Matiu 12 - DAWAN BÎLA AISKA

Ris yua ra disaipil nani plawar mâ wahbisa

¹ Baha piua ra, ris yua kumi ra, Jisas insla mangkan nani bâk wapi kan. Ai disaipilka nani plun pin daukan, bara plawar mâ wihta nani dakbi mâ ba saki pi banhwi kan.

² parisi nani baha kaikan ba ra, Jisas ra win: —Kaiks, ris yua ra wark daukaia lâ apia ba, disaipilkam nani lika daukisa.

³ Sakuna witin bila: —¿Debit ai uplika aikuki plun dauki kan bara diara daukan ba, man nani kau aisi kaikras ki?

⁴ Witin lika Gâd watla ra dimi, brit yamni munan nani ba brih pin; baha lika witin bara ai uplika nani kumi sin piaia adar âpu kan, prîs nani baman lika.

⁵ ¿Bara man nani Moses lâka ra sin aisi kaikras ki, prîs nani ba tempel ra ris yua ra ris briras kabia sin, sakuna baha ba saurka kum apia sa?

⁶ Bamna yang bui man nani ra mai wisna: nahara diara kum sa, tempel purkara kau tara ba.

⁷ Man nani Ulbanka ra naha tânka na kau pain briras: ‘Yang want sna ba lika umpira kaikan lâka brima, daiwan nani sakripais daukaia lika apia.’ Man nani baha tânka bri katma kaka, upla nani pât kumi sin daukras ba pâtkira daukaia apia kapram.

⁸ Bamna pain, Upla Luhpia Waitna ba sabat purara sin karnika brisa.

Waitna mihta lâwi pruan ba

⁹ Bara Jisas baha wina taki, pliska ra prias watla bâra kan ba ra diman.

¹⁰ Baha ra mihta lâwan kum kan. Bara sin upla kum kum Jisas ra aihwaki kan, diara kum aisabia bara dahra kwahkaia. Bara witin nani bila: —¿Lâ sa ki sikniskira kum ris yua ra rakaia?

¹¹ Jisas pana win: —¿Ya man nani tilamra sîp kum brisa, bara baha sîpka ris yua ra liwanhta kum ra dimi wabia kaka, wih sâkbia apia ki?

¹² Bamna, upla ba lika sîp purkara kau tara sa. Baku bamna, ris yua nani ra diara yamni daukaia lâ sa.

¹³ Bara Jisas mita siknis waitna ba ra win: —Mihtam sakbi bris. Bamna sakban bara rawan, sim ai mihta wala kata ba baku.

¹⁴ Bara parisi nani latara taki, mahka ai lâka dauki banhwan Jisas ra ikaia dukiara.

Jisas dukiara blasi pali ra ulban kan ba

¹⁵ Jisas naha walan ba ra, baha wina mahka wan, bara upla ailal ai nina blikan. Jisas sikniskira nani sut raki kan,

¹⁶ bara adar sin yan witin ba ya sapa upla nani ra wiaia apia.

¹⁷ Naha na naku takan, prapit Aiseya aisan ba aimakaia dukiara:

¹⁸ “Naha sika yang duki dadaukra bâk sakri ba, witin ra latwan kaikisna, bara witin dukiara sin lilia sna. Spiritki ba witin purara mangkamna, bara witin kuntri nani sut ra lâika tânka kasak ba aisabia.

¹⁹ Witin unsabia apia, ai pura sin winbia apia; upla kumi sin yabal nani ra ai bîla baikra ba walbia apia.

²⁰ Yauhrus bulwan kum pan witin krikbia apia, lamp wîkka kiasma saki ba sin daskbia apia, wihta kaia lâka karnika alki bribia ba kat.

²¹ Bara nisan nani sut ai bîla kaikanka ba witin ra bri kabia.”

Jisas ba dibil karnika brisa wisi dahra aisi banhwisa

²² Bara Jisas ra waitna kum bri balan, witin ba blain bara sturi sin aisaras, pirit saura kum bri kan ba mita. Jisas mita rakan, bara waitna ba diara kaikaia bara aisaia sin sip kan.

²³ Upla sut tâ iwi, naku aisan: “¿Naha na Debit Luhpia ba apia?”

²⁴ Parisi nani naha walan ba ra, naku aisi banhwan: “Naha waitnika lika Bilsibub, dibil nani wihtka ba, witin mita naha waitnika ra karnika yabisa lasa nani ba kangbi sakaia.”

²⁵ Jisas pat kaikan baha nani luki kan ba, bara witin nani ra win: “King tasbaya bani dakwi taki, pana pana aiklabia kaka, tanis aisawi tiwbia. Bara tawan kum, apia kaka utla uplika kum unsaban tâwan dakwi takan kaka, baha ba ban kabia apia.

²⁶ Baku sin, Sitan mita Sitan pali ra kangbi sakisa kaka, witin yaban dakwi takan sa; ¿bara baku kaka, ai karnika ba nahki ban kabia?

²⁷ Man nani wisma yang na Bilsibub karnika mita pirit saura nani kangbi sakisna; bamna baku kaka, ¿ninam blablikra nani ra ya mita karnika yabisa baha nani kangbi sakaia? Baha mita, witin nani pali mita latan marikisa man nani na mistik aisisma.

