Mark 9 - DAWAN BÎLA AISKA

¹ Bara Jisas mita win: —Kasak pali mai wisna, naha uplika nani na wina, tila nani ba prubia apia, Gâd prana ba kaikbia ba kat ai karnika tara wal balbia ba.

Jisas il ra wîna tara aihka takan ba

² Yu 6 ningkara, Jisas bui Pita, Jems bara Jan kat brih, witin nani ai mânka il kum purara wan. Bahara ai wîna aihka pali takan.

³ Ai prâka lipni bara pihni pali takan; upla kum sin baku kwalka tuski baha sât pihni daukras kan.

⁴ Bamna witin nani Ilayas bara Moses wal kaikan, Jisas wal sturi aisi kan.

⁵ Bara Pita Jisas ra win: —Smasmalkra, ¡pain sa yawan nahara kaia! Kaisa yawan utla sirpi yumhpa mâkaia: Man dukiam kumi, Moses dukia kum, wala Ilayas watla.

⁶ Disaipil nani sirang iwan kan bamna, Pita witin dîa aisi ba sip kaikras kan.

⁷ Bara witin nani purara kasbrika kum bal madiskan. Kasbrika ba wina sin bîla baikra kum walan, naku aisin: “Naha sika Luhpi laitwankira; man nani bui witin ra wals.”

⁸ Witin nani tisku kir tawi kaikan, upla kum sin âpu kan, Jisas yakan witin nani wal kan.

⁹ Il ba wina iwi auya kan ba ra, Jisas adar yan diara kaikan ba upla kum ra sin wibia apia, Upla Luhpia Waitna pruan nani tila wina bubia ba kat.

¹⁰ Baha mita baha aisinka ba witin nani ai tilara man luki bri kan, sakuna pana pana ai mânka makabi wali kan, pruan nani wina buaia tânka ba dukiara.

¹¹ Bara witin nani bui Jisas ra makabi walan: —¿Dîa muni Lâ Smasmalkra nani aisisa, Ilayas pas tâura balaia sa?

¹² Witin bila: —Kasak pali sa, Ilayas pas aula, bara diara nani sut wapni daukisa. ¿Bara Ulbanka nani ra Upla Luhpia Waitna dukiara dîa wisa? Bahara wisa witin kasak pât wauhbia, bara bahki kulkan kabia.

¹³ Sakuna yang mai wisna: Ilayas pat balan sa, bara dîa dîa witin ra daukaia kan ba pat daukan, Ulbanka ra dîa takaia win ba kat.

Tuktan sirpi kum pirit saura kum bri kan ba, Jisas mita rakisa

¹⁴ Baha wina disaipil nani ra balan, bara kaikan upla ailal kutbi bri kan. Tilara Lâ Smasmalkra nani sin bâra kan, witin nani disaipil nani wal blahwi kan.

¹⁵ Bara Jisas ra kaikan, upla sut tâ iwi, ai mapara plapan ai lakula wiaia.

¹⁶ Bara Jisas mita makabi walan: —¿Dîa dukiara witin nani wal blahwisma?

¹⁷ Bara tila wina upla kum bui win: —Smasmalkra, luhpi waitna pirit saura kum brisa, ban bîlas daukan sa, bara man ra bri balri.

¹⁸ Witin ra ani anira alkbia kaka, piritka ba mita tasba kat lulki sabisa, bara ai bîla wina ukata yan takisa, ai napa sin yan arkbisa. Baku wîna ba biakisa. Disaipilkam nani ra yang pat makabri pirit saura ba kangbi sâkbia, sakuna witin nani sip sakras kan.

¹⁹ Jisas bila: —¡Upla nani sip kasak lukras sma ba! ¿Ahkia kat man nani wal kamna ki? ¿Ahkia kat kupi alki takaski brimna man nani wal? ¡Tuktika ba nahara bri bal!

²⁰ Bri balan ba ra, pirit saura ba Jisas ra kaiki, tuktika ra yan lasa prukan, bara tasba ra kauhi aikarwan, ai bîla wina sin ukata man takan.

²¹ Jisas mita tukta ba aisika ra makabi walan: —¿Ahkia wina witin ra naku takisa? Aisika bila: —Sirpi kan wina.

²² Bara aima manis, sim piritka saura mita pauta klauhan ra lulkisa, liura sin dingkisa ikaia wisi. Baku bamna, dîa daukaia sip sma kaka, yang nani ra umpira ai kaiki, hilp ai muns.

²³ Jisas bila: —Sip sna, man kasak lukisma kaka. ¡Kasak luki ba mapa ra, diara sut ba sip sa!

²⁴ Bara tuktika aisika ba karna winan: —Yang kasak lukisna. ¡Hilp ai muns kau kasak lukamna dukiara!

