Mark 4 - DAWAN BÎLA AISKA

Insla mamangkra maprika ba

¹ Jisas kli lakun un ra smalkan ba ra, upla ailal bal ai lamara asla takan. Ailal pali kan bamna, Jisas lakun ra duri kum bâra kan ra aimaki iwan, bara uplika nani sut lika un ra takaskan.

² Bara diara ailal maprika tânka ni smalkan. Ai smalkanka ra naku aisi kan:

³ “Man nani naha na wals: Insla mamangkra kum mangkaia taki wan.

⁴ Bara mangki kan ba, tila nani yabal tnaya ra kauhan, bara tnawira nani bal sut pin.

⁵ Tila ba tasba walpakira tilara kauhan; baha nani ba isti baiwi takan, tasbaya ba tihu apia kan bamna;

⁶ lapta takan ba ra, ami luan; plamaya aitani apia kan bamna, srawi luan.

⁷ Mâ tila nani kiaya tilara kauhan, bara kiaya nani ba mita pâwi blaki ikan, baha mita sip mâ briras kan.

⁸ Sakuna tila tasba yamni ra kauhan, bara mâ nani ba baiwi pâwan, mâ ailal sin sakan; mâ kum wina 30 sakan, wala 60 bara yumhpika 100 sakan.”

⁹ Bara Jisas kau aisin: “Ya ai kiama bri kaka, aman walaia sa.”

Dîa kan maprika lilka nani yus muni ba

¹⁰ Bara baha ningkara Jisas yakan takaskan, upla nani ai disaipilka 12 wal kan ba mita makabi walan, naha maprika lilka na dîa tânka sapa.

¹¹ Bara Jisas win: “Man nani ra lika Gâd king aimaki ba lâka dahra yukukan nani ba param mamrikan sa; sakuna latara uplika nani ra lika maprika lilka ni smalkan sa;

¹² ai nakra ni kaikbia, sakuna kaikras baku kabia, walbia sakuna sip tânka briras kabia, ai kupia nani lakbia apia, ai saurka nani sin swih tikras kabia.”

Mamangkra maprika tânka ba, Jisas smalkisa

¹³ Naku sin win: “¿Man nani naha maprika tânka na briras sma ki? Ban kaka, ¿man nani nahki maprika lilka wala nani ba tânka brima ki?

¹⁴ Saumuk mangki uplika ba lika sturi yamni smalki uplika ba baku sa.

¹⁵ Upla tila lika ban saumuk nani yabal ra kauhan ba wal baku sa: witin nani sturi yamni ba walisa, sakuna walan ningkara, Sitan bal sturi yamni ai kupia ra mangkan kata ba sakisa.

¹⁶ Upla wala nani lika sim tasba walpakira purara mangkan kata ba wal baku sa; witin nani sturi yamni ba wali ai kupia liliakira brisa,

¹⁷ sakuna ai wakia nani ba aitani kat briras bamna, aihwa sip takaskras; bara trabil tara brisa, sturi yamni ba dukiara rausauhkanka aula ba ra, witin nani ba batakan sa.

¹⁸ Wala nani sin kiaya nani tilara mangkan ba wal baku sa: witin nani sturi yamni ba walisa,

¹⁹ sakuna naha tasba dukia nani ra lukan man, tasba yuyaka bahki mita kunin sin munisa, bara diara sât sât nani ba brin dauki, nina blikisa. Naha sut ai kupia ra dimi, sturi yamni ba blaki ikisa, bara naha nani sip yan mâ briras.

²⁰ Sakuna upla wala nani sturi yamni ba wali ai kupia ra dingki brisa, bara mâ sin pain sakisa, tasba pain ra kauhan kata ba wal baku. Tila nani lika mâ kum wina 30 saki ba baku, wala nani 60 sakan ba, bara 100 sakan ba wal baku sa.”

