Matiu 22 - DAWAN BÎLA AISKA

Marit liliaka maprika lilka ba

¹ Jisas bui upla nani ra kli maprika lilka nani wala aisi, win:

² “Gâd king aimaki lâka ba lika king kum ai luhpia waitna marit takan bara lilia tara kum daukan ba baku sa.

³ Ai albika nani blikan, paiwan uplika nani ba marit pata ra balbia wiaia, sakuna witin nani balaia apia win.

⁴ Alba wala nani blikan, naku wisi: ‘Paiwan uplika nani ra wis, plun ba pat ridi sa. Bîpki nani bara daiwri batanira nani pat ikri, bara diara sut ridi sa; man nani marit pata ra bal.’

⁵ Sakuna paiwan uplika nani lika bîla walras. Kum ba ai nasla ra wan, wala ba ai bisniska ra,

⁶ wala nani ba lika king albika nani ba alki rausauhki, ikan.

⁷ Bara king ba kasak pali ai kupia baikan, bamna ai suldiar nani blikan baha upla âikra nani ba iki tikaia, bara ai tawanka ba sin angkka luaia.

⁸ Baha ningkara, ai albika nani ra win: ‘Marit pata ba pat ridi sa, sakuna paiwri uplika nani ba lika balaia aitani apia kan.

⁹ Bamna man nani yabal tara nani ra was, bara ya ya wal prawma ba sut marit pata ra paiws.’

¹⁰ Alba nani ba yabal nani ra taki wan, bara upla sakan ba sut asla daukan, upla saura nani bara yamni nani sin; bara baku watla ba upla baman banhki takan.

¹¹ “King ba paiwan uplika nani kaikaia diman, bara witin waitna kum kaikan marit pata ra dimaia kwalka ba dimras kan.

¹² Bara witin ra win: ‘Upliki, ¿nahki kan man marit kwalka dimras si nâra ban bal dimram?’ Sakuna wala ba diara kumi sin aisaras.

¹³ Bamna king ba tibil mangki kan nani ra win: ‘Mina nani bara mihta nani ba priski, lata tihmu tara ra lulks; bahara sika witin inbia, bara ai napa nani sin arkbia.’

¹⁴ Kan upla ailal lika paiwan sa, sakuna kum kum baman bâk sakan sa.”

Lal mana aibapaia tânka ba

¹⁵ Parisi nani ba mahka wan, bara ai lâka daukan Jisas ra munka diara aisabia ba ra, dahra sakaia dukiara.

¹⁶ Bara ai uplika tila nani, Herod uplika nani kira blikan Jisas ra wiaia: —Smasmalkra, yang nani pain kaikisna man ba kasak kat aisisma, bara upla nani aisi ba kulkras Gâd yabalka ba kat kasak smalkisma, kan man ba upla mawanka ba kulkras sma bamna.

¹⁷ Bamna nahki lukisma ba yang nani ra ai wis: ¿Rom wihtka tara ra lal mana aibapaia ba aitani sa, apia kaka aitani apia sa?

¹⁸ Sakuna Jisas witin nani lukanka saura ba pat kaikan, bara wisata: —Kuninkira nani, ¿dîa muni traiki kaikisma?

¹⁹ Lal mana aibapi lalahka kum sal ai mariks. Bara lalah mâ kum sal yaban.

²⁰ Baha kaiki, Jisas witin nani ra makabi walan: —¿Lilka na bara nina ulban na sin, ya dukia sa ki?

²¹ Witin nani bila: —Wihta tara dukia. Bara Jisas bila: —Ban kaka, wihta tara dukia ba wihta tara ra yas, bara Gâd dukia ba Gâd ra yas.

²² Naha walan ba ra, witin nani tâ iwan; bamna witin ba swi si, witin nani mahka wan.

