Mark 14 - DAWAN BÎLA AISKA

Jisas ra priskaia trai munan ba

¹ Kau yu wâl ba ra, Insal luan Yua Liliaka, brit îs mangkras piaia yua ba sin kata. Bara prîs wihtka nani, Lâ Smasmalkra nani aikuki, Jisas ra kunin muni alki ikaia pliki kan.

² Sakuna witin nani bila: —Lilia tara yua ra lika apia, upla nani bin daukbiara sîa.

Mairin kum Jisas ra batana laikisa

³ Jisas Betania ra, Saiman liparkira kata watla ra kan. Witin tibil ra iwi kan ba ra, mairin kum walpa ni daukan batilka kum, tangni, batana laya kîa painkira banhki brih, bahara balan. Bara batilka ba baiki, batanka laya ba Jisas lal ra laikan.

⁴ Upla tila nani bâra kan ba ai kupia baiki, pana pana naku aisin: —¿Dîa kan naha batana kîa painkira na bahki tikisa ki?

⁵ Sip kan lalah mâ 300 pura mana atki, baha ni umpira nani ra hilp munaia. Bara mairka ba mapara ai kupia baiki banhwan.

⁶ Sakuna Jisas bila: —¡Mairin ba swis! ¿Dîa kan man nani bui witin ra trabil munisma? Yang ra naha ai dauki na diara yamni sa.

⁷ Umpira nani ba piua bani tilamra ban bri kama, bara ani ani yua ra yamni munaia lukma ba, sip kama daukaia; sakuna yang lika ban tilamra ai bri kama apia.

⁸ Naha mairka dîa daukaia sip kan ba kat daukan; kau wina, wîni tara na batana kîa ni yukan, tasba ra ai bikaia dukiara.

⁹ Kasak pali mai wisni: Ani anira sturi yamni aisi smalkbia ba, tasba aiska ra naha mairka daukan na sin aisabia, witin dukiara ai kupia krauki kaia ba mata.

Judas mita Jisas waihla mihta ra mangkan ba

¹⁰ Disaipil 12 ba tila wina kumi, nina Judas Iskariot ba, witin lika prîs wihta nani aikuki aisaia wan, baha nani wal lâ kum dauki muni Jisas ba ai mihta ra mangkaia dukiara.

¹¹ Witin nani baha wali, ai lilia takan, lalah yabaia sin pramis munan. Bara Judas mahka Jisas ba witin nani mihta ra mangkaia plikan.

Jisas tutni pata pin ba

¹² Insal luan Liliaka yua pas ba, brit îs âpu kira pi kan, sakripais sîpka ba sin baha yua iki kan ba ra, disaipil nani Jisas ra makabi walan: —¿Anira want sma Insal luan Yua Liliaka pata ba piaia, yang nani wih ridi daukamna?

¹³ Jisas ai disaipilka wâl saki blikan wan, bara witin baha nani ra win: —Man nani tawan ra was, bara waitna kum kaikma witin lî watla kum brih auya. Baha nina blîks,

¹⁴ bara anira dimbia kaka, watla dawanka ba ra wis: ‘Smasmalkra bila: ¿Disaipilki nani aikuki Insal luan Yua Liliaka pata piaia sna rumka ba anira sa?’

¹⁵ Bara witin bui man nani ra purara rum tara kum pat ridi daukan mamrikbia; bahara yawan dukia ridi dauks.

¹⁶ Disaipil nani ba taki tawan ra wan, bara dîa Jisas win ba kat sakan, bara witin nani Insal luan Yua Liliaka pata ba ridi daukan.

¹⁷ Pat yu tutni kan, Jisas ai disaipilka 12 ba kira wan.

¹⁸ Bara tibil ra iwi pi kan ba ra, Jisas witin nani ra win: —Kasak pali mai wisna: Man nani tilam wina kum, yang wal plun pi ba mita waihli mihta ra ai mangkbia.

¹⁹ Bara sut sari takan, witin ra pana pana makabi walan: —¿Baha ba yang sna ki? Wala bila: —¿Baha ba yang sna ki?

²⁰ Bara Jisas pana witin nani ra win: —12 na tila wina kum sa, yang wal sim plitka ra brit buski pi ba.

²¹ Bamna Upla Luhpia Waitna ba, Ulbanka nani aisi ba yabalka bâk auya, ¡sakuna witin ra waihla mihta ra mangki waitnika ba mapara saura pali kabia! ¡Kau pain kaia kan witin ba aisubi takras kata!

²² Witin nani pi kan ba ra, Jisas brit ai mihta ra brih, tingki win; bara kriki, witin nani ra yabi, naku win: —Man nani pis, naha na yang wîni tara sa bamna.

