Matiu 25 - DAWAN BÎLA AISKA

Tiara matawalsip maprika lilka ba

¹ “Baha yua ra, Gâd king aimaki lâka ba lika tiara matawalsip na wal baku kabia, witinka nani ai lampka laya nani brih wan, waitna marit takuya ba yula kahbaia dukiara.

² Tila ba wina, matsip ba sinskas kan, bara matsip wala ba lika sinskira nani kata.

³ Sinskas nani ba ai lampka nani brih wan, sakuna lampka laya ba kli lamp ra laikaia kan ba brih waras kan;

⁴ sakuna sinskira nani ba lika ai lampka nani bara ai batilka nani lampka laya kira brih wan.

⁵ Marit taki waitnika ba pat balras kan bamna, sut yapan daukan, bara sut mahka yapan.

⁶ Tihmia wâl bakriki baku kan, bîla baikra kum naku walata: ‘¡Waitnika marit taki ba pat aula; taki bal, wal prawaia!’

⁷ Baha tiara nani ba sut mahka bûi, ai lampka nani ridi daukan.

⁸ Sinskas nani matsip ba mita sinskira nani matsip ba ra win: ‘Lampkam laya ba wina wirâ aikram, lampki nani na daswuya sa bamna.’

⁹ Sakuna tiara sinskira nani ba mita pana win: ‘Apia, baku lika yang nani briaia bara man nani briaia sin lamp laya ra aitani kabia apia. Kau yamni sa atki pliska ra wama kaka, bara man nani dukiam atki brima.’

¹⁰ Sakuna tiara sinskas matsip ba lamp laya atkaia auya kan ba ra, waitnika ba balan. Tiara nani ridi kan ba witin wal marit pata ra wih diman, bara dur ba prakan.

¹¹ Ba ningkara, tiara wala nani ba sin balan, bara naku winan: ‘¡Dawan, dawan, yang nani durki sâks!’

¹² Sakuna witin mita pana win: ‘¡Kasak pali, yang bui man nani ba mai kaikras!’

¹³ Bara kau pura praki Jisas witin nani ra win: —Man nani aihwaki bas, yang balaia yua, bara awarka ba sin kaikras sma bamna.

Lalah maprika lilka ba

¹⁴ “Gâd king aimaki lâka sin waitna kum baku sa, witinka ba kuntri wala ra mahka impakaia kan, bara ai albika nani paiwi, ai dukia nani ba witin nani mihta ra mangkan.

¹⁵ Kumi ra lalah mâ 5,000 yaban, wala ra 2,000 bara wala ra 1,000 prais; kumi bani ra ai sinska prais ba kat yan, bara witin lika mahka impakan.

¹⁶ Alba lalah 5,000 brin ba, baha lalahka ba wal bisnis dauki kau lalah 5,000 sakan.

¹⁷ Baku sin, 2,000 brin ba, kau 2,000 pura sakan.

¹⁸ Sakuna 1,000 brin ba, wih tasba ra salhki, ai dawanka lalahka ba yukukan.

¹⁹ “Piua wihka luan ba ra, baha albika nani dawanka kata ba balan, bara witin nani wal mahka kulkan.

²⁰ Lalah 5,000 brin ba pas balan, bara 5,000 wala win takan ba ai dawanka ra yabi, win: ‘Dawan, man mita 5,000 aikram. Kaiks, nâra sa 5,000 wala sakri ba.’

²¹ Dawanka ba bila: ‘Pain; man ba alba pain bara yamni sma. Man ba diara wiria wal kasak kapram bamna, diara ailal mihtam ra mangkamna. Bal dimi, yang wal lilia bris.’

²² Baha wina, alba lalah 2,000 brin ba balan, bara naku win: ‘Dawan, man mita 2,000 aikram. Kaiks, nâra kau 2,000 pura sakri na.’

²³ Ai dawanka ba mita win: ‘Upla pain; man ba alba pain bara yamni sma. Diara wiria lupia wal kasak kapram bamna, yang mita kau diara ailal mihtam ra mangkamna. Bal dimi, yang wal lilia bris.’

²⁴ “Sakuna alba 1,000 brin ba balan bara ai dawanka ra naku win: ‘Dawan, yang kaikri man ba waitna kupiam karna, bara mangkras sma ba wina man dâkisma, diara yakabras sma ba wina sin wahbisma.

