Matiu 27 - DAWAN BÎLA AISKA

Jisas Pailat mihta ra mangkan sa

¹ Titan baiwan ra, prîs wihta nani sut, Ju wihta almuk nani kira, ai lâka daukan Jisas ra ikaia.

² Bamna witin nani bui Jisas ba priski Pailat ra brih wan, witin Rom wihta tara ba.

Judas pruanka ba

³ Bara Judas, witinka mita waihla mihta ra mangkan kan ba, waihla nani Jisas pât ra dingkan kan kaiki, ai kupia ra sari lukan, bara silbar mâ 30 ba prîs wihta nani ra bara wihta almuk nani ra kli bri si yabi,

⁴ naku win: —Yang saura daukri, waitna pâtkas kum prura pâtka ra mangkri bamna. Sakuna witin nani bila: —¿Bara baha ba yang nani maipara dîa sa ki? ¡Ba lika man kaikma si!

⁵ Bara Judas lalahka ba tempel ra lulki si, mahka taki wih, ailangki pruan.

⁶ Prîs wihta nani lalahka ba wahbi, naku win: —Lâ apia sa naha lalahka prisant mangkaika watla ra mangkaia, tala mana sa bamna.

⁷ Bara aikuki lâ daukan baha lalahka ni tasba kum atkaia, nina ba Sumi Dadaukra tasbaya, bahara upla tringsar nani bikaia dukiara.

⁸ Baha mita, baha tasbaya naiwa yua kat, tala tasbaya mâkisa.

⁹ Bara baku, prapit Jirimaya aisin kan ba aimakan: “Silbar mâ 30 ba bri banhwan, baha ni Israel luhpia nani mita ai praiska mangkan kan ba,

¹⁰ bara baha ni sumi dadaukra tasbaya ba atkan, Dawan mita adar aikan ba baku.”

Jisas Pailat mawanra

¹¹ Jisas ba wihta tara mawanra brih wan kata, bara baha mita witin ra makabi walan: —¿Man ba Ju nani kingka sma ki? Jisas bila: —Baku sa, man aisaram ba kat.

¹² Bara prîs wihta nani bara wihta almuk nani mita ai dahra saki kan ba ra, Jisas pana diara kumi sin aisaras kan.

¹³ Baha mita Pailat ba makabi walan: —¿Diara mampara aisan ba walras sma ki?

¹⁴ Sakuna Jisas pana witin ra diara wiras; bara wihta tara ba tâ iwan, bamna dîa lukaia sapa sin kaikras kan.

Jisas prura pâtka ra lulkan sa

¹⁵ Lilia tara yua ra, wihta tara ba ai lâka kum bri kan, baha ba lika silak uplika kum upla nani ra pri saki yaia, ani witin nani want wibia ba.

¹⁶ Baha piua ra, silak uplika tara pali kum kan, nina ba Jisas Barabas;

¹⁷ bara witin nani asla prawan kan ba ra, Pailat baha nani ra makabi walan: —¿Man nani ya ba want sma pri saki maikamna: Jisas Barabas, apia kaka Jisas, witinka nina Kraist mâki ba?

¹⁸ Kan Pailat kaikan Jisas ra tuman brih banhwi kan ba mita sika ai mihta ra mangkan ba.

¹⁹ Pailat lâ daukaika pliska ra iwi kan ba ra, ai maya ai bîla bliki, naku win: “Baha waitnika kasakkira ba tilara dimpara, witin pâtka mita na tihmia yang yaprisauhkan saura pali kum kaikri bamna.”

²⁰ Sakuna prîs wihta nani bara wihta almuk nani kira, upla nani kupia ba alki, Barabas ba pri sâkbia wisi makabaia win, sakuna Jisas ba lika ikbia.

²¹ Pailat witin nani ra kli aisi, makabi walan: —¿Wâl na wina ani ba want sma pri saki maikamna? Bara witin nani bila: —¡Barabas ba!

²² Pailat witin nani ra makabi walan: —¿Bara Jisas, nina Kraist mâki ba wal, dîa daukamna ki? Sut bila: —¡Dus prihni ra sas!

