Matiu 10 - DAWAN BÎLA AISKA

Jisas bui apastil 12 ba paiwisa

¹ Bara Jisas ai disaipilka 12 ba paiwan bara karnika yan pirit saura nani kangbi sakaia, siknis sât sât bara wîna latwanka nani sin rakaia.

² Naha sika apastil 12 ba nina: Pas ba Saiman, ai nina wala Pita, bara ai muihni Andru; Jems ai muihnika Jan wal, witinka nani Sebedi luhpia;

³ Pilip, Bartolomiu, Tamas, Matiu lal mana wawahbra Rom nani dukia; Jems, Alfeo luhpia ba, bara Tadeo;

⁴ Saiman Kena wina ba, bara Judas Iskariot ba, kau naika Jisas ra waihla mihta ra mangkan ba.

Disaipil 12 ba Jisas mita smalkaia blikisa

⁵ Naha 12 na Jisas mita blikan wan, naku smalki: “Gâdkas nani tasbaya ra wapara, Sameria tawanka nani ra sin dimpara;

⁶ sakuna Israel nisanka sîpka tiwan nani ba ra was.

⁷ Naku smalki was: Gâd king aimaki ba lâka pat baila sa.

⁸ Siknis nani ba râks, pruan nani ba kli buks, lipar bri nani ba klin sâks, bara lasa nani ba sin kangbi sâks. Naha karnika na man nani prisant briram; bamna warkka daukma bara mana bripara.

⁹ “Gul, silbar bara bras sin brih wapara,

¹⁰ sakbat yabalkam dukia sin apia. Prâk kumi bamna brih was, bara sûs bara kîn sin brih wapara; kan wark uplika ra ai pata ba yabaia sa.

¹¹ “Tawan tara kum ra, apia kaka tawan sirpi kum ra dimma ba ra, man nani ra pain mai briaia uplika kum pliks, bara ai watla ra takasks, mahka impakma ba kat.

¹² Utla kum ra dimuma ba ra, lakula yas uplika dimi nani ra: Kupia kumi lâka ba man wal kabia.

¹³ Baha watla uplika nani pain mai brisa kaka, kupia kumi lakula ba witin nani wal ban swis; sakuna pain mai briras kaka, baku daukan kabia apia.

¹⁴ Bara utla kum ra, apia kaka tawan kum ra pain mai briras bara mai walras kaka, baha tawanka wina taks, bara tasba yuya minam ra ba siauhbi sâks.

¹⁵ Kasak pali mai wisna: Lâ daukanka tara yua ra, Sodoma bara Gomora tawanka wal baha uplika nani kau pât tara bribia.,

Rausauhkanka nani

¹⁶ “¡Kaiks! Yang bui man nani ba sîp baku mai blikisna yul wail nani tilara. Baku bamna, piuta nani baku sinskam ba bri bas, sakuna upla ra saura munras butku nani baku.

¹⁷ Aman kaiki bas, kan upla nani mita mai alki wihta nani mihta ra mai mangkbia, bara prias watla nani ra mai wipbia.

¹⁸ Wihta tara nani bara king nani mawanra mai brih wabia, yang tâiwan; baku man nani sturi yamni ba aisaia sip kama witin nani mawanra, bara Ju apia nani mawanra sin.

¹⁹ Sakuna wihta nani mihta ra mai mangkbia ba ra, dîa aisaia bara nahki aisaia sma ba dukiara lika uya lukpara; kan aisaia piua aimakbia ba ra, Gâd mita maikbia diara aisaia sma ba.

²⁰ Kan man nani lika aisama apia, kuna Aisikam Spiritka sika man nani bâk aisabia ba.

²¹ “Upla nani ai muihnika nani ra kunin muni prura pâtka ra dingkbia, aisa nani mita sin ai luhpia nani ra baku munbia; luhpia nani ba ai aisika nani mapara bubia, bara prura mihta ra mangkbia.

²² Upla sut mita yang tâiwan misbara mai kaikbia, sakuna ya ya tnata kat ban bapi bubia ba, baha lika swaki sakan kabia.

