Matiu 28 - DAWAN BÎLA AISKA

Jisas pruan wina kli buan ba

¹ Ris yua luan ba ra, wik yua pas ba ingwi takan ba ra, Meri Magdalin bara Meri wala ba wal raiti ba kaikaia wan.

² Tisku baku kan, tasba nikbanka tara kum takan. Baha ba Dawan insalka kum kasbrika purara ba wina bal iwan, bara raitika ra wih, raiti pura prakan kan walpaya ba karbi saki, baha purara iwan.

³ Witin ba ingni kan sin imyula baku, bara ai kwalka ba pihni ais klaswan baku kan.

⁴ Suldiar nani witin ra kaikan piua ra, sirang iwi tatatwi pruan baku kauhi banhwan.

⁵ Bara insal ba mita mairka nani ra win: —Man nani si bripara. Yang kaikisna man nani ba Jisas dus prihni ra pruan ba plikisma.

⁶ Nâra âpu sa, witin aisin ba baku pruan wina buan sa. Bamna bal kaiks witin tnikan pliska ba.

⁷ Man nani aihni pali was, bara ai disaipilka nani ra maisa paks: ‘Jisas ba pruan wina buan sa. Witin naha pali piua Galili mata impakisa, bamna bahara witin ra kaikma.’ Naha sika man nani ra aisaia bri kapri na.

⁸ Bara mairka nani aihni pali raiti ba wina wan, sibrinkira bara lilia pali sin; bara plapan man wih ai disaipilka nani ra sturka ba maisa pakan.

⁹ Tisku baku kan, Jisas witin nani ra latan taki, lakula win. Bara witin nani ba Jisas lamara wih, ai mina nani ra kiaubi alki, ai lula kriki mayunan.

¹⁰ Jisas mita mairka nani ra win: —Man nani si bripara. Muihki nani ra wih maisa paks Galili ra wabia, bara bahara ai kaikbia.

Suldiar nani wih sturi aisin ba

¹¹ Mairin nani ba auya kan ba ra, suldiar kum kum aihwaki kan ba tila wina, tawan ra wih, prîs wihtka nani ra dîa dîa takan ba sut maisa pakan.

¹² Naha wihtka nani, wihta almuk nani aikuki ai lâka daukan; bara suldiarka nani ra lalah ailal yabi muni,

¹³ bara witin nani ra win: —Man nani naku aisas: “Yang nani tihmia yapi kapri, Jisas disaipilka nani bal ai wîna tara ba implikan.”

¹⁴ Bara wihta tara kiama ra naha dimbia kaka, yang nani aisi kupia alkamna, bamna man nani pât brima lika lukpara.

¹⁵ Bara suldiarka nani lalahka ba brin, bara dîa win ba kat wih daukan. Bara naiwa yua kat ban Ju nani baku tânka ba aisisa.

Jisas mita disaipil nani ra ai warkka yabisa

¹⁶ Baku bamna, disaipil 11 ba Galili ra wan, Jisas mita win ilka ba kat.

¹⁷ Witin nani bui Jisas ra kaikan ba ra, ai lula kriki mayunan, sakuna kum kum lika kau kasak lukras kan.

¹⁸ Bara Jisas witin nani lamara bal, naku win: —Karnika sut yang ra aikan sa, kasbrika purara bara tasba ra.

¹⁹ Bamna man nani nisan sut uplika nani ra was, bara yang disaipilki nani dauki banhs; tahbi dauki banhs, Aisa ba nina ra, Luhpia ba nina ra, bara Spirit Holikira ba nina ra sin.

²⁰ Bara smalki banhs dîa dîa man nani ra adar maikri ba bîla wali kaia. Bamna kaiki bas yang na man nani aikuki yu bani kamna, tasba tnata kat.