²³ Ningkara, witin kâp kum brih, Gâd ra tingki wisi, witin nani ra yan, bara sut baha kapka wina din.

²⁴ Bara witin nani ra win: —Naha na yang tâilia sa, lâ daukan ba, bara upla ailal dukiara laikan sa.

²⁵ Kasak pali mai wisni: Yang kli naha wain dusa mâ wina dimna apia, wain raya Gâd kingka tasbaya ra dimna ba kat.

Jisas bui Pita ra wisa, witin ra kaikras wibia

²⁶ Lawana nani aiwani luan ba ningkara, witin nani Olivet ilka ra wan.

²⁷ Bara Jisas witin nani ra win: —Naha tihmia man nani sut ai swi si plapma, ulban ba baku: ‘Sepad ba ikamna, bara sîpka nani aihka aihka, yakaban kabia.’

²⁸ Sakuna yang pruan wina buamna ba ra, kainamra Galili ra wamna.

²⁹ Bara Pita Jisas ra win: —Upla sut baku daukbia kaka, yang lika sip mai swimna apia.

³⁰ Sakuna Jisas Pita ra win: —Naha diara na âmya tikpara. Sim naha tihmika ra, kau kalila aima wâl aiwanras ba ra, man aima yumhpa yang ai kaikras wima.

³¹ Sakuna Pita kau karna pali aisi, win: —Yang na man wal pruaia kamna sin, mai kaikras sna lika sip wimna apia. Bara wala nani sut sim baku aisin.

Jisas Getsemani ra ai pura sunisa

³² Bara witin nani plis kum nina Getsemani mâki kan ba ra balan, bara Jisas ai disaipilka nani ra win: —Man nani nahara iwi bas, yang puri suni kamna ba ra.

³³ Bamna Pita, Jems bara Jan kat brih wan, bara mahka sibrin daukan, sari sin takan.

³⁴ Bara witin nani ra win: —Yang kupi ra sari ai daukisa, pruaia prais. Man nani nahara takaski aihwaki bas.

³⁵ Jisas kau wiria laihura wih tasba ra bawi ai mawan tasba kat praki, Gâd ra ai pura sunan, sip kaka baha pât wahwaia latwanka ba, witin wina lubia.

³⁶ Bara ai pura sunra ra aisin: “Aisiki, diara sut mapara man sip sma; naha pâtka wahwaia sna ba wina swaki ai sâks; sakuna yang kupi lâka lika apia, man kupiam lâka kat.”

³⁷ Witin mita disaipil nani ra balan ba ra, yapi kan kaikan, bara Pita ra win: —Saiman, ¿man yapisma ki? ¿Awar kum pan sin sip aihwakras sma?

³⁸ Man nani aihwaki, puram suni bas, bara traika kaikan ra kauhma apia. Spiritkam ba karna sa, sakuna wînam tara ba swapni sa.

³⁹ Witin kli wan, bara ai pura sunan sim bîla nani ba kat.

⁴⁰ Ningkara, witin kli balan, bara disaipil nani ba yapi kan sakan. Witin nani yapan dauki kan ba mita ai nakra nani sip kwâki briras kan. Witin nani pana Jisas ra dîa wiaia sapa kaikras kan.

⁴¹ Bara kli aima yumhpa ra balan ba ra, Jisas bila baha nani ra: —Nanara lika man nani yaps, riskam bris. ¡Aitani sa! Kaiks, Upla Luhpia Waitna ba upla saurakira nani mihta ra mangkaia awarka ba aimakan sa.

⁴² ¡Man nani bus, kaisa yawan wap! ¡Kaiks, waihla mihta ra ai mangkuya uplika ba pat aula sa!

Jisas ra alki brih auya

⁴³ Kau Jisas aisi kan, Judas balan, witinka disaipil 12 nani wina kata ba, bara upla ailal sord nani dus nani brih witin wal aula kan; baha nani ba prîs wihta nani wina, Lâ Smasmalkra nani wina, bara Ju almukka nani wina sin.

⁴⁴ Judas, witinka mita Jisas waihla mihta ra mangki kan ba, sain kum yaban naku wisi: “Yaura yang kiawalamna ba, baha sika; man nani alks, bara pain pali priski brih was.”

⁴⁵ Bara Jisas lamara bal, win: —¡Smasmalkra! Bara witin ra kiawalan.

⁴⁶ Bamna wailhka nani mita Jisas ba alki, prîs ra brih wan.

⁴⁷ Sakuna disaipil kum mita, ai sordka saki, prîs wihta albika kum ra kiama kum dakban.

