Mark 2 - DAWAN BÎLA AISKA

Jisas bui wakia lâwan waitnika kum saurka ban swih tiki bara rakisa

¹ Yu kum kum luan ningkara, Jisas kli Kapernaum tawanka ra diman; upla nani sin walan witin utla ra sa.

² Tisku kan, pat upla ailal asla takan, dur lama ba sin tutukwa pali kan. Jisas mita Gâd sturka yamni ba aisi smalkan.

³ Bara waitna walhwal mita waitna kum twilki brih balan, witin wakia lâwan sikniska bri kan bamna.

⁴ Upla ailal kan bamna, sip Jisas lamara waras, bara utla bahna ba pîs kum saki, baha krikanka bâk sikniskira ba krikri lupia kum ra mangki alahban.

⁵ Jisas mita upla nani kasak pali lukanka ba kaiki, sikniskira ba ra win: —Luhpi, man saurkam nani ba sut swih tikan sa.

⁶ Sakuna Lâ Smasmalkra nani bahara iwi kan ba, naku lukan:

⁷ “¿Waitnika na dîa kan baku aisisa ki? Witin lika Gâd mapara aisisa, kan Gâd baman upla saurka nani swih tikaia sip sa.”

⁸ Sakuna Jisas pat kaikan baha nani ai kupia ra luki kan ba, bara makabi walan: —¿Man nani dîa kan baku lukisma ki?

⁹ ¿Dîa ba kau swapni sa, wakia lâwan ra wiaia: ‘Saurkam nani ba ban swin tikan sa’, apia kaka witin ra wiaia: ‘Bus, krikrikam ba brih bara waps’?

¹⁰ Yang bui man nani ra param mamrikamna Upla Luhpia Waitna ba tasba ra karnika brisa, saurka nani ba ban swih tikaia. Bara wakia lâwan waitnika ra win:

¹¹ —Yang bui man ra mai wisni, bus, krikrikam ba brih, wamtla ra mahka was.

¹² Baha siknis kata ba mahka buan, ai krikrika ba brih, baha wina mahka taki wan upla sut mawanku. Naha mita upla sut tâ iwi, Gâd ra mayunan, naku wisi: —Yang nani kau naku pali diara kum kaikras.

Jisas mita Libai ra winisa

¹³ Jisas kli lakun un ra wan. Upla sut ai lamara balan ba ra, witin aisi smalkan.

¹⁴ Jisas lui auya kan ba ra, Libai Alfeo luhpia waitna ba kaikan, Rom ra blikaia lal mana saki ba watla ra iwi kan, bara Jisas mita win: —Nini blîks. Bara Libai mita mahka ai nina blikan.

¹⁵ Jisas Libai watla ra plun pi kan, lal mana saki uplika nani, upla saurakira nani sin ai tibilka ra pi kan, Jisas ai disaipilka nani wal lamara, manis ai nina bliki kan bamna.

¹⁶ Sakuna Lâ Smasmalkra nani, parisi nani sin kaikan Jisas baha nani wal plun pi kan, bara disaipil nani ra makabi walan: —¿Nahki kan smasmalkrikam ba lal mana saki nani, upla saurakira nani wal sin iwi plun pîsa?

¹⁷ Jisas naha wali, witin nani ra win: —Upla wîna dutki nani ba lika, daktar briaia apia sa, sikniskira nani ba lika. Yang lika upla kasakkira nani paiwaia balras, upla saurakira nani ra lika.

Plun wahwi dukiara Jisas ra makabi walan ba

¹⁸ Aima kum, Jan disaipilka nani, parisi nina blablikra nani sin plun wahwi kan, upla tila nani bal Jisas ra makabi walan: —¿Dîa kan Jan disaipilka nani bara parisi nina blablikra nani plun wahwisa, sakuna man disaipilkam nani lika baku daukras?

¹⁹ Jisas pana win: —Marit pata ra upla nani ba, marit takan waitnika ba witin nani wal sa kaka, ¿aitani kabia ki baha nani plun wahwaia? Marit takan waitnika ba kau ai tilara sa kaka, witin nani sip plun wauhbia apia.

²⁰ Sakuna piu kum balbia ba ra, marit waitna ba witin nani wina sakan kabia. Ba kat lika witin nani plun wauhbia.

²¹ “Upla kumi sin prâk raya ra kwala almuk praki sipras, kan raya ba mita almuk ba aubi kalkisa, bara kalwanka kata ba kau tara takisa.

²² Upla kumi sin wain raya ba daiwan taya batilka almuk ra laikras, kan wain raya ba mita daiwra taya batilka ba sauhkisa, bara wain kata ba daiwra taya wâlsut tiwisa. Baha mita wain raya ba daiwan taya raya ra laikaia sa.

Disaipil nani ba ris yua ra plawar mâ wahbisa

²³ Ris yua kum ra, Jisas insla mangkan tilak wapi kan, ai disaipilka nani plawar mâ wahbi auya kan,

²⁴ bara parisi nani Jisas ra makabi walan: —Kaiks, ¿dîa muni disaipilkam nani ris yua ra wark daukaia apia ba, daukisa ki?

²⁵ Sakuna Jisas bila: —¿Man nani kau Debit sturka ba aisi kaikras ki, witin ai suliarka nani wal plun âpu kan, plun pali sin dauki kan ba?

²⁶ Debit Gâd watla ra diman, Abiatar prîs nani wihtka kan ba piua ra, bara brit holikira nani pin. Naha britka nani prîs nani wihtka baman piaia sip kan, sakuna Debit pih ai uplika nani ra sin yaban pin.

²⁷ Jisas naku sin win: —Ris yua ba upla dukiara daukan sa, sakuna upla ba ris yua dukiara lika apia.

²⁸ Baha mita, Upla Luhpia Waitna ba, ris yua purara sin karnika brisa.