Matiu 17 - DAWAN BÎLA AISKA

Jisas wîna tara aihka takan ba

¹ Yu matlalkahbi luan ningkara Jisas bal Pita, Jems bara muihnika Jan kat brih, witin nani ai mânka il purara pali kum ra wan.

² Bahara Jisas wîna tara ba aihka takan witin nani mawan kat. Ai mawan ba ingni pali kan sim lapta baku, bara ai prâka ba pihni pali sim ingni baku.

³ Tisku baku kan, witin nani bui Moses bara Ilayas wal kaikan Jisas wal sturi aisi kan.

⁴ Bara Pita mita Jisas ra win: —Dawan, pain kabia yawan nahara takaskaia. Man want sma kaka, yang utla yumhpa mâkamna, man wamtla kum, Moses watla kum bara wala lika Ilayas watla.

⁵ Kau Pita aisi kan ba ra, kasbrika ingni kum witin nani ra madiskan; bara kasbrika ba wina bîla baikra kum aisin, naku walata: “Naha sika Luhpi laitwankira. Witin sika yang bâk saki briri ba. Man nani bui witin ra wals.”

⁶ Disaipil nani baha walan ba ra, tasba kat ai mawan ra kauhan bara sibrin sin takan.

⁷ Bara Jisas witin nani lamara wih, kangbi muni, naku win: —Man nani bûi banhs; si bripara.

⁸ Witin nani ai nakra bukan ba ra, upla kumi sin kaikras kan, Jisas baman bâra kata.

⁹ Il ba wina witin nani iwi auya kan ba ra, Jisas mita naku adar yan: —Naha dukia aihka kaikram na upla kumi ra sin man nani aisapara, Upla Luhpia Waitna ba pruan wina kli bubia ba kat.

¹⁰ Bara disaipil nani ba mita Jisas ra makabi walan: —Baku kaka, ¿dîa kan Lâ Smasmalkra nani aisisa Ilayas pas tâura balaia sa?

¹¹ Jisas mita pana win: —Kasak sa, Ilayas pas aula, bara diara nani sut wapni daukbia.

¹² Sakuna yang bui man nani ra mai wisna: Ilayas lika pat balan bara upla nani mita witin ba kaikras, kuna dîa daukaia luki kan ba kat witin ra munan. Baku sin, Upla Luhpia Waitna witin nani mihta ra pât ailal wauhbia.

¹³ Bara disaipil nani ai dara walan Jisas mita witin nani ra Jan Tatahbra dukiara aisi kan ba.

Jisas mita tukta waitna kum dibil bri ba rakisa

¹⁴ Witin nani lika upla nani bâra kan ba kat balan ba ra, waitna kum Jisas lamara bal, ai mawan kat ai lula kriki, naku win:

¹⁵ Dawan, luhpi ra umpira kaiks. Witin lasa prukisa bara pât kasak wahwisa; aima ailal pauta klauhan ra, apia kaka liura kauhisa.

¹⁶ Disaipilkam nani ra bri balri, sakuna witin nani sip rakras kan.

¹⁷ Bara Jisas naku aisan: —¡Man nani kasak lukras kiamka bara watawikira nani sma ba! ¿Ahkia kat yang na man nani wal kamna? ¿Ahkia kat yang kupi man nani wal ban alki takaski bri kamna ki? Tuktika waitna ba nahara bri bal.

¹⁸ Bara Jisas mita lasa ra lawi daukan; bara witin mahka taki wan tukta waitna ba wina. Bara tuktika ba yamni takan baha piua wina.

¹⁹ Baha ningkara, disaipil nani Jisas wal tnaya ra taki aisi, makabi walan: —¿Nahki kan yang nani pirit saura ba sip kangbi sakras kapri?

²⁰ Jisas bila: —Baha ba man nani kasak lukan lâka uya âpu sma ba mita. Kasak pali mai wisna, mostard mâ praiska lupia baku pan kasak lukan lâka ba bri banhma kaka, sip sma naha ilka ra wiaia: ‘Naha wina taki, plis wala ra was’; bara ilka ba wabia. Kasak pali man nani kasak lukisma kaka, diara sut daukaia sip sma.

²¹ [Sakuna nahmuna piritka na pura sunra bara Gâd ra luki plun wahwi wal lika kangbi sakaia sip sa.]

Jisas kli ai pruanka dukiara aisisa

²² Galili tasbaya ra asla taki ba ra, Jisas witin nani ra win: —Upla Luhpia Waitna ba upla nani mihta ra mangkan kabia,

²³ bara witin ra ikan kabia, sakuna yu yumhpa ningkara, kli bukan kabia. Naha sturka na disaipil nani walan bara sari pali takan.

Tempel lal mana aibapaia ba

²⁴ Jisas ai disaipilka nani kira Kapernaum tawanka ra wan, tempel lal mana saki kan nani ba Pita ra wih, makabi walan: —¿Man nani smasmalkrikam ba tempel lal mana aibapisa ki?

²⁵ Pita bila: —Âu. Bara Pita utla ra diman piua ra, Jisas pas witin ra aisi muni, win: —¿Nahki lukisma, Saiman? ¿Naha tasba kingka nani na ani sât uplika nani wina lal mana nani sakisa? ¿Ai uplika nani wina, apia kaka tringsar nani wina?

²⁶ Pita mita pana wisata: —Tringsar nani wina. Bara Jisas mita win: —Ban kaka, ai uplika nani lika aibapaia apia sa.

²⁷ Sakuna yawan upla kumi ra sin kupia sauhkaia want apia, baku bamna, man lakun ra was, kiulh ba lulki, bara pas inska pibia ba bris. Baha inskika bîla ra lalah mâ kum sâkma, bara baha ba aitani kabia tempel lal mana yang aibapaia sna ba bara man mamna sin; bri si baha nani ra aibaps.