Mark 6 - DAWAN BÎLA AISKA

Jisas Nasaret ra ba

¹ Jisas baha wina taki, kli ai tasbaya ra balan, ai disaipilka nani sin witin wal.

² Ris yua balan ba ra, prias watla ra dimi, mahka smalkan. Upla ailal baha wali, tâ iwi, naku aisan: —¿Naha waitnika anira naha diara nani sut lan takan sa ki? ¿Sinska lâka tara pali bri na, sain tara sin dauki na, ya wina yan ni?

³ Kan naha lika kiamda ba sika, Meri luhpia, bara Jems, Josep, Juda, bara Saiman muihnika, bara ai lakra nani sin wan tilara takaskisa. Bara witin ra saura lukan.

⁴ Sakuna Jisas win: —Upla sut mita prapit kum ra kulkisa, sakuna ai tasbaya pali ra, ai taya nani, bara ai watla uplika nani mita lika kulkras.

⁵ Bahara Jisas sain tara sip daukras kan; siknis uplika tila nani ra lika ai mihta kahbi rakan.

⁶ Witin sin tâ iwan, witin nani kasak lukras kan bamna. Ningkara, Jisas tawan sirpi nani ra wih smalki tauki kan.

Jisas ai disaipilka nani smalkaia blikisa, Gâd king aimaki ba dahra

⁷ Bara disaipil nani 12 ba wini, baha nani ba wâl wâl ra blikan, bara pirit saura nani kangbi sakaia karnika sin yan.

⁸ Jisas adar yaban yabal ra diara kum sin brih waia apia, kîn dusa kumi baman brih waia. Sakbat, plun, lalah sin brih waia apia.

⁹ Sip kan sandal sûska dimaia, kuna prâk wala dimaia lika brih waras.

¹⁰ Bara ban sin win: —Man nani ani watla ra dimma kaka, bahara ban takaski bas pliska ba swima kat.

¹¹ Bara ani pliska ra man nani mai briras, bîlam sin walras kaka, baha wina mahka taki was tasba yuya minam ra ba siauhbi saki, baha ba witin nani mapara witnis kum kaia ba dukiara.

¹² Bara witin nani taki wih, upla nani ra smalkan ai saurka wina ai kupia lakaia.

¹³ Pirit saura nani sin ailal kangbi sakan, sikniskira ailal ra sin batana ni yuki rakan.

Jan Tatahbra pruanka ba

¹⁴ King Herod naha diara nani sut walan, kan tasba aiska ba Jisas dukiara walan kan bamna. Upla tila nani bila: “Jan Tatahbra ba pruan wina buan sa, baha mita baha karnika brisa.”

¹⁵ Wala nani bila: “Baha lika prapit Ilayas.” Wala nani bila: “Pas piua prapitka kum baku sa.”

¹⁶ Herod naha walan ba ra, naku aisin: —Naha lika Jan sika, yang lal dakbatna ba, bara nanara pruan wina kli buan sa.

¹⁷ Kan Herod mita sika Jan silak watla ra mangkaia adarka yabata ba, bara sîn ni silak watla ra wilki bri kan, Herodías pâtka mita. Herodías lika Pilip maya kan. Pilip ba Herod muihni kan, sakuna Herod mita ai muihni wina dakbi ai maya brin.

¹⁸ Bara Jan mita Herod ra param win: “Man muihkam maya briaia ba lâ apia sa.”

¹⁹ Bamna Herodías mita Jan ra misbara pali kaiki kan, ikaia sin luki kan, sakuna witin sip apia kan.

²⁰ Herod pain kaikan Jan ba waitna kasakkira bara holikira kan, baha mita witin ra sibrin luki kan; bamna Herod mita yan saura munras. Jan smalkanka ba wali, sakuna Herod dîa daukaia sapa tânka briras kan, ban sakuna pain pali wali kata.

²¹ Sakuna Herodías sans pain kum brin, baha sika king Herod ai aisubanka yua dukiara lilia tara daukaia, plun tara sin daukaia, wihta tara nani, kiaptin nani, Galili uplika tara kulkan nani ba aikuki piaia.

²² Bara Herodías lupia mairin plun tara pliska ra bal dimi dans pulan, bara Herod, upla wala nani ba sin, danska pain pali kaikan. Bamna king mita tuktika mairin ba ra win: —Dîa dîa makama ba, yang maikamna.

²³ Pramis munan witin wilin sa dîa makabia ba yabaia; ai mihta ra tasba alki bri yaba bakriki kabia sin, yabaia win.

²⁴ Bara taki muni, ai yaptika ra win: —¿Dîa makabamna ki? Bara yaptika win: —Jan Tatahbra lal ba makas.

²⁵ Bara tukta mairin ba istikira wih dimi, king ra naku win: —Yang ra naha sim minitka ra Jan Tatahbra lal ba plit kum ra mangki sal aik.

