Matiu 19 - DAWAN BÎLA AISKA

Jisas dibors tânka ba smalkisa

¹ Jisas naha diara nani na aisin ningkara, Galili wina taki Judia tasbaya ra wan, Jordan awala lalma tani ra.

² Upla ailal ai nina blikan, bahara sikniskira nani ba sut rakan.

³ Bara parisi tila nani Jisas trabil ra dingkaia wisi, lamara bal, makabi walan: —¿Lâ sa ki upla kum ai maya ra swiaia diara bahki tâwan?

⁴ Witin pana baha nani ra win: —¿Man nani Ulbanka ra aisi kaikras ki? Blasi pali papaskra mita witin nani ba ‘waitna bara mairin paskan.’

⁵ Jisas naku sin wisata: ‘Baha mita waitna ba ai aisika bara ai yaptika wal swibia, bara ai maya wal asla takbia, bamna wâl ba ai wîna kumi baku takbia.’

⁶ Baku bamna, yakan apia sa, sakuna wal ai wîna kumi takan sa. Baha mita, Gâd mita asla prakan ba, upla mita dakbi sakaia apia sa.

⁷ Bara parisika nani makabi walan: —¿Dîa kan Moses lâ yaban waitna ai maya ra swiaia wauhkataya ulbi yabi bara swiaia?

⁸ Jisas bila: —Baha ba man nani kupiam karnika ba mita Moses lâ maikan mayam mahka swiaia; sakuna blasi pali lika baku apia kan.

⁹ Yang bui man nani ra mai wisna, ya ya ai maya mairin ra swiaia ba, mairka ba rug lâka daukras kan kaka, bara waitna ba mairin wala wal marit takbia kaka, witin marit lâka sauhkisa.

¹⁰ Bara ai disaipilka nani bui witin ra win: —Waitna ai maya wal tânka ba baku sa kaka, kau pain sa marit takaia apia.

¹¹ Jisas mita win: —Upla sut naha tânka sip pain briras, Gâd mita naha tânka briaia yan uplika nani ba baman lika.

¹² Waitna nani sip marit takras tânka ba ailal sa: kum kum ba ai yapti biara wina marit takaia sip apia ban balan sa; wala nani ba sip apia sa upla nani mita marit takaia sip apia daukan bamna; bara wala nani marit takras ban sa Gâd king aimaki lâka ba tâwan. Ya ya naha smalkanka tânka briaia sip kaka, briaia sa.

Jisas tuktan lupia nani ra yamni munisa

¹³ Upla kum kum Jisas ra tuktan lupia nani brih balan, witin nani ra ai mihta nani kahbia bara witin nani dukiara ai pura sunbia win, sakuna disaipil nani mita uplika nani ba ra mahka lawi daukan.

¹⁴ Sakuna Jisas bila: —Man nani swis tuktan nani ba yang ra balbia, witin nani ba takaskpara; kan Gâd king aimaki lâka ba witin nani baku ba uplika nani dukia sa.

¹⁵ Bara ai mihta nani tuktika nani ra kahban, bara ningkara baha wina mahka wan.

Wahma lalahkira kum Jisas wal aisisa

¹⁶ Wahma kum Jisas ra balan, bara makabi walan: —Smasmalkra, ¿raya ban kaia ba briaia dîa dukia yamni daukaia sna ki?

¹⁷ Jisas pana witin ra win: —¿Dîa kan yang ra yamni ba dukiara makabi walisma? Yamni ba kumi baman bâra sa. Sakuna raya ban kaia ra diman mai daukisa kaka, lâ nani ba wali dauks.

¹⁸ Wahma ba bila: —¿Ani lâka nani? Bara Jisas bila: —‘Upla ikpara; marit lâka sauhkpara, implikpara; uplikam ninara kunin aisapara;

¹⁹ aisikam bara yaptikam wal kulks; bara man wînam ra latwan kaikisma ba baku, uplikam ra sin latwan kaiks.’

²⁰ Wahma ba bila: —Baha sut yang pat daukri. ¿Dîa ba kau daukaia sna ki?

²¹ Jisas pana witin ra win: —Man kasak pali takan mai daukisa kaka, was bara dîa dîa brisma ba atki upla umpira nani ra yas, bara baku lika kasbrika purara yuya nani bri kama; baha ningkara bal, bara nini blîks.

²² Sakuna wahma ba naha walan, sari pali taki mahka wan, witin lalahkira kata bamna.

²³ Bara Jisas bui ai disaipilka nani ra win: —Kasak pali man nani ra mai wisna, lalahkira kum mapa ra karna sa kasbrika purara ba kingka lâka ra dimaia.

²⁴ Kau sin mai wisna: Kiamil kum silak nakra bâk dimi luaia ba kau isi kabia, lalahkira kum Gâd king aimaki ba lâka ra dimaia ba wal.

²⁵ Disaipil nani baha walan ba ra, kasak tâ iwan, bara pana pana makabi wali banhwi kan: —Baku bamna, ¿ya sip kabia ki swak takaia?

²⁶ Jisas witin nani ra kaiki si, win: —Upla nani naha na daukaia sip apia sa, sakuna Gâd lika diara sut daukaia sip sa.

²⁷ Bara Pita mita witin ra win: —Dawan, yang nani dîa dîa bri kapri ba sut swi si, ninam blikisna. Baku bamna, ¿yang nani dîa brimna ki?

²⁸ Jisas witin nani ra win: —Man nani ra kasak pali mai wisna, Upla Luhpia Waitna ba ai king iwaika pranakira ra iwbia ba ra, diara nani sut raya daukan kabia piua ra, Upla Luhpia Waitna ai iwaika pranakira ra iwbia bara man nani nini blikram ba sin king iwaika 12 nani ra iwma, Israel kiamka 12 ba lâka daukaia dukiara.

²⁹ Bara ya ya ai watla nani, ai muihni nani, ai lakra nani, ai aisa, ai yapti, ai maya mairin, ai luhpia nani, ai tasbaya nani sut yang tâiwan swin nani ba, 100 prais kau bribia bara raya ban kaia ba sin witin nani dukia kabia.

³⁰ Sakuna upla ailal nanara tâura aimaki nani ba, ninara tawi banhbia; bara ailal nanara ninara banhwi ba, tâura tawi banhbia.