Mark 15 - DAWAN BÎLA AISKA

Jisas Pailat mawanra

¹ Bara yu baiwan ra, prîs wihtka nani asla prawan, wihta almuk nani, Lâ Smasmalkra nani, lâ wihtka nani sut ba kira. Bamna witin nani bui Jisas ba priski bri si, Pailat mihta ra mangkan.

² Pailat witin ra makabi walan: —¿Man ba Ju nani Kingka sma ki? Bara pana win: —Âu, man aisaram ba kat.

³ Prîs wihtka nani diara ailal dukiara dahra saki kan.

⁴ Bara Pailat kli witin ra makabi walan: —¿Man pana diara aisaras ki? ¡Kaiks nahki diara ailal dukiara damhra saki na!

⁵ Sakuna Jisas pana diara aisaras kan; bamna Pailat dîa lukaia sapa kaikras kan.

Jisas ba prura mihta ra mangkan sa

⁶ Pailat ai lâka kum bri kan: baha lilia yua nani ra silak uplika kum upla nani ra lanhki yabaia, ani witin nani makabia ba.

⁷ Silak watla waitna kum kan, ai nina Barabas; witin lika upla wala nani aikuki wihta nani mapara war buki, upla ailal ikan.

⁸ Upla nani Pailat ra bal makaban, ai lâka kan ba baku daukbia wisi.

⁹ Bara Pailat witin nani ra win: —¿Man nani want sma ki Ju nani Kingka ba pri saki maikamna?

¹⁰ Bamna Pailat kaikan, prîs wihtka nani mita tuman lâka mita Jisas ba ai mihta ra mangkan.

¹¹ Sakuna prîs wihtka nani mita upla nani ra kupia turbi, maisa kapi, win, Barabas ba pri sakaia makabaia.

¹² Bara Pailat witin nani ra makabi walan: —¿Bamna man nani Ju nani Kingka mâkisma ba, dîa munamna want sma ki?

¹³ Witin nani ai bîla baikra tara wini, aisin: —¡Witin ba dus prihni ra sas!

¹⁴ Bara Pailat witin nani ra win: —¿Bamna witin dîa saura daukan ki? Sakuna witin nani kli ai bîla baikra tara winan: —¡Witin ba dus prihni ra sas!

¹⁵ Bamna Pailat mita upla nani ba wal pain kaia dukiara, Barabas ba pri sakan; bara Jisas lika klala ni wipaia blikan, ningkara yan dus ra sabaia.

¹⁶ Bara suldiar nani, Jisas ba wihta tara ba watla latara bri si, suldiar daknika aiska ba asla winan.

¹⁷ Witin ra kwala mapla siksa talia kum dingkan, bara kraun kum kiaya ni pitbi lal ra mangkan.

¹⁸ Bara mahka witin nani bui Jisas ra wini, win: —¡Ju nani Kingka ba ban raya kabia!

¹⁹ Bara dus kum ni ai lal ra prukan, yabalaya tuhban, ai lula sin kriki ai pura suni mayuni kan.

²⁰ Baku ai lawaska kiki muni, kwala mapla siksa talia ba daiki si, ai kwalka dingkan. Bara mahka saki brih wan, dus prihni ra sabaia.

Dus prihni ra saban ba

²¹ Cirene wina waitna kum nina Saiman, Alejandro bara Rufo wal aisika, insla wina aula kan; bara bâk luan, taibi munan Jisas dusa prihni ba twilkaia.

²² Bara witin nani bui Jisas ba plis kum ra brih wan, nina Golgota wi ba ra (baha tânka lika: “Wan Lalkamhka Pliska”).

²³ Bara wain, sîka mahka tahpla wal mangki witin ra yan, sakuna baha sip diras kan.

²⁴ Baha ningkara dus prihni ra saban. Suldiar nani ba mita Jisas kwalka ba yui briaia wisi, dais pulan, witin nani kumi bani dîa briaia sapa kaikaia.

²⁵ Titan 9 aklak, witin nani bui Jisas ba dus ra saban.