²⁸ Sakuna yang lika Gâd Spiritka karnika mita pirit saura nani kangbi sakisna, bara baha mita latan sa Gâd king aimaki lâka ba pat man nani ra balan sa.

²⁹ “¿Baku sin nahki sip kabia ki upla kum waitna karnakira kum watla ra dimi, witin ba pas priskras kaka, ai dukia nani dakbia? Baku baman sip sa diara bri nani ba dakbaia.

³⁰ “Ya yang hilpki ra apia ba, yang maipara sa; bara ya yang wal wahbras ba, yakabisa.

³¹ “Baha mita, man nani ra mai wisna: Upla nani watawan nani bara diara saura nani aisabia ba, sut swih tikaia sip sa; sakuna Spirit Holikira mapara bîla saurakira nani aisabia kaka, sip swih tikras kabia.

³² Bara ya ya Upla Luhpia Waitna mapara diara kum aisabia ba, Gâd baha uplika pâtka ban swih tikan kabia; sakuna ya Spirit Holikira mapara bîla saurakira nani aisabia ba, naha tasba ra bara tasba wala aula ba ra sin swih tikan kabia apia.

Dus ba ai mâ wina tânka kaikisa

³³ “Dus yamni ba mâ sin yamni sakisa; bara dus saura ba, mâ sin saura sakisa. Kan dus ba mâ wina ai tânka marikisa.

³⁴ ¡Piuta kiamka nani! ¿Nahki sip sma ki diara pain nani aisaia, kan man nani pali saurakira sma ba? Kan wan bîla ni aisi ba lika wan kupia aibanhwan ba wina aula.

³⁵ Upla yamni ba diara yamni nani aisisa, ai kupia ra diara yamni baman sa bamna, upla saura ba diara saura nani aisisa, saurka ba ai kupia ra sa bamna.

³⁶ Bamna yang mita naha mai wisna: Lâ daukan kabia yua ra, upla sut ai bîla swak taki aisin nani ba dukiara ai dahra sakaia kabia.

³⁷ Kan man bîlam aisaram nani tâka wina lâmka daukan kabia, bara pâtkas apia kaka pâtkira mai kulkan kabia.”

Upla saura nani sain aihka kum makabisa

³⁸ Bara parisi kum kum lâ smasmalkrika nani aikuki Jisas ra naku win: —Smasmalkra, sain aihka kum man mita daukrika yang nani kaikan ai daukisa.

³⁹ Jisas pana witin nani ra win: —Upla watawikira nani kasakka lâka briras nani ba sain aihka kum makabisa, sakuna witin nani ra sain kumi sin marikras kabia, prapit Jona sainka baman lika.

⁴⁰ Inska tara biara ra Jona yu yumhpa bara tihmia yumhpa kan ba baku, Upla Luhpia Waitna ba sin yu yumhpa bara tihmia yumhpa tasba biara ra kabia.

⁴¹ Ninibi tawanka ra iwan uplika nani ba lâ daukaia yua ra, naha piua uplika nani lâka daukbia ba ra, witin nani mita naha uplika nani ra pât ra lakbia, kan Jona mita Gâd sturka Ninibi uplika nani ra smalkan bamna, witin nani ai kupia lakan; sakuna man nani ra mai wisna, nahara diara kum sa Jona purkara kau tara ba.

⁴² Waupasa kwinka ba sin lâ daukaia yua ra, naha uplika nani lâka daukbia bamna, witin bubia, naha uplika nani ra pât ra lakbia, kan witin lika tasba laih wina balan Salaman sinska tara bri ba walaia, bara yang bui man nani ra mai wisna, nahara diara kum sa Salaman purkara kau tara ba.

Pirit saura kli tawi aula ba

⁴³ “Pirit saura kum upla kum wina takuya ba ra, tasba lâwan nani bâk ris briaia pliki taukisa; bara sip sakras piua ra, witin naku wisa:

⁴⁴ ‘Waitla wina taki balri ba ra kli waisna.’ Kli tawi aula ba ra, kaikuya bîla baman, pain pahban, prana sin daukan.

⁴⁵ Bara witin auya bara pirit kau 7 brih aula witin purkara kau saura nani, bara sut uplika ra dimi, baha ra iwi banhwisa bara kanra kata uplika ba nanara kau saura takisa. Naha sim baku takbia naha uplika saura nani ra.”

Jisas yaptika bara muihnika nani ba

⁴⁶ Jisas kau upla nani ra aisi kan ba ra, ai yaptika bara ai muihnika nani balan. Witin nani latara takaskan, bara witin wal aisaia wan.

⁴⁷ Upla kum mita Jisas ra maisa pakan: —Yaptikam bara muihkam nani latara sa, bara man wal aisin daukisa.

⁴⁸ Sakuna bal win uplika ra naku wisata: —¿Ya ba yang yaptiki bara ya ba yang muihki nani sa ki?

⁴⁹ Bara ai disaipilka nani ra kulki mariki, naku win: —Naha nani sika yaptiki bara muihki nani ba.

⁵⁰ Kan ya ya Aisiki kasbrika purara ba kupia lâka daukisa kaka, baha lika muihki, laikra bara yaptiki sa.