil nani ra win: —Kasak pali, insla dâkaia mâ ba manis sa, sakuna wark uplika nani ba wiria sa.

³⁸ Baha mita, insla dawanka ra makas, ai nasla dâkaia wark uplika nani blîkbia.