Matiu 20 - DAWAN BÎLA AISKA

Wark tatakra nani maprika lilka ba

¹ “Gâd king aimaki lâka ba insla dawanka kum baku sa; witinka titan pali taki wan wark tatakra nani ra wark yabaia, ai wainka nasla ra wark takaia.

² Wark tatakra nani ba aikuki aisi daukan yu kum ra nahki aibapaia ba yabaia, bara baha nani ai nasla ra wark takaia blikan wan.

³ Baha ningkara, titan 9 aklak kli taki wan, bara diara atkaia pliska ra wala nani kaikan, witin nani bahki baman bahara kan.

⁴ Witin baha nani ra win: ‘Man nani sin naisla ra wark takaia was, bara nahki prais briaia kama ba, yang maikamna.’ Bamna witin nani wan.

⁵ Dawanka kli 12 aklak prais taki wan, tutni 3 aklak sin, bara sim sât daukan.

⁶ Bara tutni 5 aklak kli pulaia pliska ra bahara wala nani bahki diara daukras kan aikuki prawan, bamna baha nani ra win: ‘¿Dîa kan man nani nahara wark takras bahki baman sma?’

⁷ Witin nani pana win: ‘Upla kumi sin wark takaia wankras ba mita.’ Bara witin baha nani ra win: ‘Man nani sin naisla ra wark takaia was.’

⁸ “Tihmia iwan ba ra, insla dawanka ba wark pura kakaira ra win: ‘Wark tatakra nani ba paiwi, ai mana ba yas; lâs ra balan ba wina aibaps, tâura balan ba lâs ra aibaps.’

⁹ Bara tutni 5 aklak wark takaia diman nani ba balan, bara kumi bani ai mana brin, yu aiska mana dîa aibapi kan ba.

¹⁰ Ningkara, pas pali wark takaia diman nani ba balan, bara luki banhwan kau pura ai mana bribia; sakuna witin nani sin kumi bani dîa yu aiska ra aibapi kan ba praiska kat brin.

¹¹ Witin nani baha brin ba ra, dawanka ba mapara mahka brukwan,

¹² naku aisi: ‘Naha nani balan na awar kumi baman wark takan; bara yang nani kau wark karna takri yu aiska lapta wal aimaki na wal baku sim mana yabram.’

¹³ Sakuna dawanka ba mita baha nani tila wina kumi ra pana win: ‘Upliki, yang bui man ra watawi kumi sin mai munras. ¿Man ba yang wal lâ daukras katma ki yu aiska wark takaia mana ba?

¹⁴ Mamna brih, mahka was. Yang bui man ra maikisna ba baku, naha waitnika tutni ra wark ra diman na ra sin yabaia sna.

¹⁵ ¿Yang lalahki ba wal dîa want sna ba kat daukaia sip apia sna ki? ¿Apia kaka, yang kupi pain ba mita man tumisma ki?’

¹⁶ “Baku bamna, ya nani ninara ba, tâura tawbia, bara tâura nani ba ninara tawbia.

Jisas ai pruanka dukiara pat aima yumhpa aisuya

¹⁷ Jisas Jerusalem ra pat impaki kan ba ra, ai disaipilka 12 ba tnaya ra saki, win:

¹⁸ Man nani kaikisma yawan Jerusalem ra auya, bahara sika Upla Luhpia Waitna ba prîs wihtka nani bara Lâ Smasmalkra nani mihta ra mangkan kabia, bara witin nani mita pruaia pâtka ra dingkbia,

¹⁹ Ju apia nani mihta ra mangkbia witin swira daukaia mata, prukbia bara dus prihni ra sabia; sakuna yu yumhpa ra, pruan wina kli bukan kabia.

Jems bara Jan yaptika makabanka ba

²⁰ Jems bara Jan, Sebedi luhpia nani ba, ai yaptika aikuki balan, bara mairka ba Jisas lamara ai lula kriki diara kum makaban.

²¹ Jisas makabi walan: —¿Man dîa ba plikisma? Witin bila: —Man King aimakma ba ra, adar yas luhpi wâl na wina kumi ba aihkikam ra iwbia, bara wala ba smihkam ra.

²² Jisas bila: —Man nani kaikras sma dîa makabisma ba. ¿Man nani sip sma ki yang dimna kapka ba wina diaia? Witin nani win: —Sip sna.

²³ Jisas pana aisin: —Kasak. Man nani kapki wina dima, sakuna aihkiki ra bara smihki ra iwaia ba lika yang mita yabaia sip apia. Baha lika ya ya dukia wisi Aisiki ridi daukan ba, baha nani ra yaban kabia.

²⁴ Disaipil wala nani matawalsip ba baha walan ba ra, muihni wâl ba mapara lawan.

²⁵ Sakuna Jisas baha nani ra paiwi, win: —Man nani kaikisma, kuntri nani wihtka nani ba baha nani purara dawanka takisa, bara witin nani tilara kau tara nani ba baha nani purara karnika alkisa.

²⁶ Sakuna man nani tilamra lika baku kabia apia. Bamna man nani tilamra ya tara kaia lukisa kaka, wala nani dukia daukaia sa;

²⁷ bara ya ya man nani tilamra tâura kaia lukisa kaka, wala nani albika takaia sa.

²⁸ Bahamna, baku natka ra, Upla Luhpia Waitna ba balras kan upla mita witin ai dukia daukaia dukiara, sakuna witin mita upla dukia daukaia, bara ai rayaka ba upla ailal pri sakaia mana baku yabaia.

Jisas mita blain wâl ba rakisa

²⁹ Witin nani Jeriko tawanka wina taki auya kan ba ra, upla ailal Jisas nina blikan.

³⁰ Bahara yabal tnaya ra blain wâl iwi kan; bara Jisas lui auya kan ba walan ba ra, naku winan: —¡Dawan, Debit Luhpia, yang nani ra umpira ai kaikram!

³¹ Upla nani ba mita lawi daukan ai bîla ba prakbia wisi, sakuna witin nani kau karna winan: —¡Dawan, Debit Luhpia, yang nani ra umpira ai kaiks!

³² Bara Jisas takaski, blain nani ba paiwi, makabi walan: —¿Man nani dîa want sma yang mai daukamna?

³³ Witin nani bila: —Dawan, yang nani kaikaia want pali sna.

³⁴ Bara Jisas mita witin nani ra umpira kaikan, bamna nakra nani ra kangban. Baha sim pali piua ra blain nani ba kaikaia sip kan, bara Jisas nina blikan.