Matiu 21 - DAWAN BÎLA AISKA

Jisas Jerusalem ra dimisa

¹ Witin nani Jerusalem lamara balan ba ra, Betfagé tawanka lamara balan, Olivet ilka lamara. Bahara Jisas ai disaipilka wâl saki blikan wan,

² bara naku win: —Tawan lupia mamwan kat ba ra was. Bahara biriku mairin kum wilkan ba sâkma, bara ai luhpia sin witin wal. Man nani lanhki, sal aik.

³ Bara ya ya diara kum mai wibia kaka, naku wis: Dawan naha nani na brin daukisa, bara naika bri balbia.

⁴ Naha na ban takan, prapit ulban ba aimakaia dukiara:

⁵ “Man nani Saion tawanka ra wis: ‘Kaiks, Kingkam ba man ra aula, bawikira pali, biriku kum purara uli, biriku luhpia sin, baha ba wark daiwra luhpia kum.’ ”

⁶ Bamna disaipil nani wan, bara Jisas win ba baku daukan.

⁷ Biriku ba ai luhpia wal bri balan, bara ai kwalka nani baha purara palkan, Jisas ulan.

⁸ Upla ailal ba ai kwalka nani yabal ra palkan; wala nani dus tnawa nani klaki, yabal ra yakaban.

⁹ Upla nani tâura wapi kan ba bara ninara aula kan ba sin kwâra tara kan bara mahka naku winan: —¡King Debit Luhpia ra Prana Tara Kabia! ¡Yamni pali sa witin Dawan nina mâki aula ba! ¡Gâd ra prana kabia laih purara!

¹⁰ Jisas Jerusalem ra diman ba ra, tawan aiska ba turban pali takan, bara upla ailal makabi walan: —¿Naha na ya?

¹¹ Bara upla nani ba bila: —Naha na prapit Jisas, Galili tasbaya ra Nasaret tawanka ba wina.

Jisas tempel ba klin daukisa

¹² Jisas tempel ra diman bara baha wina upla nani diara atki pana atki ba sut kangbi sakan, upla lalahka sins mamunra nani tibilka nani ba sut makupan, bara butku âiatkra iwaika nani ba sin;

¹³ bara baha nani ra naku win: —Ulbanka ra wisa: ‘Yang waitla ba pura sunra watla win kabia’; sakuna man nani âimplikra nani watla daukram sa.

¹⁴ Bara tempel ra blain nani kum kum bara skahwa nani sin Jisas lamara balan, bara witin mita sut rakan.

¹⁵ Sakuna prîs wihtka bara Lâ Smasmalkra nani lawan sain nani aihka daukan ba kaiki, bara tuktan nani tempel ra naku wini kan ba walan: “¡King Debit Luhpia ra Prana Tara Kabia!”

¹⁶ Bara witin nani bui Jisas ra win: —¿Walisma ki baha nani aisi ba? Jisas pana win: —Âu, yang walisna. ¿Sakuna Ulbanka ra naha tânka aisi ba man nani aisi kaikras ki? Naku wisa: ‘Tukta sirpi swap lupia tiala di nani lawana ba wal man ra mamyunaia ba yaram sa.’

¹⁷ Bara Jisas baha nani swi si, tawan ba wina taki, Betania ra wih, baha ra tihmia luan.

Jisas kwah damni dusa ai mâ âpu ba lahtubisa

¹⁸ Yu wala titan, kli tawan ra aula kan ba ra, Jisas plun pin dauki kan.

¹⁹ Yabal tnaya ra witin kwah damni dusa kum kaikan, sakuna dusa ra diara kumi sin sakras, wahia nani baman. Bara Jisas dusa ra win: —¡Ban kaia ra man kli mâ brima apia! Baha sim pali piua ra, kwah damni dusa ba lâwan.

²⁰ Disaipil nani baha kaikan ba ra, tâ iwan, bara Jisas ra makabi walan: —¿Nahki kan kwah damni dusa ba baha pali piua ra lâwan?

²¹ Jisas witin nani ra win: —Kasak pali man nani ra mai wisna, kasak lukan lâka brih, namhpa namhpa lika lukras sma kaka, kwah damni dusa ra daukri na man nani daukma; bara naha baman apia, sakuna naha ilka ra sin wima: ‘Naha wina taki, kabu ra wih dims’, bara baku takbia.

²² Bara man nani kasak luki puram sunra ra makama ba, sut brima.

Jisas karnika ba

²³ Jisas tempel ra diman, bara baha ra smalki kan, prîs wihtka nani bara Ju wihtka almuk nani ai lamara balan, bara witin ra makabi walan: —¿Dîa karnika ni naha dukia nani daukisma? ¿Ya mita naha karnika na maikan?

²⁴ Jisas witin nani ra win: —Yang sin man nani ra diara kum mamkabi walaisna; baha ba ai wima kaka, yang bui man nani ra mai wimna dîa karnika ni naha dukia nani daukisna ba.