²⁶ Bara king ba kasak sari takan, sakuna witin pramis daukan bamna, upla wala nani sin baha win ba walan kan ba ra, sip dukia makabi ba apia wiras kan.

²⁷ Bara mahka king ai suldiarka kum blikan Jan lal ba brih balaia wisi.

²⁸ Suldiar ba silak watla ra wih, Jan lal dakbi plit kum ra brih balan. Suldiarka mita tukta mairin ba ra yan, bara tukta mairin ba ai yaptika ra yan.

²⁹ Jan nina blablikra nani naha walan piua ra, ai wîna tara ba bal bikaia brih wan.

Jisas bui waitna 5,000 plun dakakisa

³⁰ Baha wina apastil nani Jisas wal asla taki, dîa dîa daukan ba sut win, diara nani smalkan ba sin.

³¹ Jisas bila: —Bal. Kaisa yawan plis kum tnaya ra taki wiria ris briaia. Kan upla ailal mahka auya, bara upla ailal sin aula kan ba mita, sip plun piaia taim âpu kan.

³² Bara Jisas ai apastilka nani aikuki baman duri tara kum ra aimaki, plis kum bin âpu ra wan.

³³ Sakuna witin nani auya kan piua ra, upla ailal mita kaikan baha ba Jisas, bara tawan sut wina bahara plapan; witin nani kau waras kau baha nani pas wan ai tâura.

³⁴ Jisas duri tara wina takan piua ra, upla kwâra tara kaikan, bara sari pali lukan witin nani sîp ai sepad âpu baku kan bamna; bara mahka diara ailal smalkan.

³⁵ Pat lapta dimuya kan piua ra, ai disaipilka nani bal win: —Pat lapta dimuya, bara upla kum sin naha tasbaya ra iwras.

³⁶ Upla nani ba mahka blîks wabia bara tawan sirpi wan lamara nani ra brit atkbia, kan witin nani diara piaia âpu sa.

³⁷ Sakuna Jisas bila: —Man nani mita plun dakaks. Witin nani bila: —¿Yang nani sip sna ki brit lalah 200 atki naha nani sut dakakaia?

³⁸ Jisas bila: —¿Brit nahki brisma ki? Wih kaiks. Bara wih kaikan piua ra witin ra win: —Brit matsip bara inska sin wâl.

³⁹ Ba ningkara adar yaban upla nani ba dakni ra twi kura purara iwbia.

⁴⁰ Bara upla nani dakni ra taki iwan, tila 100, tila 50.

⁴¹ Ningkara Jisas mita brit matsip bara inska wâl ba ai mihta ra brih, kasbrika purara kaiki, yamni munan, bara brit nani ba krikan; bara ai disaipilka nani ra yan upla nani ra yabaia. Inska wâl ba sin yuan.

⁴² Sut pin ai âuyapah brin ba kat.

⁴³ Bara kau brit yuya bara inska yuya baskit 12 banhkan.

⁴⁴ Brit pin nani ba lika waitna 5,000 kata.

Jisas lî purara wapisa

⁴⁵ Naha ningkara, Jisas yaban ai disaipilka nani ba duri tara ra aimakbia, bara lakun ba baila wala ra lubia, Betsaida ra, witin kainara wabia win, witin bui upla nani ba mahka bliki kan bamna.

⁴⁶ Bara sut blikan wan piua ra, il kumi ra wan ai pura sunaia.

⁴⁷ Tihmia iwan piua ra, pat duri tara ba lakun lila kat kan, bara Jisas lika yakan sauhka ra kan.

⁴⁸ Witin kaikan baha nani sip pain kwahi kaubras kan, pâsa ba ai mapara krawi kan bamna. Bara ingwaia baila kan, Jisas lî purara wapi witin nani lamara wan, bara laihku luaia munan.

⁴⁹ Disaipil nani witin lî purara wapi kan kaikan piua ra, lilka aihka kum sa lukan, bara alai inan,

⁵⁰ kan sut kaiki sirang iwan. Sakuna witin aisi, naku win: —¡Kupiam karna bris, yang sna, si bripara!

⁵¹ Duri tara ra ulan bara pâsa ba lamni takan; bara witin nani lika kasak pali tâ iwan kan.

⁵² Kan brit sainka tara ba kau tânka pain briras kan, ai kupia nani kau karna kan bamna.

Genesaret ra sikniskira nani rakisa

⁵³ Lakun ba lui Genesaret tasbaya ra wan, bara dwarka ba lika un ra wilkan.

⁵⁴ Duri tara wina takan wal baku, upla nani pat Jisas kang kaikan.

⁵⁵ Tasbaya aiska ra wan, bara sikniskira nani krikri ra brih balan, anira walan Jisas bâra ba pliska ra.

⁵⁶ Bara anira witin diman kaka, tawan sirpi nani ra, tawan tara ra, twi nani ra sin, sikniskira nani ba tawan lila kat tniki kan, bara Jisas ra bik taki kan ai prâka tâ pan yaka kangbaia. Bara ai prâka kangban nani sut rawi kan.