²⁵ Bara Jisas, upla ailal tutukwi kan kaiki, pirit saura ra lawi dauki win: —Man pirit bîlas, kiama prawra, yang adar maikisna man mahka taki was, tuktika na swis, bara kli sin witin ra bal dimpara.

²⁶ Bara piritka ba ai bîla baikra karna winan, tuktika ra kli yan lasa prukan, bara pruan baku swi si, taki wan. Ban upla nani lukan tuktika ba pruan sa.

²⁷ Sakuna Jisas tuktika mihta ra alki bukan, bara tit buan.

²⁸ Bara Jisas utla kumi ra diman ba ra, ai disaipilka nani ba tnaya ra bri si, makabi walan: —¿Dîa kan yang nani pirit saura ba sip kangbi sakras kapri?

²⁹ Witin aisin: —Naha sât lasa saura ba lika, pura sunra kira mita yan takisa.

Kli Jisas ai pruanka dukiara aisisa

³⁰ Baha wina taki, Galili tasbaika bâk luan. Bara Jisas want apia kan upla baha walbia.

³¹ Witin ai disaipilka nani ra aisi smalki kan: —Upla Luhpia Waitna ba upla mihta ra mangkan kabia, bara witin ra ikbia, sakuna yu yumhpa ningkara, pruan wina kli bubia.

³² Sakuna witin nani baha aisi ba tânka briras kan, bara makabi walaia sin sibri kan.

¿Ya kau upla tara sa?

³³ Witin nani Kapernaum tawanka ra wan, bara pat utla ra kan piua, Jisas witin nani ra makabi walan: —¿Man nani dîa dukiara yabal ra blahwi banhwi katma ba?

³⁴ Sakuna witin nani sut ai bîla prakan, kan yabal ra witin nani blahwi kan ba lika, yamna kau tara sapa dukiara.

³⁵ Bara Jisas mahka iwi, disaipil 12 ba wini, naku win: —Ya tâura kaia luki ba, lâs ba kaia sa, sut dukia dadaukra kaia sa.

³⁶ Ningkara, tukta sirpi kum brih, witin nani lilapas ra mangki, ai klahkla ra alki, naku win:

³⁷ —Ani uplika, yang nini ra luki nahmuna tuktika kum bribia kaka, yang ai brisa; bara ya yang ai bri ba, yang ra baman lika ai briras, sakuna witinka ai blikan ba ra sin brisa.

Ya uplika wan mapara apia ba, wan hilpka sa

³⁸ Bara Jan mita win: —Smasmalkra, upla kum ninam ra pirit saura kangbi kan kaikri, sakuna witin ba yang nani wal taukras mita, witin ra wîri daukbia apia.

³⁹ Sakuna Jisas bila: —Man nani bui witin ra takaskpara; kan upla kum sin yang nini ra sain tara dauki, ningkara yang maipara diara saura aisaia ba âpu sa.

⁴⁰ Ani uplika wan mapara apia ba lika, wan hilpka sa.

⁴¹ Ya ya yang nini ra luki, man nani Kraist dukia sma wisi, lî kâp kum pan maikbia kaka, kasak pali witin ai prisantka bribia.

Saurka ra kauhaia trabilka ba

⁴² “Bamna ani uplika, naha tuktika lupia yang ra luki nani na saura lâka ra batakbia kaka, kau pain kabia witin ai nana ra walpa tara kum wilki, kabu ra lulkka dimi wabia.

⁴³ Bara mihtam ba mita saura ra mai batakisa kaka, kau yamni sa klaki dakma; kan kau aitani sa raya kaia ra mihtam kumi baman brih dimaia, bara mihtam wâl brih hil pauta ra waia apia. Bahara sika pauta ami ban kabia.

⁴⁴ [Bahara sika liwa nani ba pruras sa, pauta ami ba sin ban kaia ra sip dasras.]

⁴⁵ Bara minam mita saura ra mai batakisa kaka, baha sin klaki daks; kan kau aitani sa raya kaia ra minam skahwa dimaia, bara minam wâl hil pauta ra dimaia lika apia.

⁴⁶ [Bahara sika liwa nani ba pruras sa, pauta ami ba sin ban kaia ra sip dasras.]

⁴⁷ Bara namkra sin saura ra mai batakisa kaka, daiki lulks; kan kau aitani sa Gâd king aimaki tasbaya ra namkra kumi baman brih dimaia, bara namkra wâl brih hil pauta ra mai lulkan kaia.

⁴⁸ Bahara sika liwa nani ba pruras sa, pauta ami ba sin ban kaia ra sip dasras.

⁴⁹ “Upla sut pauta ami ba ni ridi daukan kabia.

⁵⁰ Saúl ba pain sa, sakuna ai damnika tikbia kaka, ¿nahki man nani kli yamni daukma? Man nani wînam ra sâl bri bas, bara pana pana uplikam wal kupia kumi lâka ra iwi bas.