Matiu 7 - DAWAN BÎLA AISKA

Man nani uplikam lâka aisi daukpara

¹ “Uplikam lâka aisi daukpara, baku mika Gâd mita man nani lâmka aisi daukbia apia.

² Man nani upla wala nani lâka aisi daukisma ba baku, witin lâmka aisi daukbia, bara uplikam ra dîa kulkaika ni kulkisma ba, baha sim kulkaika ba ni Gâd mita mai kulkan kabia.

³ Muihkam nakra ra tâski lupia ba kaikaia sip sma ba, ¿dîa kan man namkra ra dus playa kum bâra ba sip kaikras sma?

⁴ Bara man namkra pali ra dus playa kum brisma ba, ¿nahki man muihkam ra wiaia sip kama: ‘Aik namkra wina tâski lupia ba sakamna’?

⁵ ¡Man kuninkira! Man namkra ra yuya tara ba pas sâks, bara baku lika sip kama pain kaiki, muihkam nakra ra tâski yuya ba sakaia.

⁶ “Diara holi nani ba man nani yul nani ra yapara, kan witin nani kli tawi bal man nani ra mai sami pîs pîs ra mai daukbia. Baku sin kwirku nani mawanra walpaya manakira nani ba lulkpara, kan baha witin nani ai mina ni taibia.

Makabaia, plikaia bara dur ra kingbaia

⁷ “Man nani makas, bara Gâd mita maikbia; pliks, bara sâkma; dur ra kings, bara man nani ra kwâkan kabia.

⁸ Kan ya ya makabi ba brisa; ya pliki ba, sakisa; bara ya dur ra kingbi ba, witin ra kwâkan sa.

⁹ “¿Man nani tilamra upla kum sip sa ki ai luhpia kum mita brit makabia kaka, walpa kum yabaia?

¹⁰ ¿Apia kaka inska makabia kaka, piuta kum ni yabaia?

¹¹ Kan man nani ba saurakira sma sakuna luhpiam nani ra diara yamni nani yabaia ba kaikisma, ¡kau pali kasbrika purara ba diara yamni nani yabia, ya ya witin ra makabia ba ra!

¹² “Baku bamna, upla wala nani man nani ra dîa mai daukaia brin mai dauki ba baku, man nani sin dauks; kan baha daukaia sika lâ ra wan aisi ba prapit nani ulbanka ra sin.

Dur bîla sirpi ba

¹³ “Man nani dur bîla sirpi bâk dims. Hil pauta ra auya durka ba bîla tara sa bara yabalka ba sin tara pali sa, bamna upla ailal bahak impakisa;

¹⁴ sakuna raya kaia ra auya durka ba yabalka ba bîla sirpi bara karna pali sa bahara waia, bara upla tila nani baman baha sakisa.

Dus ba ai mâ nani bâk upla tânka kaikisa

¹⁵ “Aman kaiks, witinka nani Gâd prapitka wisi kuninkira nani ba. Witin nani sîp baku man nani ra aula, sakuna ai kupia bîla lika yul wail nani baku sa.

¹⁶ Ai daukanka nani ba mita man nani bui tânka ba kaikma; kan kiaya dusa wina upla wain mâ wahbras, rahra kiaya wina sin kwah mâ wahbras sa.

¹⁷ Baku bamna, dus yamni bani mâ yamni sakisa, bara dus saura bani mâ saura baman sakisa.

¹⁸ Dus yamni ba sip mâ saura sakras, dus saura ba sin sip mâ pain sakras.

¹⁹ Ani dus mâ pain sakras ba, klaki dakbi pauta ra angkisa.

²⁰ Baku bamna, man nani ai daukanka nani bâk witin nani tânka kaikma.

Upla sut kasbrika purara Kingka Lâka ra dimbia apia

²¹ “Baha nani yang ra ‘Dawan, Dawan’, ai wi nani ba baman lika kasbrika purara kingka tasbaya ra dimbia apia, sakuna ya ya Aisiki kasbrika purara ba kupia lâka dauki ba, baha nani lika.

²² Baha yua balbia ba ra, upla ailal ai wibia: ‘Dawan, Dawan, yang nani lika man ninam mâki sturi yamni aisi banhri, ninam mâki pirit saura nani kangbi sakri, bara ninam mâki sin sain tara ailal dauki banhri.’

²³ Sakuna yang mita pana witin nani ra wimna: ‘Yang bui man nani ra mai kaikras pali katna; ¡diara saura baman dadaukra nani, maiwan wina taki was!’

Playa bapanka wâl ba

²⁴ “Bamna ya ya yang bîli nani wali yang dîa wisna ba kat dauki kaka, upla sinskira kum ai watla walpa purara mâkan ba baku sa.

²⁵ Lî ba auhan, awala nani ra lisamra dingkan bara pâsa nani ba watla ra karna prukan, sakuna sip batakras kan, ai playa ba walpa purara bapan kan bamna.

²⁶ Sakuna ya yang bîli wali baman, dîa wisna ba kat daukras ba lika, upla sinskas kum ai watla auhya purara mâkan ba baku sa.

²⁷ Lî ba auhan, awala nani ra lisamra dingkan, pâsa nani sin watla ra prukan; ¡bara aiska pali kauhi aisawan!”

²⁸ Jisas aisi prakan ba ra, ai smalkanka dukiara upla nani tâ iwi kata;

²⁹ kan witin karnika tara ni smalki kan, Lâ Smasmalkra nani baku lika apia.