²³ Bara Pailat bila: —¿Bamna, witin na dîa saurka daukan sa ki? Sakuna witin nani kli ai pura winan: —¡Dus prihni ra sas!

²⁴ Pailat witin sip diara daukras kan kaikan, bara bin lika kau tara taki kan ba ra, adar yan lî bri sal yabia, bara upla sut mawanra ai mihta nani sikbi, win: —Naha waitnika pruaia pâtka na man nani daukisma; yang baha tilara âpu.

²⁵ Bara upla sut mita pana win: —¡Yang nani, bara luhpi nani sin witin pruanka ba dukiara pâtkira taki banhwisna!

²⁶ Bara Pailat mita Barabas ba pri sakan; ningkara, Jisas ba yan wipan, bara baha nani mihta ra mangkan dus prihni ra sabaia.

²⁷ Ba wina Pailat suldiarka nani mita Jisas ba wihta tara watla latara brih wan, bara suldiar daknika aiska ba ai tnaya kir asla takan.

²⁸ Bamna ai kwalka ba daiki, kwala pauni kum dingkan,

²⁹ bara kiaya kraunka kum pitbi ai lal ra mangkan, ai mihta aihkika ra sin yauhrus dusa kum. Bara ai mawanra ai lula krikan, ai lawaska kiki, witin ra wi kan: —¡Raya kabia Ju nani Kingka ba!

³⁰ Yabalaya sin tuhbi kan, bara yauhrus dusa ba brih lal ra pruki kan.

³¹ Baku ai lawaska kiki si, kwalka pauni ba daiki, bara ai kwalka ba kli dingkan. Bara witin nani brih wan dus prihni ra sabaia.

Dus prihni ra saban ba

³² Witin nani taki auya kan ba ra, Cirene wina waitnika kum wal prawan, nina ba Saiman; bara witin ra taibi munan Jisas dusa prihni ba twilkaia.

³³ Baku witin nani tasba kum ra balan, nina Golgota, baha tânka ba lika: “Wan lalkamhka tasbaya”.

³⁴ Bahara witin nani mita Jisas ra wain sîka mâka tahpla wal yan diaia; sakuna Jisas ai bîla ra wiria dih muni, kau din daukras kan.

³⁵ Pat dus prihni ra saban ningkara, suldiar nani ba dais pulan Jisas kwalka ba yui dauki briaia dukiara.

³⁶ Ba ningkara, bahara iwan aihwakaia dukiara.

³⁷ Ai pâtka tânka ba dukiara, lal purara bîla nani ulbi mangkan. Ulbanka ba naku kata: “Naha sika Jisas, Ju nani Kingka ba.”

³⁸ Âimplikra wâl sin witin wal dus ra saban kan, kum ba ai aihkika ra, wala ba ai smihka ra.

³⁹ Bahak lui kan nani ba mita swira dauki, ai lal wauhi,

⁴⁰ naku aisan kan: —¡Man, tempel ba slingbi yu yumhpa ra kli paskisma ba, man wînam kat swaki taks! ¡Gâd Luhpia sma kaka, dus prihni ba wina bal iws!

⁴¹ Baku sin prîs wihta nani, Lâ Smasmalkra nani, parisi nani, wihta almuk nani kira ai lawaska kiki kan, bara pana pana naku aisi kan:

⁴² —Witin bui upla wala nani ra swaki sakan, sakuna ai wîna kat lika sip swaki sakras. ¡Witin ba Israel Kingka sa kaka, dus prihni ba wina bal iwbia, bara yawan sut witin ra kasak lukbia!

⁴³ Witin lika Gâd ra kasak lukan: ¡bamna Gâd mita witin ra swaki sâkbia nanara, witin baku want sa kaka! ¿Witin wan win apia, witin ba Gâd Luhpia sa?

⁴⁴ Âimplikra nani witin wal dus ra saban kan ba mita sin ai swira dauki kan.

Jisas pruanka ba

⁴⁵ Bara tasba aiska ba tihmu tara takan, yu wan lal kat wina tutni 3 aklak kat.