Pruan wina kli buaia makabi walanka ba

²³ Baha sim yua, sadiusi kum kum Jisas ra kaikaia wan. sadiusi nani wisa pruan nani ba lika kli sip bubia apia; bamna naha tânka na Jisas ra makabi walan:

²⁴ Smasmalkra, Moses wan win marit waitna kum luhpa sakras ban prubia kaka, muihnika ba ai piarkika ba wal brih, luhpa nani sakaia sa ai muihni pruan ba watlika ra.

²⁵ Bamna, nahara yang nani tilira waitna 7 kan, sut ai muihni atia. Kau almukka ba marit takan, sakuna pruan. Luhpa sakras ban pruan bamna, ai piarkika ba ai muihni ai ningkara ba ra swin.

²⁶ Baha ningkara, witin ningka ba ra sim baku takan, ba wina wala ba brin bara sim baku takan; bara baku baman, muihnika 7 kat brin.

²⁷ Sut pruan ningkara, mairka ba sin pruan.

²⁸ Bamna pruan wina kli bubia ba ra, ¿7 baha wina ani pali ba maya kabia, kan sut witin wal marit ba?

²⁹ Jisas pana aisin: —Man nani lika tanis mamwahkisma, man nani sin Ulbanka ba tânka briras, Gâd karnika ba sin kaikras sma ba mita.

³⁰ Pruan nani kli bubia ba ra, witin nani marit takbia apia, ai luhpia mairin nani sin marit sâkbia apia, kan witin nani ba lika Gâd insalka nani kasbrika purara ba baku kabia.

³¹ Sakuna pruan nani kli buaia tânka ba dukiara lika, ¿Gâd pali mita man nani ra mai win ba kau aisi kaikras sma ki? Naku wisa:

³² ‘Yang sika Ebraham, Aisak bara Jekob Gâdka.’ ¡Bara Gâd ba pruan nani Gâdka apia sa, sakuna raya nani Gâdka sa!

³³ Upla nani naha walan ba ra, ai smalkanka ba dukiara tâ iwan.

Gâd lâka kau tara ba

³⁴ Jisas sadiusi nani ba bîlas daukan ba parisi nani kiama ra diman ba ra, sut asla takan;

³⁵ bara tila ba wina, Lâ Smasmalkra kum Jisas ra traika kaikan. Witin ra makabi walan:

³⁶ Smasmalkra, ¿lâ bîla nani ba wina ani ba kau tara sa ki?

³⁷ Jisas bila: —‘Dawan Gâdkam ra latwan kaikma kupiam aiska kira, sulkam aiska kira bara sinskam aiska kira ni sin.’

³⁸ Naha sika lâ bîla nani wina kau tara bara kau tâura ba sin.

³⁹ Wala kumi baha wal talia ba lika, naku wisa: ‘Uplikam ra latwan kaiks, man wînam ra latwan kaikisma ba baku.’

⁴⁰ Naha lâ bîla wâl na ra Moses lâka bara prapit nani smalkanka nani ba asla prawan sa.

¿Kraist ba ya kiamka sa?

⁴¹ Kau parisi nani asla kan ba ra,

⁴² Jisas mita witin nani ra makabi walan: —¿Misaya dukiara man nani nahki lukisma? ¿Witin ba ya kiamka sa? Witin nani bila: —Debit kiamka.

⁴³ Bara Jisas witin nani ra win: —¿Nahki kan Spirit Holikira ingnika yan ba mita, Debit mita Dawan mâkan? Kan Debit naku aisan:

⁴⁴ ‘Dawan ba yang Dawanki ra win: Mihti aihkika ra iws, yang mita man waihlam nani minam munhtara mangkamna kat.’

⁴⁵ ¿Nahki Kraist ba Debit kiamka kabia ki, kan Debit pali mita Dawan mâki ba?

⁴⁶ Bara upla kumi sin bîla kum pan aisaras kan; bamna baha yua wina upla kumi sin diara makabi walaia lukras kata.