²⁵ Baha mita, yang sibri kapri, bamna wih lalahkam ba tasba ra yukukri. Sakuna dukiam nâra na bris.’

²⁶ Dawanka ba bila: ‘Alba saura sringwaskira, man pain kaiki kapram yang mangkras sna ba wina dâkisna, bara diara yakabras sna ba wina wahbisna.

²⁷ Baha mita, lalahki ba bank ra sunaia kapram, yang kli tawi balri ba ra duki ba pura praki briaia kapri.’

²⁸ Bamna baha ra kan nani ba ra win: ‘Lalah mâ 1,000 ba witin mihta dakbi, 10,000 bri ba ra yas.

²⁹ Kan ya bri ba ra, kau yaban kabia, bara witin pura lui bri kabia; sakuna ya âpu ba wina lika, wiria lupia bri ba sut mihta dakban kabia.

³⁰ Bara naha alba bahki saura na, lata tihmuka ra lulki swis; bahara sika witin inbia, ai napa nani sin arkbia.’,

Nisan nani lâka daukan kabia ba

³¹ “Witinka Upla Luhpia Waitna ba Gâd insalka sut kira king baku balbia ba ra, ai king iwaika ingnikira ra iwbia.

³² Tasba aiska uplika nani ba ai mawanra asla takbia, bara witin mita baha nani ba aihka aihka dakbi sâkbia, sepad mita sîp nani ba guts nani wina dakbi saki ba baku.

³³ Sîp nani ba ai aihkika tani ra lakbia, guts nani ba lika ai smihka tani ra.

³⁴ Bara King ba ai aihkika ra nani ba ra wibia: ‘Bal, man nani, Aisiki mita yamni mai munan nani sma ba; king tasbaya na man nani dukiam wisi Gâd tasba paskan wina ridi dauki ban bri ba, bri banhs.

³⁵ Kan plun ai dauki kan, man nani plun aikram; din ai dauki kan, man nani lî aikram; tringsar baku tauki kapri, man nani wamtla ra dingki ai briram.

³⁶ Kwala âpu kapri, man nani mita aikram; siknis kapri, man nani wih ai kaikram; silak ra kapri, man nani ai kaikaia watma.’

³⁷ Bara upla kasak wapni nani ba makabi walbia: ‘Dawan, ¿ahkia plun mai dauki kan yang nani mai kaikri, bara plun piaia maikri? ¿Apia kaka ahkia diran mai dauki kan mai kaiki yang nani lî diaia maikri?

³⁸ ¿Ahkia yang nani mai kaikri upla tringsar baku tauki kapram ba ra, yang nani waitla ra mai briri, apia kaka kwala âpu kapram yang nani mita maikri?

³⁹ ¿Ahkia siknis kapram, silak ra kapram, bara yang nani wih mai kaikri?’

⁴⁰ Bara King ba wibia: ‘Kasak pali man nani ra mai wisni, dîa dîa naha muihki bawikira nani ra diara kumi dukiara daukram ba, yang pali ra sika man nani ai daukram ba.’

⁴¹ “Bamna king ba mita ai smihka ra nani ba ra wibia: ‘Yang wina taki was, mai lahtuban nani sma ba; ban kaia ra pauta lakni dibil ai insalka nani wal dukia wisi ridi daukan ba ra man nani was.

⁴² Kan plun ai dauki kan, man nani plun ai dakakras, din ai dauki kan, lî aikras;

⁴³ tringsar baku tauki kapri, man nani wamtla ra ai briras kapram. Kwala âpu kapri, man nani aikras; siknis kapri, silak ra sin, bara man nani wih ai kaikras.’

⁴⁴ Bara witin nani pana wibia: ‘Dawan, ¿ahkia yang nani plun mai dauki kan mai kaiki, apia kaka diran mai dauki kan, apia kaka tringsar baku, apia kaka kwala âpu, apia kaka siknis, apia kaka silak ra, bara hilp mai munras kapri?’

⁴⁵ Bara King ba mita pana wibia: ‘Kasak pali man nani ra mai wisna, dîa dîa naha uplika nani bawikira kumi ra daukras kapram kaka, yang dukiara sika man nani daukras.’

⁴⁶ Bamna naha nani na ban kaia ra pât wahwanka ra wabia, sakuna kasakkira nani ba lika raya ban kaia ra wabia.”