Mark 3 - DAWAN BÎLA AISKA

Waitna mihta lâwan ba

¹ Jisas kli Ju nani priaska watla kum ra diman. Bahara mihta lâwan waitnika kum kan.

² Bara upla nani Jisas ra aihwaki kaiki kan ris yua ra upla rakbia sapa, bara baku dahra sakaia sip kaia.

³ Bara Jisas bila mihta lâwan waitnika ra: —Bal lila na kat bus.

⁴ Ningkara, Jisas bui upla wala nani ra makabi walan: —¿Lâ ba dîa wan wisa ris yua ra daukaia: hilp yaia, apia kaka saura munaia? ¿Rayaka swaki sakaia, apia kaka sauhki tikaia? Sakuna witin nani diara kumi sin aisaras.

⁵ Bara Jisas lawi pali kir kaikan, sakuna sari pali sin takan, witin nani tânka briaia briras kan bamna. Bara skahwa waitna ra win: —Mihtam ba sakbram. Bara sakban, ai mihta ba pain takan.

⁶ Bara parisi nani taki, Herod uplika nani wal ai lâka daukan Jisas ra ikaia.

Upla ailal lakun un ra sa

⁷ Sakuna Jisas ai disaipilka nani aikuki lakun un ra wan, bara Galili wina upla ailal ai nina blikan.

⁸ Jisas sain tara nani daukan ba wali upla ailal aidrubi balan, Judia wina, Jerusalem wina, Edom wina, Jordan awala lalma wina, Tiro bara Sidón kuntrika wina sin sut.

⁹ Baha mita Jisas ai disaipilka nani ra win, duri kum ridi bri kabia, upla nani tutukwi platukbiara sîa.

¹⁰ Kan upla ailal rakan ba mita, sikniskira nani ba pana pana tukbi kan ai lamara wih kangbaia dukiara.

¹¹ Bara pirit saura bri kan uplika nani, Jisas ra kaiki ba ra, witin mawanra ai lula kriki, naku ai bîla baikra tara wini kan: —Man sika Gâd Luhpia ba.

¹² Sakuna Jisas karna adar yaban upla ra aisabia apia witin ba ya sapa.

Jisas apastil 12 bâk sakisa

¹³ Baha ningkara, Jisas il kum purara uli wan, bahara witin ya briaia kan uplika nani ba wahbi sakan, bara baha nani witin ra balan.

¹⁴ Witin 12 ba wahbi saki, apastil nina mâki win: —Man nani ba mai sakri, yang wal kaia dukiara bara mai blikisna sturi yamni ba smalkaia.

¹⁵ Bara witin nani ra karnika yan, pirit saura nani kangbi sakaia.

¹⁶ Naha nani sika 12 nani ba: Saiman, ai nina wala Pita mâkan ba;

¹⁷ Jems ai muihni Jan wal, Sebedi luhpia nani ba, (Jisas mita Boanerges mâkan ba, baha tânka lika “Alwani luhpia nani”);

¹⁸ bara Andru, Pilip, Bartolomiu, Matiu, Tamas, Jems Alfeo luhpia, Tadeo, Saiman Kena wina ba,

¹⁹ bara Judas Iskariot ba, ningkara witinka Jisas wailhka nani mihta ra mangkan ba.

Jisas Sitan karnika brisa wisi dahra sakisa

²⁰ Bara ningkara Jisas utla kumi ra diman. Bara kli upla ailal pali asla takan, witin nani plun sin piaia sip apia kan ai disaipil aikuki.

²¹ Jisas taika nani naha kaikan, witin ra brih waia balan, kan upla nani aisi kan Jisas ba lal saura takan sa.

²² Lâ Smasmalkra nani Jerusalem wina balan ba sin aisin: “Naha waitnika Bilsibub brisa, pirit saura nani wihtka ba, bara witin karnika mita sika pirit saura nani kangbi saki ba.”

²³ Jisas bui upla nani ra paiwan, bara sturi kum sturi wala wal praki smalkan: “¿Nahki Sitan mita Sitan ra kangbi sâkbia ki?

²⁴ Kuntri kum baiwi dakni ailal takbia kaka, bara pana pana aiklabia kaka, baha kuntrika ba sip karna kabia apia.

²⁵ Utla uplika kum unsabi dakwi takisa kaka, baha watla ba sip pain kabia apia.

²⁶ Bamna Sitan ba sin tar baiwi takisa kaka, witin sip ban kabia apia, bara naha na lika ai piua tnata kabia.

²⁷ “Upla kum sip apia waitna karna kum watla ra dimi, dukia nani dakbi briaia. Witinka ba pas priski muni lika dukia nani dakbaia sip sa.

²⁸ “Kasak pali man nani ra mai wisna: Upla nani saurka ba ban swih tikan kabia, ai bîla ni diara saura aisabia ba sin,

²⁹ sakuna ya Spirit Holikira mapara bîla saura nani aisabia kaka, witin pâtka ba sip swih tikan kabia apia, ban kaia ra pâtkira pali kabia.”

³⁰ Jisas baku aisin, witin ba pirit saura brisa wisi baha nani mita aisin bamna.

Jisas yaptika bara muihnika nani ba

³¹ Ningkara, Jisas yaptika bara muihnika nani sin balan, sakuna latara kat takaski, paiwan balbia.

³² Bara Jisas lamara iwi kan nani ba mita win: —Yaptikam, muihkam nani kira latara sa, bara mai plikisa.

³³ Sakuna witin aisin: —¿Yamna yang yaptiki bara muihki nani ba?

³⁴ Bara ai lamara iwi kan nani ba ra tawi kaiki, naku aisin: —Naha nani sika yaptiki bara muihki nani ba.

³⁵ Ya ya Gâd brinka ba kat dauki ba, baha sika yang muihki, laikra bara yaptiki.