Matiu 15 - DAWAN BÎLA AISKA

Diara upla ra tâski dauki ba

¹ Bara parisi kum kum, Lâ Smasmalkra nani sin Jerusalem tawanka wina bal witin ra makabi walan:

² ¿Dîa kan man disaipilkam nani wan damika nani lâka ba bîla kat wali daukras ba? Witin nani ai mihta sikbi plun piaia lâka ba kulkras sa.

³ Sakuna Jisas mita makabi walan: —¿Bamna man nani dîa kan Gâd lâka bîla ba lulki si, man lâmka nani ni nina blikisma?

⁴ Kan Gâd pali naku win: ‘Aisikam, yaptikam wal kulks’, bamna ‘Ya mita ai aisika ra bara ai yaptika ra lahtubia kaka, mahka prubia.’

⁵ Sakuna man nani aisisma upla kum mita sip sa ai aisika ra bara ai yaptika ra naku wiaia: ‘Yang sip hilp mai munras, diara brisna ba sut Gâd ra yabri bamna’;

⁶ bara ya ya baku aisabia ba, ai aisika ra bara ai yaptika ra hilp munaia apia sa. Baku man nani bui Gâd lâka ba bahki kulkram, man nani lâmka nani nina blikaia dukiara.

⁷ ¡Kuninkira nani! Prapit Aiseya man nani tânkam pain aisin, witin naku ulban ba ra:

⁸ ‘Naha uplika nani ai bîla ni baman ai kulkisa, sakuna ai kupia nani lika yang wina laihura sa.

⁹ Yang ra mayunra aikbia ba bahki kabia, ai smalkanka nani ba upla lâka atia sa bamna.’

¹⁰ Bara Jisas bui upla nani ra wini, naku win: —Man nani wals bara tânka sin bris:

¹¹ Upla bîlak dimi dukia ba lika witin ra tâski daukras. Sakuna, upla bîla wina taki ba baha sika witin ra tâski dauki ba.

¹² Bamna disaipil nani Jisas lamara bal makabi walan: —¿Kaikisma ki parisi nani man aisaram ba wali, ai kupia baikan ba?

¹³ Sakuna witin bila: —Ani dusa Aisiki kasbrika purara ba mita mangkras ba, ai plamaika wina daikan kabia.

¹⁴ Baha nani ba swis, witin nani ba nakras bara nakras wala nani ba tâ brisa. Bara nakras kum nakras wala tâ brisa kaka, wâlsut unta kum ra kauhbia.

¹⁵ Bara Pita mita Jisas ra makabi walan: —Naha maprika lilka tânka na wan wis.

¹⁶ Jisas bila: —¿Man nani sin tânka briras sma ki?

¹⁷ ¿Kaikras sma ki dîa dîa wan bîla ra dimi ba wan biara ra auya, baha ningkara wan wîna tara ba wina takisa?

¹⁸ Sakuna wan bîla wina taki ba, baha ba wan kupia wina aula; naha sika upla ra tâski dauki ba.

¹⁹ Kan wan kupia wina aula ba lika naha nani: lukanka saura nani, upla ikaia lâka, marit lâka sauhkaia, tâski lâka nani, implikan lâka nani, kunin lâka nani, upla nina ra kunin aisaia lâka nani sin.

²⁰ Naha dukia nani lika upla ra tâski daukisa; sakuna wan mihta sikbras plun piaia lâka ba lika, upla ra tâski daukras sa.

Tringsar mairin kumi Jisas ra kasak lukan ba

²¹ Jisas baha wina taki, Tiro bara Sidón tasbaya ra wan.

²² Baha tasbaya ra Kenan wina mairka kum kan. Witin ai bîla baikra tara wini, Jisas ra bal win: —¡Dawan, Debit Luhpia, yang ra umpira ai kaiks! Kaiks, luhpi mairin pirit saura kum brisa, bara saura pali pât wahwisa.

²³ Sakuna Jisas pana diara kumi sin wiras. Bara ai disaipilka nani bal, makabi, naku win: —Mahka blîks wabia, wan ninara ban wini aula bamna.

²⁴ Jisas bila: —Gâd ai blikan sa Israel ra, sîp aimawahkan nani ra baman.

²⁵ Sakuna mairka ba kau Jisas lamara bal, ai lula kriki, wisata: —¡Dawan, du pali, hilp ai muns!

²⁶ Jisas pana tawi win: —Wan luhpia nani pata dakbi yul nani ra yabaia ba lika pain apia sa.

²⁷ Sakuna mairin ba pana win: —Âu, Dawan; sakuna yul nani sin ai dawanka nani pata yuya tibil wina kauhi ba, wahbi pîsa.

²⁸ Bara Jisas bila: —¡Mairin, kasak lukankam ba tara brisma ba! Bamna dîa lukisma ba kat daukan kabia. Baha sim pali piua ra luhpia mairin kata ba rawan.

Jisas bui upla sikniskira ailal rakisa

²⁹ Baha wina taki, Jisas Galili lakunka unku wan. Ningkara il kum purara uli, tasba ra pahrak iwan.

³⁰ Upla ailal witin ra balan ai sikniskirka nani brih, mina skahwa nani, kaikras nani, bîlas nani, mihta bara klahkla skahwa nani, bara siknis wala bri nani sin. Baha nani Jisas mina ra mangkan ba ra, witin mita sut ra rakan.

³¹ Upla sut tâ iwan, kan bîlas nani sturi aisi kan, mihtas nani bara klahklas nani ba rawan kan, mina skahwa nani ba wapi kan, bara blain nani diara kaiki kan. Upla sut mita Israel Gâdka ra mahka mayunan.

Jisas mita upla 4,000 plun dakakisa

³² Jisas ai disaipilka nani ra wini, naku win: —Naha uplika nani pat yu yumhpa yang wal sa. Witin nani diara piaia âpu sa, bara sari lukisna; ai watla nani ra plun piras blikamna kaka, yabal ra ban plun bla prubia.

³³ Ai disaipilka nani mita pana win: —Naha pliska ra upla kumi sin iwras, ¿bara yawan nahki plun ailal sâkbia ki witin nani ra dakakaia?

³⁴ Jisas witin nani ra makabi walan: —¿Man nani brit bâra brisma ki? Witin nani bila: —Brit 7 baman, bara inska lupia sin wiria.

³⁵ Jisas adar yaban uplika nani ba tasba ra iwbia.

³⁶ Bara brit ba, inska nani ba sin brih, Gâd ra tingki yaban. Ningkara bâk kriki, disaipil nani ra yan upla nani ra yuaia. Witin nani baku daukan.

³⁷ Upla sut pi, ai biara sin aitani kat banhkan. Bara yuyaka nani ba wahban ba ra, kau baskit 7 takan.

³⁸ Pin uplika nani ba lika, waitna baman 4,000 kata, mairin nani bara tuktan nani lika kulkras.

³⁹ Bara Jisas bui uplika nani ba mahka blikan wan. Witin lika ai dwarka ra aimaki, Magadán tawanka ra wan.