²³ Tawan kum ra man nani ra ninam bliki rau mai sauhkbia kaka, wala ra plaps; kan kasak pali mai wisna, Upla Luhpia Waitna ba balbia kau man nani Israel tawanka aiska ra waras ba ra.

²⁴ “Disaipil lika ai smasmalkra ba purara apia sa, bara alba kumi sin ai kiaptinka purara apia.

²⁵ Sip sa sika disaipil ba ai smasmalkra wal baku takaia, aitani lukaia sa, bara alba ba sin ai dawanka wal baku kaia. Utla dawanka ba Bilsibub mâkisa kaka, ¿witin ai watla uplika nani ra lika kau nina sauhkbia apia ki?

Yaura sibrin bri kaia ba

²⁶ “Baha mita, man nani upla nani ra sîa bripara. Kan dîa dîa pura prakan ba param sakan kabia, bara dîa dîa yukuwan ra ba sin pain kaikan kabia.

²⁷ Dîa tihmu tilara mai wisna na, man nani yu ingnika ra aisas; bara dîa wan mânka man mai wisna na, man nani utla bahna nani wina bîlam baikra tara ni aisas.

²⁸ Man nani ra mai ikaia sip nani ba ra sibrin lukpara, witin nani karnika âpu sa rayakam ban kaia ra man nani ra mai ikaia bara hil pauta ra mai sauhkaia ban kaia ra, bahara sibrin luks.

²⁹ “¿Witin nani daiwan tnawira lupia wâl lalah mâ sirpi kum mana yabisa apia? Ban sakuna, baku wiras sa kaka, baha nani kumi sin tasba ra kauhbia apia.

³⁰ Kan man nani lamla ra tâmwa mina bani ba kulkan sa.

³¹ Baku bamna, si bripara; man nani lika daiwan tnawira lupia ailal purkara sma.

Upla nani mawanra Jisas Kraist dahra aisaia ba

³² “Upla kum kra yang daihra upla nani mawanra latan aisabia kaka, yang sin Aisiki kasbrika purara ba mawanra ai dahra latan aisamna.

³³ Sakuna ya ai kulkras wibia kaka upla mawan ra, yang sin Aisiki kasbrika purara ba mawan ra kulkamna apia.

Jisas ba dakwi takaia sainka kum sa

³⁴ “Man nani lukpara yang na naha tasba ra kupia kumi lâka yabaia balri; apia, yang lika aiklabanka bri balri, kupia kumi lâka lika apia.

³⁵ Yang balri na lika naha dukiara: Luhpia waitna ba ai aisa mapara kaia, luhpia mairin ba ai yapti mapara, bara mairin ba ai mula yapti mapara;

³⁶ baku bamna, baha nani ai taya watla ra ba ai waihla nani kabia.

³⁷ “Ya ya ai aisika ra, apia kaka ai yaptika ra yang purkira latwan kaikisa kaka, yang upliki kaia sip apia sa; baku sin, ya ai luhpia waitna, apia kaka ai luhpia mairin ra yang purkira latwan kaikisa kaka, yang upliki kaia sip apia sa.

³⁸ Ya ya ai dusa prihni brih, nini blikras kaka, yang upliki kaia sip apia sa.

³⁹ Ya ai rayaka swaki sakaia lukbia ba, witin lika baha ba tikbia; sakuna ya yang tâiwan ai rayaka tikbia ba, witin baha ba swaki sakan kabia.

Prisant nani

⁴⁰ “Ya ya man nani ra pain mai bri ba, yang ra ai brisa; ya yang ra ai bri ba, witinka ai blikan ba ra brisa.

⁴¹ Ya ya prapit kum ra Gâd wina aula wisi pain bribia kaka, prapit bribia prisantka ba witin nani sin bribia; bara ya upla kasakkira kum ra pain ba ra wisi pain bribia kaka, waitna kasakkira ai prisantka bribia baku witin sin bribia.

⁴² Bara ya ya baha sirpika nani kum ra, nini bliki ba dukiara lî kauhla kâp kum pan yabia kaka, ai prisantka briaia kabia.”