Matiu 26 - DAWAN BÎLA AISKA

Jisas alkaia lâ dauki banhwan ba

¹ Jisas naha diara nani na sut aisan ningkara, ai disaipilka nani ra win:

² Man nani kaikisma baku, yu wâl lubia ningkara, Insal luan Yua lilia kabia; bara Upla Luhpia Waitna, waihli nani mihta ra ai mangkbia dus prihni ra ai sabaia.

³ Bara prîs wihta nani, Lâ Smasmalkra nani, Ju wihtka almuk nani kira, prîs nani wihta tara Keyapas watla latara asla takan.

⁴ Bahara lâ daukan, Jisas ba kunin muni alki, ikaia.

⁵ Sakuna witin nani naku aisi kan: —Lilia yua tara ra lika apia, upla nani unsabiara sîa.

Mairin kum Jisas ra batana laya laikisa

⁶ Jisas Betania ra kan, Saiman liparkira ba watla ra;

⁷ bara mairin kum alabaster batilka kum ra batana laya kîa painkira mana pali kan ba banhki brih, Jisas lamara balan. Witin tibil ra iwi kan ba ra, mairka na mita batanka laya ba ni lal purara laikan.

⁸ Disaipil nani naha kaikan ba ra, ai kupia baiki, naku aisan: —¿Dîa muni naku bahki tikaia?

⁹ Naha na sip kan mana tara wauhi atki, upla umpira nani ra hilp munaia.

¹⁰ Jisas naha wali, witin nani ra win: —¿Dîa muni naha mairka ra munisma? Witin bui yang ra ai daukan na lika diara pain pali sa.

¹¹ Upla umpira nani ba man nani aikuki ban bri kama, sakuna yang lika tilamra ban ai bri kama apia.

¹² Naha mairka batana laya kîa painkira wîni tara purara laikan na lika, tasba ra ai bikaia dukiara ridi ai daukan sa.

¹³ Kasak pali man nani ra mai wisni, ani anira naha swaki sakan sturka yamni na smalkan kabia ba ra, tasba aiska ra, naha mairka daukan na sin aisin kabia, upla nani witin ra ban luki kaia ba dukiara.

Judas bui Jisas ra atkisa

¹⁴ Bara disaipil 12 ba tila wina kumi, nina Judas Iskariot, prîs wihta nani aikuki aisaia wan,

¹⁵ bara witin nani ra win: —¿Nahki aikma ki Jisas ba mihtam ra mangkamna kaka? Witin nani mita silbar mâ 30 aibapi banhwata.

¹⁶ Bara baha yua wina, Judas ba sans pain kum pliki kan Jisas ba witin nani mihta ra mangkaia.

Jisas tutni pata pin ba

¹⁷ Lilia tara yua pas pali ra, brit îs mangkras piaia yua ba, disaipil nani Jisas lamara balan bara makabi walan: —¿Insal luan Yua Liliaka tutnika pata ba anira want sma yang nani wih ridi daukamna?

¹⁸ Witin mita pana win: —Tawan ra was, waitna kum watla ra, bara naku wis: ‘Smasmalkra bila wisa: Awarki ba pat baila sa, bamna wamtla ra disaipilki nani aikuki Insal luan Yua Liliaka ba daukaisna.’

¹⁹ Disaipil nani Jisas win ba baku daukan, bara Insal luan Yua Liliaka tutnika pata ba ridi daukan.

²⁰ Tihmia iwan ba ra, Jisas ai disaipilka nani aikuki tibil ra iwi kata;

²¹ witin nani kau plun pi kan ba ra, Jisas witin nani ra win: —Kasak pali mai wisna, man nani tilam wina kum bui waihli mihta ra ai mangkbia.

²² Bara witin nani sari pali taki, kumi kumi ra witin ra makabi walan: —Dawan, ¿yang sna ki?

²³ Bara Jisas pana win: —Ya yang wal sim plitka ra pi ba, baha sika waihli mihta ra ai mangkbia ba.

²⁴ Upla Luhpia Waitna ba, Ulbanka nani ra dîa ulban ba yabalka bâk waia sa, ¡sakuna waihla mihta ra mangki ba uplika ba mapara lika saura pali kabia! Kau aitani kaia kan baha uplika ba aisubi takras kan kaka.

²⁵ Bara Judas, witinka ai waihla mihta ra mangki kan ba aisi, win: —Smasmalkra, ¿baha ba yang sna ki? Jisas bila: —Âu, man sika.

²⁶ Pi kan ba ra, Jisas ai mihta ra brit ba brih, tingki wih, kriki muni, ai disaipilka nani ra yabi, win: —Pi banhs, naha sika yang wîni tara ba.

