Matiu 14 - DAWAN BÎLA AISKA

Jan Tatahbra ikan ba

¹ Baha piua ra Herod Galili tasbaya ra wihta tara aimaki kan, bara witin Jisas sturka walan,

² bamna witin wal kan uplika nani ra win: “Baha lika Jan Tatahbra pruan wina kli buan sa. Baha mita sika sain tara nani daukaia karnika bri ba.”

³ Kan Herod mita sika Jan ba alki silak ra mangki, priski bri kan, Herodías tâwan; witinka ba ai muihnika Pilip maya kan.

⁴ Jan mita Herod ra naku win kan: “Witin na man mayam baku briaia sip apia.”

⁵ Herod Jan ra ikaia want pali kan, sakuna upla nani ra sibrin bri kan, upla sut mita Jan ba Gâd prapit kulki kan bamna.

⁶ Sakuna Herod aisubanka yua ra, Herodías luhpia mairin ba taki, paiwan uplika nani mawanra dans pulan. Baha ba Herod lilia takan,

⁷ bara swer taki pramis munan, dîa dîa makabia ba witin ra yabaia.

⁸ Bara yaptika mita smalki munan ba ra, Herod ra win: —Jan Tatahbra lal ba plit kum ra mangki aik.

⁹ Naha walan ba ra, king ba sari pali takan; sakuna swer taki aisin kan, bara paiwan uplika nani ba sin baha aisan ba walan kan bamna, adar yan witin ra baha yabia.

¹⁰ Bamna blikan wan silak watla ra Jan lal ba dakbaia.

¹¹ Baha ningkara plit kum ra brih balan, bara tuktika mairin ra yaban, bara tukta mairin ba ai yaptika ra bri si yan.

¹² Bara Jan disaipilka nani bal, ai wîna tara ba bri si, biki banhwan; ningkara, witin nani wih, Jisas ra maisa pakan.

Jisas mita upla 5,000 plun dakakisa

¹³ Jisas baha walan ba ra, duri kum ra aimaki plis kum ra wan witin yakan bâra kaia, tasba kum bin âpu ra wan. Sakuna upla nani baha kaikan, bara ai tawanka nani swih, sauhkak ai nina blikan.

¹⁴ Jisas duri wina takan ba ra, upla ailal bahara kan kaikan, bara witin nani ra umpira kaikan, bara sikniskira nani bri balan ba sut rakan.

¹⁵ Pat yu diman ba ra, Jisas disaipilka nani bal, witin ra win: —Pat tutni sa, bara upla kumi sin naha tasbaya ra iwras. Upla nani ba mahka blîks wabia, bara tawan sirpi nani ra wih, dîa pan atki pi banhbia.

¹⁶ Jisas mita pana win: —Witin nani waia apia sa; man nani mita plun yas pibia.

¹⁷ Witin nani bila: —Yawan nahara brit matsip bara inska wâl baman brisa.

¹⁸ Jisas witin nani ra win: —Man nani baha nani nâra yang ra bri bal.

¹⁹ Bara adar yan uplika nani ba twi purara iwbia. Baha ningkara, brit matsip bara inska wâl ba ai mihta ra brih, kasbrika purara kaiki, Gâd ra tingki win, britka nani ba kriki, ai disaipilka nani ra yaban, bara witin nani bui upla nani ra yuan.

²⁰ Sut pin bara ai biara sin banhwan. Baha wina disaipil nani ba mita yuyaka nani kau tawan ba wahbi, kau baskit 12 banhkan.

²¹ Pi banhwan ba lika, mairin nani bara tuktan nani sin kulkras, waitna baman 5,000 kata.

Jisas lî purara wapisa

²² Baha ningkara, Jisas ai disaipilka nani ra win duri ra aimaki ai kainara lakun baila wala ra lubia, kau witin bui upla nani mahka bliki kan ba ra.

²³ Upla sut mahka blikan wan ba ra, il purara uli wan yakan ai pura sunaia. Saiwi iwan ba ra, Jisas bahara yakan kan,

²⁴ bara duri ba lika pat lakun lilapas ra kata. Witin nani mapara pâsa ba krawi kan bamna, rip nani dwarka ra pruki kan.

²⁵ Pat ingwaia baila kan ba ra, Jisas lî purak wapi, witin nani lamara wan.

²⁶ Disaipil nani witin lî purara wapi kan kaiki, sirang iwi, ai bîla baikra tara ni ini banhwan: —¡Baha ba lika pirit kum sa!

²⁷ Sakuna Jisas aisi, naku win: —¡Kupiam karna bris; yang sna, si bripara!

²⁸ Bara Pita mita pana aisi, naku win: —Dawan, man sma kaka, aikrika man bâra sma ba kat lî purak wamna.

²⁹ Bara Jisas mita win: —Bamna, bal. Bara Pita duri ba wina iwi, lî purak mahka wapan Jisas bâra kan ba kat waia dukiara.

³⁰ Sakuna ai dara walan pâsa ba karna krawi kan, bara sibrin daukan; bamna mahka rungwi kan kaiki, naku ai pura winan: —¡Dawan, swaki ai sâks!

³¹ Baha pali piua, Jisas mita mihta ra alki, win: —¡Man kasak lukan lâka uya âpu sma! ¿Dîa kan namhpa namhpa lukram?

³² Witin nani duri ra ulan ba ra, pâsa ba laman.

³³ Bara duri bilara kan nani ba Jisas mawanra ai lula kriki, naku aisi banhwan: —¡Kasak pali man na Gâd Luhpia sma!

Genesaret ra sikniskira nani ba Jisas rakisa

³⁴ Witin nani lakun ba lui, bara Genesaret tasbaya wan.

³⁵ Baha tasbaya uplika nani ba pat kaikan baha ba Jisas, bara tasbaya ba aiska ra sturka ba aisan, bara sikniskira nani ba sut witin bâra kan ba kat brih balan.

³⁶ Witin ra makabi banhwi kan ai prâka tâ pan yarka kangbaia; bara baha kangban ba sut rawi banhwan.