⁴⁶ Bara baha sim awarka lamara, Jisas ai tâ baiki winan: “Elí, Elí, ¿lemá sabactani?” (Baha tânka lika: “Yang Gâdki, yang Gâdki, ¿dîa kan lulki ai swiram ki?”)

⁴⁷ Tila nani bahara kan nani ba baha wali, naku aisan: —Waitnika na prapit Ilayas ra winisa.

⁴⁸ Sim piua ra, baha nani wina kum plapi wih wahmuk kum bri balan, bara wain saura wal buski, dus kum ra mangki, ai lamara brih wan dibia wisi.

⁴⁹ Sakuna wala nani ba bila: —Swis; kaikpi Ilayas ba bal swaki sâkbia sapa.

⁵⁰ Jisas kli ai bîla baikra tara wini si, pruan.

⁵¹ Baha sim piua ra, tempel kwalka paman kan ba lilak kalwan, pura wina munhta kat. Bara tasba ba nikban, walpa nani ba tar baiwan,

⁵² raiti nani ba kwawan, bara Gâd ra kasak luki uplika ailal pruan kan ba kli bukan kan.

⁵³ Jisas kli pruan wina buan ba ra, naha nani raiti wina taki, Jerusalem tawanka ra diman, bara upla ailal witin nani ba kaikan.

⁵⁴ Bara suldiar kiaptinka bara wala nani Jisas ra aihwaki kan ba kira, tasba nikban bara diara wala nani takan ba kaiki, sibrin tara daukan, bara naku win: —¡Kasak pali naha waitnika na Gâd Luhpia kan!

⁵⁵ Mairin ailal bahara kan, bara baha nani laih wina kaikan kan; naha nani na Galili wina Jisas nina blikan kan, bara witin ra hilp sin muni kan.

⁵⁶ Baha nani tilara kan Meri Magdalin, Meri, witinka Jems bara Josep yaptika ba, bara Sebedi luhpia nani yaptika ba sin.

Jisas tasba ra bikan sa

⁵⁷ Pat tihmia iwuya kan ba ra, waitna lalahkira kum balan, nina ba Josep; witinka ba Arimatea tawanka wina kan, bara witin sin Jisas disaipilka takan kan.

⁵⁸ Bara witin Pailat ra wih, Jisas wîna tara ba makaban. Bamna Pailat adar yan witin ra yabia.

⁵⁹ Josep Jisas wîna tara ba brih, kwalyapa klin kum ra blaki,

⁶⁰ witin raiti raya kum bri kan ba ra bri si tnikan; baha raitika ba lika walpa kan sukutban. Raitika dimaia ra walpa tara kum ni praki si, witin mahka wan.

⁶¹ Bara Meri Magdalin bara Meri wala ba kira baha raitika mawan ba kat iwi kan.

Jisas raitika mawanra aihwawakra nani mangkan ba

⁶² Yu wala, wiaia kaka, ris yua dukiara ridi daukaia ba ningkara, prîs wihta nani bara parisi nani kira Pailat ra wan,

⁶³ bara witin ra naku win: —Wihtki, yang nani kupi krawisna baha kuninkirka ba kau raya kan piua witin aisin, yu yumhpa ningkara pruan wina kli bubia.

⁶⁴ Baha mita adar yas raitika ba pain aihwaki bri kabia yu yumhpa ba kat, bara baku mika ai disaipilka nani ba sip bal witin wîna tara ba impliki, upla nani ra ban kra naku wibiara: “Witin pruan wina kli buan sa.” Baku takbia kaka lika, tâura kuninka aisin ba naha kuninka wal, naha lâs na kau saura kabia.

⁶⁵ Pailat witin nani ra win: —Bahara man nani suldiar nani brisma aihwakaia dukiara. Bamna man nani was, bara raiti ba kau pain sip kama ba kat dauks.

⁶⁶ Bara witin nani wan, bara raitika ba kasak pali dauki, walpa raiti durka praki swin bara sîl kum prakan, bara aihwakaia suldiarka nani ba swi si, witin nani mahka wan.