²⁵ ¿Ya mita Jan ra upla tahbi daukaia blikan? ¿Gâd, apia kaka, upla nani mita? Sakuna witin nani mahka pana pana blahwi, aisan: “Yawan na Gâd blikan wibia kaka, witin wan wibia: ‘¿Bara dîa kan man nani bui witin ra kasak lukras kapram?’

²⁶ Bara upla nani mita blikan wibia kaka, yawan upla nani ra sibrin wan daukisa; kan upla sut kasak lukisa Jan ba Gâd prapit kan.”

²⁷ Baku bamna, witin nani bui Jisas ra win: —Yang nani kaikras. Bara Jisas bila: —Baku ba ra yang sin man nani ra mai wimna apia dîa karnika ni naha dukia nani daukisna ba.

Luhpa waitna wâl maprika lilka ba

²⁸ Jisas makabi walan: —¿Naha na man nani nahki lukisma ki? Waitna kum luhpa waitna wâl bri kan, bara kumi ra naku win: ‘Luhpi, man naiwa wainki nasla ra wark takaia was.’

²⁹ Luhpia ba bila: ‘¡Yang wamna apia!’ Sakuna naika mapa ra ai lukanka sins munan, bara wark takaia wan.

³⁰ Baha ningkara, aisa ba ai luhpia wala ba ra bal, sim bîla wisata. Naha bila lika: ‘Âu, aisa, yang wamna.’ Sakuna witin waras.

³¹ ¿Wâl ba wina ani ba ai aisa want kan ba kat daukan? —Witin nani pana win: —Pas ba. Bara Jisas witin nani ra win: —Man nani ra kasak pali mai wisna, lal mana saki Rom ra yabi nani ba, bara rug mairin nani ba sin man nani kainamra Gâd king aimaki tasbaya ra dimbia.

³² Kan Jan Tatahbra ba man nani ra mai smalki balan nahki iwaia sma ba, sakuna man nani bui witin ra kasak lukras katma; sakuna lal mana saki nani bara rug mairin nani lika witin ra kasak lukan. Man nani naha kaikram, sakuna kupiam laki banhras witin ra kasak lukaia dukiara.

Wark tatakra saura nani maprika lilka ba

³³ “Man nani maprika lilka wala na wals: Insla dawanka kum ai nasla ra wain dusa mâ nani mangkan; bara klar kum kutban, wain laya taibi sakaia untika kum salhkan, bara tawer sin kum paskan diara ba sut aihwakaia dukiara. Ningkara, nasla ba wark tatakra nani mihta ra mangki si, witin plis ra impakan.

³⁴ Dâkaia piua balan ba ra, ai albika kum kum blikan nasla mâ wina ai sirka ba wark tatakra nani ra makabaia dukiara.

³⁵ Sakuna wark tatakra nani mita albika nani ba alki, kumi ra prukan, wala ra ikan, bara wala ra lika walpa ni saban.

³⁶ Dawanka ba kainara blikata purkara kau alba nani blikan; sakuna warkka tatakra nani sut ra sim sât munan.

³⁷ “Lâs ra ai luhpia waitna pali ba blikan, naku luki: ‘Witin nani luhpi ra kulkanka yabi kabia.’

³⁸ Sakuna wark tatakra nani ba luhpia ba kaikan ba ra, ai mânka naku aisan: ‘Naha sika diara nani na dawanka kabia; kaisa witin ba ikaia, bara diara nani na yawan briaia.’

³⁹ Baku bamna, witin ba alki, nasla ba wina saki, ikan.

⁴⁰ Bara Jisas makabi walan: —Bamna nasla dawanka ba balbia ba ra, ¿baha warkka tatakra nani ra dîa munbia?

⁴¹ Witin nani bila: —Baha waitnika saura nani ra umpira kaikras pali sut ikbia, bara nasla ba wark tatakra wala nani mihta ra mangkbia, bara baha nani lika dâkaia piua ra ai nasla mana ba witin ra yabia.

⁴² Bara Jisas witin nani ra win: —¿Man nani Ulbanka ra kau aisi kaikras ki? Naku ulban sa: ‘Walpa utla mâmakra nani mita lulki swin ba, baha pali sika raya wihtka takan ba. Naha na Dawan mita daukan sa, bara yang nani aihka tah iwi banhri sa.’

⁴³ Baha mita, man nani ra mai wisna, Gâd king aimaki lâka ba man nani mihtam wina dakbi, upla nani king tasbaya mâ saki nani ra yaban kabia.

⁴⁴ Bara ya ya walpa ba purara kauhbia kaka, pîs pîs ra kriwbia, bara walpaya ba upla kum purara kauhbia kaka, witinka yuya baman daukbia.

⁴⁵ Prîs wihtka nani bara parisi nani sin Jisas maprika lilka nani aisi ba walan ba ra, ai dara walan baha ba witin nani dukiara aisi kan.

⁴⁶ Bamna witin nani bui Jisas ra alkaia lukan, sakuna upla nani ra sibri kan, kan upla nani kasak kulkan Jisas ba Gâd prapitka kan.