Matiu 8 - DAWAN BÎLA AISKA

Jisas bui lipar sikniska bri waitnika kum rakisa

¹ Jisas il pura wina bal iwan ba ra, upla ailal ai nina blikan.

² Bara lipar sikniska bri waitnika kum Jisas lamara bal, mawanra ai lula kriki, naku win: —Dawan, wilin sma kaka, ai rakaia sip sma.

³ Bamna Jisas ai mihta ni kangbi, win: —Yang wilin sna, bamna mai rakisna. Naha aisin wal baku, waitnika ba ai lipar sikniska wina rawan.

⁴ Bara Jisas mita witin ra win: —Kaiks, upla kumi ra sin wipara, sakuna wih prîs ra wînam mariks, bara Moses win ba baku prisantkam yas; baku mika upla nani kaikbia pat rawram ba.

Rom suldiar kiaptinka albika kum Jisas bui rakisa

⁵ Jisas Kapernaum tawanka ra diman ba ra, Rom suldiar kiaptinka kum ai lamara bal, makabanka kum daukan.

⁶ Naku win: —Dawan, albiki waitna kum waitla ra krikri ra prawisa, wakia lâwan sikniska brisa, bara latwan pali wahwisa.

⁷ Jisas bila: —Yang rakaia wamna.

⁸ Kiaptin ba bila: —Dawan, yang aitani apia sna man ba yang waitla ra wih dimaia; adar baman yas, bara albiki ba rawbia.

⁹ Kan yang pali sin wihtki nani purira sa, bara baku sin suldiar nani mihti ra brisna. Witin nani kum ra wabia wimna kaka, witin auya; wala ra balbia wimna kaka, witin aula; bamna albiki ra diara kum daukaia wisna kaka, witin daukisa.

¹⁰ Jisas naha walan ba ra, tâ iwan, bara ai nina bliki nani ra win: —Kasak pali man nani ra mai wisna, Israel luhpia nani tilara naha waitnika kasak lukanka uya bri na sât kau yang sakras.

¹¹ Man nani ra sin mai wisni: Upla ailal lalma wina bara muna wina sin balbia, bara Gâd king aimaki ba lâka ra plun piaia iwi banhbia, Ebraham, Aisak bara Jekob wal aikuki;

¹² sakuna Gâd king aimaki ba lâka ra kaia nani ba lata tihmuka ra lulkan kabia; bara bahara sika ini banhbia, ai napa nani sin arkbi kabia.

¹³ Bara Jisas mita kiaptin ba ra win: —Wamtla ra was, bara dîa lukram ba kat daukan kabia. Bamna alba ba baha sim piua ra rawan kan.

Jisas mita Pita maya yaptika rakisa

¹⁴ Jisas Pita watla ra wan, bara Pita maya yaptika ba kaikan krikri ra prawi kan, rih karna pali dauki kan.

¹⁵ Jisas bui mairin ba mihta ra kangban ba ra, rihka ba swin; bara witin mahka bûi, witin nani dukia daukan.

Jisas bui siknis uplika ailal rakisa

¹⁶ Tihmia iwan kan, Jisas ra pirit saura bri uplika nani ailal brih balan; bara ai bîla kumi ni baman pirit saura nani ba kangbi sakan, sikniskira nani sut sin rakan.

¹⁷ Naha ba baku takan, prapit Aiseya aisin ba baku aimakaia: “Witin wan swapnika nani brin, bara wan sikniska nani sin twilkan.”

Jisas nina blikaia luki kan nani ba

¹⁸ Upla ailal ai tnaya ra kir kutbi bri kan kaiki, Jisas adar yan lakun baila wala ra luaia.

¹⁹ Bara Lâ Smasmalkra kum Jisas lamara bal, naku win: —Smasmalkra, anira wama ba, ninam blikaia brinki sa.

²⁰ Jisas bila pana win: —Sikiski nani ba ai dimaika nani brisa, daiwan tnawira nani ba sin ai watla nani brisa; sakuna Upla Luhpia ba lika ai lal kahbaika sin âpu sa.

²¹ Wala kum, ai disaipilka kan ba, naku win: —Dawan, ai swis pas aisiki wih bikaia.

²² Bara Jisas bila: —Nini blîks; swis pruan nani ba ai pruanka nani ba bikbia.

Jisas bui pâsa bara rip nani ba lamni daukisa

²³ Bara Jisas duri ra aimakan, ai disaipilka nani sin ai yula kahban.

²⁴ Bamna pâsa tara kum krawan, rip nani ba sin ban duri bilara aimaki kan. Sakuna Jisas lika yapi kan.

²⁵ Bara ai disaipilka nani wih tatukbi muni, naku win: —¡Dawan, swaki wan sâks! ¡Yawan pât rungwisa!

²⁶ Jisas bila: —¿Dîa kan man nani si brisma ki? ¡Man nani kasak lukan lâka uya briras sma! Bamna witin buan, pâsa ra bara kabu ra sin lawi daukan; bamna baha nani sut lamni tara takan.

²⁷ Disaipil nani ba tâ iwi, naku aisi banhwan: —¿Naha na dîa sât waitnika ki, pâsa nani bara kabu sut ai bîla wali na?

Gadara ra dibil bri waitnika nani ba

²⁸ Jisas lakun baila wala ra wan Gadara tasbaya ra. Bahara waitna wâl raiti nani wina taki, ai lamara balan. Wâlsut pirit saura nani bri kan, bara uba kras banhwi kan bamna, upla kumi sin baha yabalkak impakras kan.

²⁹ Bara ai bîla baikra tara wini banhwan: —Jisas, Gâd Luhpia, ¿dîa kan yang nani tilira dimisma ki? ¿Kau piua aimakras kan, yang nani ra rau ai sauhkaia balram ki?

³⁰ Baha lamara kwirku ailal pi tauki kan;

³¹ bara pirit saura nani ba mita Jisas ra naku makaban: —Yang nani ra kangbi ai sâkma kaka, aikrika baha kwirku nani ra wih dimi banhwamna.

³² Jisas witin nani ra win: —Bamna was. Bara pirit saura nani ba waitnika nani wina taki, kwirku nani ra wih dimi banhwan. Baha ningkara, kwirku nani ba sut albangka kum bâk kauhi lakun ra dimi wan, bara sut kwapi pruan.

³³ Kwirku nani main kaiki nani ba sirang iwi plapan, bara tawan ra wih naha dukia na sut aisi banhwan, waitna nani pirit saura nani bri kata ra dîa takan ba sin.

³⁴ Bamna tawan uplika nani sut Jisas bâra kan ba ra balan; bara baha diara ba kaikan ningkara, witin ra win ai tasbaya ba wina mahka wabia.