Matiu 18 - DAWAN BÎLA AISKA

¿Ya ba kau upla tara sa?

¹ Baha sim piua ra, disaipil nani ba Jisas lamara bal, makabi walan: —¿Kasbrika purara ba Kingka lâka ra ya ba kau tara sa?

² Bara Jisas tuktan lupia kum wini, witin nani lilapas kat mangki,

³ win: —Kasak pali man nani ra mai wisni, man nani kupiam laki, tuktan lupia nani baku takras sma kaka, Gâd king aimaki lâka ra dimma apia.

⁴ Baku bamna, Gâd king aimaki lâka ra kau tara ba, bawikira lâka bri kabia ba sin naha tuktika lupia na wal baku.

⁵ Bara ani uplika yang nini ra luki nahmuna tuktika kum brisa kaka, yang ra ai brisa.

Saurka ra kauhaia trabilka ba

⁶ “Ya ya naha tuktika lupia nani yang ra luki na yarka saura lâka ra kauhbia kaka, kau pain kabia ai nana ra akbaia walpaya kum wilki, kabu tihuka ra lulkka dimi wabia.

⁷ ¡Tasba mapara nahki saura pali kabia saura daukaia paiwanka nani ailal pali ba mita! Baha piua bani bâra kabia, ¡sakuna ya mita upla wala ra saura daukaia munan saura dauki ba uplika mapara alai pali kabia!

⁸ “Baha mita mihtam, apia kaka minam kra mita maikan saura lâka ra kauhisma kaka, klaki dakbi bara laihura lulks; kan kau pain sa raya kaia ra mihtam âpu, apia kaka minam âpu wih dimma, sakuna ban kaia pata klauhan ra mihtam wâl bara minam wâl brih mai lulkka lika apia.

⁹ Bara namkra mita maikan saura lâka ra kauhisma kaka, daiki laihura lulks; kan kau pain sa raya kaia ra namkra kum âpu dimaia, bara namkra wâl brih hil pauta ra mai lulkka lika apia.

Sîp tiwan ba maprika lilka

¹⁰ “Aman kaiks; man nani naha sirpika nani kumi ra sin bahki kulkpara. Kan yang bui man nani ra mai wisna, ai insalka nani Aisiki kasbrika purara ba ra piu bani ra lamara sa.

¹¹ [Kan Upla Luhpia Waitna ba lika tiwan kan ba swaki sakaia balan.]

¹² “¿Nahki lukisma man nani? Upla kum sîp 100 brisa bara baha tila ba wina kum aimawahkbia kaka, ¿wala 99 ba il ra swi si, sîp aimawahkan ba plikaia waras sa ki?

¹³ Bara wal prawbia kaka, kasak pali man nani ra mai wisna, baha sîpka dukiara kau lilia takbia, 99 aimawahkras kan ba purkara.

¹⁴ Baku sin, man nani kasbrika purara ba, naha sirpiki nani kumi sin tiwbia ba want apia sa.

Nahki wan muihni pâtka ban swih tikaia ba

¹⁵ “Muihkam mita mampara saura yabia kaka, wal mânkam aisi, ai saurka ba latan mariks. Bîlam walbia kaka, muihkam ba pat kupia alkram sa.

¹⁶ Sakuna bîlam walras kaka, kau upla kumi, apia kaka wâl paiws, bara dahra saki aisabia ba, witnis wâl, apia kaka yumhpa kaia sa.

¹⁷ Baha nani ra witin bîla walras kaka, serts ra dahra sâks; bara serts ra sin bîla walras kaka, baha uplika ba swis Gâd kakaira nani apia ba baku takbia, apia kaka Rom ra lal mana aibapaia saki ba baku kabia.

¹⁸ “Kasak pali man nani ra mai wisni: Dîa dîa naha tasba ra wilkma ba, kasbrika purara ba sin wilkan kabia; bara dîa dîa naha tasba ra lanhkma ba, kasbrika purara ba sin lanhkan kabia.

¹⁹ “Bara kau sin mai wisna: Naha tasba ra man nani tilam wina wâl ai kupia wilin taki, diara kum ai pura suni makabia kaka, Aisiki kasbrika purara ba mita witin nani ra yabia.

²⁰ Kan ani anira upla wâl, apia kaka yumhpa yang nini ra asla prawbia kaka, yang sin bahara witin nani lilapas kat sni.

²¹ Bara Pita wih, Jisas ra makabi walan: —Dawan, ¿aima an muihki mita maipara saura daukbia kaka, yang mita ban swih tikaia sna? ¿Aima 7 kat?

²² Jisas witin ra win: —Yang aima 7 lika mai wiras, sakuna 70 aima 7 prais kat.

Wark uplika kum ai uplika saurka swih tikaia want apia kan maprika lilka ba

²³ “Baha mita, Gâd king aimaki lâka ba sin king kum ai warkka uplika nani wal ai traska nani kulki kaikan ba baku sa.

²⁴ Mahka baha dauki kan ba ra, wark uplika kum witin ra brih balan, bamna witinka ba lalah milian ailal tras bri kan.

²⁵ Wark uplika ba aibapaia lalah âpu kan, bara king ba mita adar yan witin ba alba baku upla ra atkbia, ai maya, ai luhpia nani, dîa dîa bri ba sut kira, ai traska bri kan ba aibapaia dukiara.

²⁶ Bara wark uplika ba ai kingka mawanra ai lula kriki, naku makaban: ‘¡Dawan, wiria bîli kaiks, bara sut mai aibapamni!’

²⁷ King ba witin ra umpira kaikan, bara traska ba sut ban swin tiwan, pri sin sakan.

²⁸ “Sakuna wark uplika ba baha wina takan wal baku, ai pana wala kum wal prawan, baha ba ai tahkia kan; baha mita witin ra lalah wiria baman tras kan. Witin mita nana ra alki, mahka patka baiki, win: ‘¡Traski ba aibaps!’

²⁹ Bara ai tahkia ba ai mawanra ai lula kriki, makaban: ‘¡Wiria bîli kaiks, bara sut mai aibapamni!’

³⁰ Sakuna wala ba bila apia win, bara kau ni wih silak ra mangkan, traska ba tak aibapbia ba kat.

³¹ Wark uplika wala nani ba naha kaikan ba ra, sari kasak takan, bara wih kingka ra diara takan ba sut win.

³² Bamna king ba mita wark uplika ba paiwan balan, bara naku win: ‘¡Wark uplika saurkira! Yang traskam ba sut swih tikri, baku makabram bamna.

³³ Baku sin man pâmnika ra umpira kaikaia kapram, man ra umpira mai kaikri ba baku.’

³⁴ Bara king ba kasak ai kupia baiki, adar yan panis munaia, ai traska ba sut aibapbia ba kat.”

³⁵ Bara Jisas naku aisi tnata alkan: —Baku sin Aisiki kasbrika purara ba man nani ra mai munbia, kumi bani muihkam ra kupiam aiska ni traska ban swih tikras sma kaka.