²⁶ Witin nani mita dîa tâwan Jisas ra iki kan ba dukiara, naku ulban: “Ju nani Kingka.”

²⁷ Âimplikra wâl sin witin wal sabi banhwan, kumi ai aihkika ra, wala ai smihka ra.

²⁸ [Baku sika Ulbanka ba aimakan, bara naku win ba: “Witin ba watawikira nani tilara kulkan sa.”]

²⁹ Bara ai lamak lui nani ba witin ra swira daukan, ai lal sin wauhi, naku aisin: —¡Alai, man tempel batakisma bara yu yumhpa ra kli bapisma ba,

³⁰ wînam ra swaki sâks, bara dus prihni ba wina bal iws!

³¹ Baku sin prîs wihtka nani, bara Lâ Smasmalkra nani sin ai lawaska kikan, bara pana pana aisi kan: —Witin bui upla wala nani ra swaki sakan, sakuna witin ai wîna ra lika sip swaki sakras.

³² Misaya Israel Kingka ba, witin dus prihni wina bal iwbia kaka, yang nani lika witin ra kasak lukamna. Bamna Jisas wal dus prihni ra saban nani ba sin ai swira daukan.

Jisas pruanka

³³ Yu 12 aklak aimakan ba ra, tasba aiska tihmia tara takan, baha ba tutni 3 aklak kat.

³⁴ Bara baha sim awarka ra, Jisas ai tâ baiki ai bîla baikra karna winan: “Eloí, Eloí, ¿lemá sabactani?” (Baha tânka lika: “Yang Gâdki, yang Gâdki, ¿dîa kan lulki ai swiram ki?”)

³⁵ Tila nani bâra kan ba naha walan, bara naku aisin: —¿Man nani walisma ki? Witin prapit Ilayas winisa.

³⁶ Baha nani wina kum plapan, bara wahmuk kum ra wain swahwan buski, yauhrus dusa kum ra mangki yan dibia wisi. Naku sin win: —Swis bara kaiki kap, Ilayas bal dus prihni wina alahbia sapa.

³⁷ Bamna Jisas ai bîla baikra karna kum wini si, pruan.

³⁸ Tempel kwalka paman kan ba, wâl lilak kalwan, pura wina mâya kat.

³⁹ Rom kiaptinka kum Jisas mawan tani ra bûi kan ba kaikan bara walan, nahki Jisas ai bîla baikra tara wini si, pruan ba. Bamna witin bila: —Kasak pali, naha waitnika na Gâd Luhpia kan.

⁴⁰ Tila mairin nani sin bâra kan ba, laih wina bûi kaiki kata; witin nani tilara Meri Magdalin, Meri Jems sirpi Josep wal yaptika, bara Salomé sin.

⁴¹ Naha mairka nani ba Jisas nina bliki kan, hilp sin munan, witin kau Galili ra tauki kan ba ra. Mairin wala nani ailal sin bâra kan, witin nani lika Jisas wal Jerusalem ra balan kan ba.

Jisas ba bikan sa

⁴² Pat tutni pali kan ba ra, diara sin ridi daukan kata ris yua kainara,

⁴³ Josep Arimatea tawanka wina kan ba balan, witin lika lâ wihtka kum kan. Witin sin Gâd king aimaki ba lâka bîla kaiki kan, bara ai kupia karna brih Pailat ra wih, Jisas wîna tara ba makaban.

⁴⁴ Pailat tâ iwan pat pruan ba dukiara, bara ai kiaptinka ra winan, pat pruan sapa makabi walaia.

⁴⁵ Kiaptin ba âu win ba ra, Pailat mita Josep ra Jisas wîna tara ba yan.

⁴⁶ Josep mita kwalyapa pain kum atkan, bara Jisas wîna tara ba alahbi, bahara blakan. Ningkara, walpa raiti kum param ba ra bri si tnikan, bara raiti durka ba walpa kum ni prakan.

⁴⁷ Meri Magdalin bara Meri Josep yaptika sin anira bikan ba kaiki kan.