Matiu 1 - DAWAN BÎLA AISKA

Jisas Kraist damika nani ba

¹ Naha sika Jisas Kraist damika sturka ulban ba, witin ba Debit bara Ebraham kiamka ba.

² Ebraham ba Aisak aisika kan, Aisak ba Jekob aisika, Jekob ba Juda ai muihni nani sut aisika.

³ Juda lika Tamar wina Fares bara Zérah sakan. Bara Fares Hesrón aisika, Hesrón lika Ram aisika.

⁴ Ram ba Aminadab aisika, Aminadab ba Nahasón aisika, Nahasón lika Salmón aisika.

⁵ Booz aisika ba Salmón, bara yaptika lika Rahab. Obed aisika ba Booz, bara yaptika lika Rut. Obed ba Jesé aisika.

⁶ Jesé lika king Debit aisika, king Debit lika Salaman aisika kata, Urías maya wal brih baikan ba.

⁷ Salaman ba Roboam aisika, Roboam ba Abías aisika, Abías lika Asá aisika.

⁸ Asá ba Josafat aisika, Josafat ba Joram aisika, Joram lika Ozías aisika.

⁹ Ozías ba Jotam aisika, Jotam ba Ahaz aisika, Ahaz lika Ezequías aisika.

¹⁰ Ezequías ba Manasés aisika, Manasés ba Amón aisika, Amón lika Josías aisika.

¹¹ Josías ba Jeconías aisika kata, ai muihni nani aikuki, Israel luhpia nani Babilon ra alki alba lâka ra bri wan piua ra.

¹² Babilon ra kan piua ningkara Jeconías ba Salatiel aisika kata, Salatiel lika Zorobabel aisika.

¹³ Zorobabel ba Abihud aisika, Abihud ba Eliaquim aisika, Eliaquim lika Asor aisika.

¹⁴ Asor ba Sadoc aisika, Sadoc ba Aquim aisika, Aquim lika Eliud aisika.

¹⁵ Eliud ba Eleazar aisika, Eleazar ba Matán aisika, Matán lika Jekob aisika.

¹⁶ Jekob sika Meri maya Josep ba aisika. Meri sika Jisas yaptika, witinka nina Misaya mâki ba.

¹⁷ Baku bamna, Ebraham wina Debit kat kiamka 14 luan, bara Debit wina Israel luhpia nani Babilon ra bri wan ba kat kiamka 14 luata, bara baha piua wina Misaya ba aisubi takan kat sim baku kiamka 14 luan.

Jisas Kraist aisubanka ba

¹⁸ Jisas Kraist aisubanka tânka ba naku sa: ai yaptika Meri ba Josep wal marit takaia lâ daukan kan; bara kau wal briras kan piua, Meri ba Spirit Holikira karnika mita kwihra tiwan.

¹⁹ Ai maya Josep ba waitna kasakkira kan ba mita witin Meri nina sauhkaia want apia kan; bamna witin lukan yukuwan ra sâp swiaia.

²⁰ Naha luki kan ba ra, Dawan insalka kum yaprisauhkan ra latan taki, naku win: “Josep, Debit kiamka sma ba, man Meri ba mayam briaia si bripara, ai luhpia bribia ba lika Spirit Holikira karnika wina sa bamna.

²¹ Witin luhpa waitna kum bribia, bara ai nina ba Jisas mâkma., Baku ai nina mâkbia, kan witin bui ai uplika nani ai saurka nani wina swaki sâkbia bamna.”

²² Naha sut na takan, Dawan mita ai prapitka bâk aisin ba aiska daukaia dukiara:

²³ “Tiara aihwa ba kwihra tiwbia, bamna ai luhpia waitna kum sâkbia, ai nina ba Imaniuel mâkbia” (baha tânka lika: “Gâd yawan wal sa”).

²⁴ Josep yapi ai kupia krawan ba ra, Dawan insalka win ba kat daukan, bara Meri ba ai maya brin.

²⁵ Sakuna witin nani lika wal ai maya baku briras kan, Meri ai luhpia sakan ba kat. Bara ai nina ba Jisas mâkan.