Mark 5 - DAWAN BÎLA AISKA

Gerasa wina waitnika kum lasa saura bri kan ba

¹ Bara witin nani lakun un wala ra lui, Gerasa tasbaya ra wan.

² Jisas duri tara wina takan ba ra, waitna kum witin ra balan; naha waitnika lika pirit saura bri kan, bara witin raiti wina bal takan.

³ Waitnika na raiti nani ra man takaski kan, upla âpu kan witin ra wilkaia, sîn tara ni sin sip apia kan.

⁴ Aima ailal upla nani mita witin ra, mina bara mihta nani sin priskan, sakuna dakbi yuya man dauki kan, bamna upla kum sin sip alki takaskras kan.

⁵ Witin piu bani, kakna bara tihmia, ai bîla baikra tara wini tauki kan, il nani purara bara raiti nani tilara, bara ai wîna ra sin walpa ni klaki kan.

⁶ Sakuna Jisas ra laih wina kaiki, witin plapi wih, mawanra ai lula bâk krikan.

⁷ Bara ai bîla baikra tara ni wini, aisin: —¡Yang tilira dimpara, Jisas, Gâd Laih Purara iwi ba Luhpia sma ba! ¡Gâd nina mâki mai wisni, yang ra rau ai sauhkpara!

⁸ Naku aisin, kan Jisas pat naku win kan bamna: —¡Pirit saurakira, man waitnika na wina mahka taki was!

⁹ Bara Jisas makabi walan: —¿Man ninam ba dîa? Pana win: —Yang nini lika Dakni Tara, yang nani ailal sna bamna.

¹⁰ Bara pirit saura nani ba mita Jisas ra makaban baha tasbaya wina kangbi sâkbia apia.

¹¹ Il kum kan lamara kwirku ailal pih tauki kan bamna,

¹² pirit saura nani naku makaban: —Kwirku nani ra ai blîks; aikrika yang nani baha nani ra dimamna.

¹³ Jisas mita adar yan, bara pirit saura nani ba waitnika wina taki kwirku nani ra wih diman. Kwirku nani ba 2,000 bâra kan, bara albangka tara bâk lakun ra dimi sut kwapi pruan.

¹⁴ Bara kwirku main kaiki kan uplika nani ba tâ iwi, plapi tawan ra wih maisa pakan, bara tawan sirpi nani ra sin. Upla nani sin balan diara takan ba kaikaia.

¹⁵ Jisas bâra kan ba kat balan ba ra, kaikan waitna pirit saura nani bri kata ba ai kwalka dimi iwi kan, ai sinska sin pain bri kan; bara witin nani sirang iwan.

¹⁶ Kaikan uplika nani mita bisiura balan uplika nani ra maisa pakan, dîa waitnika lasa bri kan ra takan tânka ba, bara kwirku nani ra takan ba sin.

¹⁷ Bara mahka sut mita Jisas ra makaban, ai tasbaya ba wina mahka taki wabia.

¹⁸ Jisas duri tara ra aimakan ba ra, pirit saura bri kan kangbi sakan kata waitnika mita witin ra makaban brih wabia.

¹⁹ Sakuna Jisas adar yaras witin wal waia, bamna ban win: —Mahka wamtla ra was tamya nani ra, bara dîa Dawan bui man ra mai daukan ba witin nani ra wis, nahki man ra umpira mai kaikan ba sin.

²⁰ Waitnika kata ba wan, bara 10 tawan nani ra (Decápolis) aisi taukan diara Jisas witin ra daukan ba; bara upla sut tâ iwi kan.

Jairus luhpia mairin, bara Jisas prâka kangban mairka ba

²¹ Jisas duri tara ra aimaki kli lakun baila wala ra wan ba ra, upla manis ai lamara balan, witin lika lakun un ra takaskan.

²² Bara prias watla wihtka kum nina Jairus mâki kan ba, witin ra balan; Jisas ra kaiki, ai mina ra kauhi,

²³ makaban: —Luhpi mairin pat pruisa, bamna bal mihtam purara kahs, bara rawbia.

²⁴ Jisas witin wal wan, sakuna upla ailal ai nina bliki kan, ban sin ailal tutukwi kan.

²⁵ Upla nani ba tilara mairin sikniskira kum kan. Witin tala plapi sikniska bri kan pat 12 mani.

²⁶ Mani ailal pât wahwan daktar ailal mihta ra, bara dîa witin bri kan ba sut tikan bahki ra baman, sakuna kau mâyara iwi kan.

²⁷ Jisas dukiara sturi walan ba ra, naha mairka ninak lamara balan, upla tilak bara prâka ra kangban.

²⁸ Kan luki kan: “Prâka ra pan kangbamna baman, yang pat rawamna.”

²⁹ Baha sim piua ra ai tâlia plapi kata ba takaskan, bara witin ai dara walan ai trabilka ba wina rawan kan.

³⁰ Bara Jisas ai dahra walan ai karnika witin wina takan ba. Bara ai ninara tawi, upla nani tilara kaiki, makabi walan: —¿Ya yang na prâika ra kangban?

³¹ Bara ai disaipilka nani mita win: —Man diara sut kaikisma nahki upla nani tutukwi mai bri ba, bara kau makabi walisma ‘¿ya bui ai kangban?’

³² Sakuna Jisas tawi kir kaiki kan upla nani ra, ya mita witin ra kangban sapa kaikaia.

³³ Bara mairka ba sirang iwi tatatwi kan diara witin ra takan ba kaiki, bara wih ai mawanra ai lula kriki, ai tânka ba sut win.

³⁴ Bara Jisas mita win: —Luhpi mairin, kasak lukram bamna, rawram sa. Kupiam kumi was, bara sikniskam wina rawram sa.

³⁵ Kau Jisas aisi kan, Ju nani priaska watla wihtka watla wina upla bal, tuktika mairin aisika ra naku maisa pakan: —Luhpiam mairin ba pat pruan. ¿Bara dîa muni kau Smasmalkra ra trabil munisma ki?

³⁶ Sakuna Jisas baha aisi kan ba walras baku si, priaska watla wihta ra win: —Si bripara; kasak luki bas.

³⁷ Bara upla wala lika kau yan ai yula kahbras, Pita, Jems bara muihnika Jan ba baman.

³⁸ Bara priaska watla wihtka ba watla ra wan ba ra, bin tara aihka baman kaikan, upla nani sin ini ai bîla baikra tara wini kan.

³⁹ Dimi, witin nani ra naku win: —¿Dîa kan baku bin dauki, inisma ki? Tukta mairin na pruras sa; witin yapisa.

⁴⁰ Sakuna witin nani ai lawaska kikan, bara Jisas baha nani sut latara yan takan, bara aisika, yaptika, upla ai yula kahban nani ba kat aikuki, tukta mairin bâra kan ba ra wih diman.

⁴¹ Witin mihta ra alki, naku win: —Talitá, cum (baha tânka ba lika: “Tukta mairin, man ra mai wisna, buram”).

⁴² Baha kat tuktika mairin kata ba buan, bara mahka wapi taukan. Witin 12 mani bri kan. Upla sut tâ pali iwan.

⁴³ Sakuna Jisas karna smalki win, upla ra baha aisabia apia, bara tukta mairin ra plun yabia win.