²⁷ Baha ningkara, ai mihta ra kâp ba brih, tingki wih, witin nani ra laki yabi, win: —Man nani sut naha na wina di banhs,

²⁸ kan naha sika yang tâilia, naha mita sika lâ daukan ba karnika yabi ba, bara upla ailal saurka swih tikaia dukiara laiwan sa.

²⁹ Sakuna mai wisna, naha wainka laya wina kli dimna apia, man nani aikuki Aisiki king aimaki tasbaya ra wain raya dimna yua ba kat.

Jisas wisa Pita witin ra kaikras wibia ba

³⁰ Witin nani lawana nani aiwanan ningkara, Olivet ilka ra wan.

³¹ Bara Jisas witin nani ra win: —Man nani sut naha tihmia yang dukira aihka lukma; kan ulbanka ra wisa: ‘Sepad ba ikamna, bara sîpka nani ba aihka aihka yakaban kabia.’

³² Sakuna yang pruan wina kli buamna ba ra, man nani kainamra Galili ra wamna.

³³ Bara Pita Jisas ra win: —Upla man dukiamra aihka lukbia kra, sakuna yang lika apia.

³⁴ Bara Jisas witin ra win: —Kasak pali mai wisna, naha sim tihmika kau kalila aiwanras ba ra, man aima yumhpa ai kaikras wima.

³⁵ Pita bila: —Man wal pruaia kamna kra, sakuna mai kaikras lika aisamna apia. Bara disaipil nani sut sim baku aisin.

Jisas Getsemani ra ai pura sunisa

³⁶ Bara Jisas ai disaipilka nani aikuki plis kumi ra balan, nina Getsemani, bara witin nani ra win: —Nahara iwi banhs, yang naura puri sunaia auna bamna.

³⁷ Bara Pita bara Sebedi luhpia wâl ba kat brih wan, bara mahka sari tara daukan.

³⁸ Bara witin nani ra win: —Sulki ra sari pali ai daukisa, pruaia prais. Man nani nahara takasks, bara yang wal aihwaki bas.

³⁹ Bara Jisas kan mapara kau wiria wih, ai mawan ra tasba kat kauhi, Gâd ra ai pura suni, win: “Aisiki, sip kaka, yarka yang naha pâtka wahwamnara; sakuna yang want sna ba baku lika apia, man kupiam lâka kat lika.”

⁴⁰ Bara ai disaipilka nani bâra kan ba pliska ra tawi balan ba ra, yapi kan sakan. Bara Pita ra win: —¿Man nani lika yang wal awar kum pan sip aihwakras kapram ki?

⁴¹ Aihwaki puram suni bas, traika kaikan ra kauhmara sîa. Kasak pali, spiritkam ba wilin sa, sakuna wînam ba lika swapni sa.

⁴² Kli aima wala wan, bara naku ai pura sunan: “Aisiki, naha pâtka wahwaia sna na wina sip swaki ai sakras sma kaka, man kupiam lâka kat takbia.”

⁴³ Tisku kan kli tawi balan ba ra, disaipil nani ba kli yapi kan sakata, kan ai nakra nani ba ban prak prawi kan yapan pali dauki kan ba mita.

⁴⁴ Baha nani ba swi si, naha kira aima yumhpa ai pura sunaia wan, bara sim bîla nani aisin.

⁴⁵ Bara disaipil nani bâra kan ba kat bal, win: —¿Man nani kau ban yapi bara ris brisma ki? Upla Luhpia Waitna, upla saurakira nani mihta ra ai mangkaia awarka ba aimakan sa.

⁴⁶ Bus, kaisa mahka; waihli mihta ra ai mangki uplika ba pat wan lamara aula.

Jisas alki priski brih auya

⁴⁷ Kau Jisas aisi kan ba ra, Judas balan, witinka disaipil 12 ba wina kumi kan ba, bara witin wal upla ailal sord nani bara dus nani brih aula kan. Witin nani ba prîs tara nani bara Ju wihta almuk nani mita blikan kan.

⁴⁸ Judas, witinka bui waihla mihta ra mangki kan ba, baha nani ra sain kum yabi, win kan: “Ani uplika ra yang kiawalamna ba, baha sika; man nani alks.”

⁴⁹ Bara witin Jisas lamara bal, win: —¡Naksa, Smasmalkra! Bara witin ra kiawalan.

⁵⁰ Jisas pana witin ra win: —Upliki, dîa daukaia mata aulma ba dauks. Bara baha nani Jisas lamara bal, alki priskan.

⁵¹ Baha kat, Jisas uplika nani wina kum ai sordka saki, prîs tara albika kum ra kiama klaki taih dakban.

