Matiu 3 - DAWAN BÎLA AISKA

Jan Tatahbra smalkisa upla iwras tasbaya ra

¹ Baha piua ra, Jan Tatahbra Judia ra upla iwras tasbaya ra balan bara upla ra smalki,

² ai smalkanka ra aisi kan: “¡Man nani kupiam laks, kan Gâd king aimaki lâka ba pat baila sa bamna!”

³ Naha sim Jan tânka sika prapit Aiseya naku ulban kan ba: “Upla iwras tasbaya ra upla kum bîla baikra wini ba naku walisa: ‘Dawan yabalka ba ridi dauki banhs; yabalka kum wapni dauks.’ ”

⁴ Jan prâka ba kiamil tâwa ni daukan kan, ai maisa wila ba lika daiwan taya ni paskan kan, ai pata ba lika tristrisia nani bara unta wina nasma laya.

⁵ Jerusalem tawanka uplika nani, Judia tasbaya wina bara Jordan awala lamara tawan nani ba sut wina ai smalkanka walaia aidrubi balan kan;

⁶ bara ai saurka nani dahra saki banhwi kan nani ba, Jan mita Jordan awala ra tahbi dauki kan.

⁷ Sakuna Jan kaikan parisi nani, sadiusi nani sin ailal tahbi daukbia wisi balan, bara witin bila: “¡Piuta kiamka nani! ¿Ya mita man nani ra maisam pakan pât tara wan lamara aula ba wina plapi swakwaia?

⁸ Man nani daukankam ni mariks nahki saurkam nani wina kasak pali kupiam lakram ba,

⁹ bamna pana pana aimayuni naku aisapara: ‘Yang nani na Ebraham kiamka’; kan yang bui man nani ra mai wisna: Gâd sip sa naha walpaya nani na wina Ebraham kiamka daukaia.

¹⁰ Asa ba dus nani klaki batakaia pat ridi sa, bara ani dusa mâ pain sakras ba, klaki pauta ra lulkka ambia.

¹¹ Kasak pali mai wisna: yang lika lî ni baman tahbi mai daukisna, saurkam nani wina kupiam laki Gâd ra balaia; sakuna yang ninira wala kum aula ba lika Spirit Holikira ni bara pauta ni sin tahbi mai daukbia. Witin ba yang purkira kau karnika brisa, ban tara bamna, witin ai sûska nani twilkaia sin yang aitani apia sna.

¹² Witin ai mihta ra singbaia dukia pat ridi brisa, bamna plawar mâ ba klin dauki, taya ba sait ra sâkbia. Plawar mâ ba ai pata watla ra auhbia, sakuna taya ba pauta kum ban kaia ra dasras ba ra angkan kabia.”

Jisas ra tahbi daukan ba

¹³ Bamna Jisas Galili tasbaya wina aula kan, bara Jordan awala ra Jan bâra kan ba kat wan, tahbi daukan kabia wisi.

¹⁴ Jan witin ra tahbi daukan daukras kan, bara Jisas ra win: —Yang lika brinki sa man mita tahbi ai daukaia, ¿bara man lika yang ra aulma ki?

¹⁵ Sakuna Jisas bila: —Nanara lika baku ban swis; kan dîa Gâd wi ba kat yawan daukaia sa. Baku lika Jan aitani lukan.

¹⁶ Jisas ra tahbi daukan ba ra, Jisas lî wina mahka takan. Tisku kan, kasbrika purara ba kwawan, bara Jisas kaikan Gâd Spiritka ba butku baku ai purara aula kan.

¹⁷ Bara kasbrika purara ba wina bîla baikra kum walan, naku aisata: “Naha sika Luhpi laitwankira; witin sika bâk saki briri ba.”