⁴⁸ Bara Jisas bui upla nani ra win: —¿Âimplikra kapri kan baku, man nani sord nani bara dus nani brih ai alkaia aidrubi balram?

⁴⁹ Yu bani man nani tilamra kapri, tempel ra aisi smalki, bara man nani ai alkras kapram. Sakuna baha ba ban baku takaia kan, Ulbanka ba kat aimakbia dukiara.

⁵⁰ Bamna disaipil nani sut Jisas yakan swi si, plapan.

Wahma kum plapan ba

⁵¹ Wahma kum Jisas nina bliki kan, kwalyapa kumi ni ai pura praki. Witin ra alkan,

⁵² sakuna witin mita kwalyapa ba swi si, ai taya man plapan.

Jisas lâ wihta nani mawanra

⁵³ Bamna witin nani mita Jisas ba prîs tara watla ra brih wan; bara prîs wihtka nani, wihta almuk nani bara Lâ Smasmalkra nani sut asla prawan.

⁵⁴ Pita ba laih wina Jisas nina blikan, wihta tara watla latka kat; ban aihwawakra nani aikuki pauta lamara ailahki kan.

⁵⁵ Prîs wihtka nani bara lâ wihtka nani sut mita Jisas mapara witnis plikan ikaia dukiara, sakuna sip sakras kan.

⁵⁶ Bara upla manis witin mapara kunin aisi kan, sakuna pana pana sip aisi tâ mangkras kan.

⁵⁷ Upla tila nani, kunin pali aisi ai dahra saki, naku aisin:

⁵⁸ —Yang nani naku aisi kan walri: ‘Naha tempelka upla nani mita mâkan na sauhkamna, bara yu yumhpa ra yang mita upla nani mâkras tempelka wala kum mâkamna.’

⁵⁹ Sakuna baha aisanka sin sip pana pana tânka briras kata.

⁶⁰ Bara prîs wihtka ba, sut tila wina buan, bara Jisas ra makabi walan: —¿Man bui pana diara aisaras sma ki? ¿Naha mampara aisi dukia nani na dîa pali tânka sa ki?

⁶¹ Sakuna Jisas sâp kan, pana diara aisaras kan. Prîs wihtka kli witin ra naku makabi walan: —¿Man ba Misaya sma ki, Gâd yamni pali ba Luhpia?

⁶² Jisas witin ra win: —Âu, yang sika. Bara man nani mita Upla Luhpia Waitna ba kaikma, Gâd karnika bara mihta aihkika ra iwi, kasbrika purara kasbrikika nani tilara balbia ba.

⁶³ Bamna prîs wihtka ba mita ai kwalka nani kalki, aisin: —¿Dîa muni yawan nani kau witnis wala nani want sa ki?

⁶⁴ Man nani walram nahki ai bîla ni Gâd mapara saura aisin ba. ¿Nahki lukisma man nani? Bara sut mita pruaia pâtka ra lakan.

⁶⁵ Bara upla tila nani mahka witin ra yabalaya tuhban, ai mawan praki pruki kan, naku sin witin ra win: —¡Dahra aisi wis, ya mai prukan sapa! Bara tempel ra aihwaki kan nani ba mita ai mawan ra prukan.

Pita Jisas ra kaikras wisa

⁶⁶ Pita lata munhta tani ra kan, bara prîs wihtka albika mairin kum balan.

⁶⁷ Witin lika pauta mukan ba lamara ailahki kan, bara Pita kat kaiki, naku win: —¡Man sin Jisas Nasaret wina ba wal tauki kapram!

⁶⁸ Sakuna Pita apia wisi, naku aisin: —¡Witin ba yang kaikras, dîa aisisma sapa sin yang tânka briras! Bara latara takan, utla dimaika kat. Ba kat kalila kum aiwanan.

⁶⁹ Bamna alba mairin mita kli witin ra kaikan, bara bahara kan uplika nani ra naku win: —Naha waitnika na sin baha nani tila wina kum sa.

⁷⁰ Sakuna Pita mita kli apia win. Kau naika mapara, bahara kan nani ba kli Pita ra win: —Kasak pali, man baha nani tila wina kum sma, man Galili wina sma bamna.

⁷¹ Bara Pita mahka kunin aisi swer taki, naku win: —¡Yang baha waitnika man nani aisisma ba, ya sapa kaikras!

⁷² Baha sim piua ra, kalila ba aima wala aiwanan. Bamna Pita Jisas wisata ba ai kupia krawan: ‘Kau kalila aima wâl aiwanras kaka, man aima yumhpa yang ra ai kaikras sma wima.’ Bara naha luki, mahka inan.