⁵² Bara Jisas witin ra win: —Sordkam ba kli watlika ra dingks. Kan ani uplika nani sordka ni aiklabi ba, sim sordka wal prubia.

⁵³ ¿Kaikras sma ki yang sip sna Aisiki ra makabaia, bara witin sip sa naha pali piua insal dakni 12 pura blikaia?

⁵⁴ Sakuna baku kaka, ¿Ulbanka ra baku takaia wi ba nahki aimakbia ki?

⁵⁵ Bara Jisas bui uplika nani ra win: —¿Yang na âimplikra kapri kan baku, man nani sord bara dus nani brih bal takram ki? Yu bani man nani tilamra tempel ra iwi smalki kapri, bara ai alki ai priskras katma.

⁵⁶ Sakuna naha na naku takisa, prapit nani Ulbanka ra win ba aimakaia dukiara. Bara disaipil nani sut Jisas ba yakan swi si, plapan.

Jisas lâ wihta nani mawanra

⁵⁷ Jisas ra alkan nani ba mita Keyapas ra brih wan; witinka ba sika kau prîs wihta tara kan. Bahara Lâ Smasmalkra nani bara wihta almuk nani sut asla takan kan.

⁵⁸ Sakuna Pita lika laih wina nina bliki, ban wihta tara watla lata kat wan, bara bahara dimi tempel main kakaira nani aikuki iwi kan, diara ba nahki takbia sapa kaikaia.

⁵⁹ Prîs tara nani bara lâ wihta nani ba witnis pliki kan, kunin kabia sin ban, Jisas ba prura pâtka ra dingkaia dukiara.

⁶⁰ Sakuna sip sakras kan, upla ailal bal witin mapara kunin aisin sakuna; bara lâs kat witnis kuninkira wâl bal,

⁶¹ naku win: —Naha waitnika naku aisin: ‘Yang sip sna Gâd tempelka ba sauhki tikaia, bara yu yumhpa ra kli bapaia.’

⁶² Bara prîs nani wihtka ba tit bûi, Jisas ra win: —¿Pana diara kumi sin aisaras sma ki? ¿Diara mampara aisi banhwi na dîa atia ki?

⁶³ Sakuna Jisas sâp kan. Bara prîs nani wihtka ba mita win: —Gâd rayakira ba nina ra, swer taki mamkabi walisna man ba kasak ba kat aisama. Wan wis man ba Misaya, Gâd Luhpia sma sapa.

⁶⁴ Jisas pana witin ra win: —Man baku aisaram. Bara yang sin man nani ra mai wisna, Upla Luhpia Waitna ba Gâd, Karnika sut bri ba mihta aihkika ra iwi kasbrika purara wina aula kaikma.

⁶⁵ Bara prîs nani wihtka ba ai kwalka nani bisbi kalki, win: —¡Naha waitnika Gâd mapara saura aisin! ¿Dîa dukiara yawan witnis nani kau aisaia kabia ki? Man nani pali ai bîla saura nani ba walram;

⁶⁶ ¿bamna man nani nahki lukisma ki? Witin nani pana win: —¡Witin ba pâtkira sa, bara witin pruaia sa!

⁶⁷ Ai mawan ra yabalaya tuhbi, prukan. Wala nani mita mawan ra pruki,

⁶⁸ naku win: —¡Man Misaya sma ba, luki sâks ya mita mai prukan sapa!

Pita Jisas ra kaikras wisa

⁶⁹ Bara ban kan, Pita kata utla latara iwi kan, bara alba mairin kum ai lamara bal, naku win: —Man sin Jisas Galili wina ba wal tauki kapram.

⁷⁰ Pita bui apia pali win upla sut mawanra, naku aisi: —Dîa aisisma sapa yang tânka sin briras.

⁷¹ Pita pat dur lamara auya kan ba ra, alba mairin wala kum mita kaiki, bahara kan ba ra win: —Naha waitnika sin Jisas Nasaret wina ba wal tauki kan.

⁷² Bara Pita kli swer taki pali apia win, naku aisi: —¡Baha waitnika yang kakaira apia!

⁷³ Kau naika mapa ra, bahara kan nani ba Pita lamara aidrubi bal, win: —Kasak pali, man sin baha nani tila wina kum sma, bîlam aisisma ba ra latan sa bamna.

⁷⁴ Baha wina mahka witin swer taki, win: —¡Yang baha waitnika ba kaikras! Bamna baha sim pali piua kalila kum aiwanan.

⁷⁵ Bâra mika Jisas win ba ai kupia tanh krawan: ‘Kau kalila aiwanras kaka, aima yumhpa yang ra ai kaikras wima.’ Bara Pita baha wina taki, sari pali inan.