Lamp maprika lilka ba

²¹ Naku sin win: “¿Upla kum lamp kum brih baks tara kum munhtara, apia kaka, krikri munhtara mangkisa ki? Apia pali. Lamp ba lika purara sunaia sa, ingni yabia dukiara.

²² Baku natka ra sin, diara yukukan ra âpu sa, param ra sakras kabia ba, dahra sin yukukan ba param ra lakras kabia apia.

²³ Man nani kiamam brisma ba, wali bas.”

²⁴ Naku sin witin win: “Aman kaiks man nani dîa walisma ba. Man nani dîa kulkaika ni kulkisma ba, baha ni sika Gâd mita mai kulkbia; bara kau pura praki maikbia.

²⁵ Bamna ya diara bri ba, kau yaban kabia, sakuna ya diara âpu ba lika, diara wiria bri ba sin witin wina dakbi sakan kabia.”

Saumuk tasba ra pâwi ba maprika lilka

²⁶ Jisas naha sin aisan: “Gâd king aimaki lâka ba, sim waitna kum tasba ra saumuk mangki ba baku sa,

²⁷ bara mahka yapuya, bara naika kli buya, bara yu ailal luya, tihmia sin luya; mâ ba lika baiwi pâwisa, sakuna witin kaikras nahki pâwisa sapa.

²⁸ Kan tasba ba yakan mâ sakisa; pas dusa sirpi ba takbia, ba wina mâ briaia wahia ba, ningkara mâ ailal takisa,

²⁹ bara mâ pat tilwan ba ra, upla nani krikaia auya, dâkaia piua ba pat aimakan sa bamna.”

Mostard mâ maprika lilka ba

³⁰ Jisas naku sin win: “¿Gâd king aimaki ba lâka, dîa wal baku sa lukisma, apia kaka, yawan ani maprika wal prakaia sip sa?

³¹ Baha lika mostard mâ tasba ra mangki ba baku sa. Dus mâ nani tasba ra ba wal, naha na kau mâ sirpi sa,

³² sakuna mangkan bara pâwuya ba ra, dus mâ nani sut purkara kau tara takisa, ai tnawa nani tara brisa, bara bahara daiwan tnawira nani ba ai watla mâkisa baha distika munhtara.”

Jisas maprika lilka nahki aisin ba

³³ Sturi yamni ba Jisas naku smalki kan: maprika lilka ni, witin nani tânka briaia sip ba kat.

³⁴ Maprika lilka âpu ni Jisas diara kum sin smalkras kan, sakuna ai disaipilka nani ra sut tânka ba smalkan.

Jisas bui pâsa rip wal lamni daukisa

³⁵ Baha sim yua pat tihmia iwan kan, ai disaipilka nani ra win: —Kaisa yawan lakun baila wala ra luaia.

³⁶ Upla nani sut ba swi si, Jisas ba duri ra aimaki ridi kan bamna, brih wan kan. Duri tara wala nani sin witin wal auya kan.

³⁷ Bara pâsa tara kum krawan, rip nani ba duri bilara dimi kan, bara duri tara ba pat banhki taki kan.

³⁸ Jisas lika duri tara tnata ra yapi kan lal kahbaika kum ra, bara tatukbi buki Jisas ra win: —¡Smasmalkra! ¿Kupiam lukras sma ki yawan pat rungwi na?

³⁹ Bara Jisas bui pâsa ra lawi dauki, kabu ra sin win: —¡Sâp bas! ¡Mahka lamni taks! Bara pâsa ba sâp takan, witin nani sin âuyapah takan.

⁴⁰ Bara Jisas ai disaipilka nani ra win: —¿Dîa kan man nani ban si brisma ki? ¿Nahki kan kasak lukan lâka man nani âpu sma?

⁴¹ Witin nani tâ iwan, bara pana pana aisi kan: —¿Naha na dîa sât uplika kan ki, pâsa bara kabu sut ai bîla wali na?