Mark 10 - DAWAN BÎLA AISKA

Jisas aisisa marit lâka krikaia dukiara

¹ Jisas Kapernaum wina taki wan, Judia tasbaya ra wan, Jordan awala lalma tani tasbaya ra. Bahara upla ailal ba kli ai lamara balan, bara Jisas ai natka kan ba baku, kli witin nani ra smalki kan.

² Bara parisi tila nani Jisas lamara balan, trabil ra dingkaia wisi. Witin nani makabi walan, lâ sapa waitna kumi ai maya mairin ra swiaia ba.

³ Witin pana naku win: —¿Moses dîa man nani ra mai smalkan ki?

⁴ Witin nani bila: —Moses adar yan, wan maya mairin wal swiaia; witinka ra swiaia lâka wauhkataya kum yabi, ningkara mahka dakwi takaia trabil âpu kira.

⁵ Bara Jisas bila: —Moses baha lâka yan man nani kupiam karna ba mita.

⁶ Sakuna blasi pali, Gâd diara nani paskan piua, ‘Witin bui waitna, mairin wal paskan.

⁷ Baha mita waitna ba ai aisika, ai yaptika wal ba swi si ai maya mairin wal asla takbia;

⁸ bara wâl ba ai wîna kumi baku takbia.’ Bara kumi baku takbia, wâl lika apia.

⁹ Baha mita Gâd mita asla prakan ba, upla mita dakbi sakaia sip apia pali sa.

¹⁰ Witin nani utla bilara kan ba ra, disaipil nani kli baha dukiara makabi walan.

¹¹ Jisas bila: —Ani waitnika ai maya mairin ra mahka swibia kaka mairin wala wal marit takaia dukiara, ai maya pas ba mapara marit lâka sauhkisa.

¹² Bara mairin mita ai maya waitna ba swi si, waitna wala wal marit takbia kaka, witin sin marit lâka ba sauhkisa.

Jisas tuktan sirpi nani ra yamni munisa

¹³ Bara tuktan tila nani Jisas ra bri balan, witin nani ra ai mihta ni kangbia wisi. Sakuna disaipil nani mita tuktan nani bri balan uplika nani ra lawi dauki kan.

¹⁴ Jisas baha kaiki baha nani ra lawi daukan, bara naku win: —Swis tuktan nani ba yang ra balbia, witin nani takaskpara, kan Gâd kingka lâka ba witin nani sâtka uplika nani dukia sa.

¹⁵ Kasak pali mai wisna, ani uplika tuktan baku Gâd king aimaki lâka ba briras kaka, witin sip bahara dimbia apia.

¹⁶ Bara tuktan nani ba ai klahkla ra buki, ai mihta nani purara kahbi, yamni munan.

Wahma lalahkira kum Jisas wal aisisa

¹⁷ Bara Jisas kli impakan ba ra, waitna kum plapi bal, ai mawanra ai lula kriki, makabi walan: —Smasmalkra yamni, ¿yang raya ban kaia lâka ba briaia kaka, dîa daukaia sna ki?

¹⁸ Jisas bila: —¿Dîa muni yang ra yamni ai wisma? Yamni ba kumi baman sa, wala âpu, baha ba Gâd sa.

¹⁹ Man, Gâd lâka nani ba pain kaikisma: ‘Upla ikpara, marit lâka sauhkpara, implikpara, upla ninara kunin aisapara, upla ra kunin munpara, aisikam bara yaptikam wal ba pain kulks.’

²⁰ Bara waitna ba bila: —Smasmalkra, yang tuktan sirpi kapri wina baha ba sut kulkisna.

²¹ Bara Jisas witin ra latwan kaiki, win: —Kau diara kumi man âpu sma: was, bara diara brisma ba sut atki lalahka takbia ba umpira nani ra yas, bâra mika kasbrika purara ba wina mamna brima; ningkara bal, nini blîks.

²² Sakuna waitna ba naha walan ba ra, sari takan, bara ai kupia sarikira mahka wan, witin yuyakira pali kan bamna.

²³ Bara Jisas kir tawi kaiki, ai disaipilka nani ra win: —¡Yuyakira nani lika Gâd king aimaki ba lâka prana ra dimaia karna pali sa!

²⁴ Disaipil nani baha wali tâ iwan, sakuna Jisas kli win: —Luhpi nani, ¡karna pali sa Gâd King aimaki lâka tasbaya ra dimaia!

²⁵ Kiamil kum silak nakra bâk dimi luaia ba kau isi pali kabia, lalahkira kum Gâd king aimaki lâka tasbaya ra dimaia ba wal.

²⁶ Naha wali tâ pali iwi banhwan, bara pana pana makabi walan: —Baku kaka, ¿ya swakwi takaia sip kabia ki?

²⁷ Jisas witin nani ra kaiki, win: —Upla nani naha sip daukbia apia, Gâd lika sip sa, Gâd mapa ra diara sut sip sa bamna.

²⁸ Bara Pita win: —Dawan, yang nani dîa dîa bri kapri ba sut swi si, ninam blikri.

²⁹ Jisas pana win: —Kasak mai wisni: Ya ya yang dukira bara sturi yamni ba dukiara sin ai watla, ai muihni nani, ai lakra nani, ai aisika, ai yaptika, ai luhpia nani, ai tasbaya swisa kaka,

³⁰ naha tasba ra, naha piua ra 100 prais kau utla nani, muihni nani, lakra nani, yapti nani, luhpa nani, tasba sin bribia, rausauhkan nani tilara; bara naika balaia tasbaya ra, raya ban kaia ba bribia.

³¹ Sakuna ailal nanara tâura aimaki ba, ninara tawbia; bara ailal nanara ninara ba, tâura tawbia.

Jisas ai pruanka dukiara pat aima yumhpa aisuya

³² Witin nani Jerusalem yabalka ra uli auya kan ba ra, Jisas lika disaipil nani tâura wapi kan. Witin nani tâ iwan kan ba ra, sibrinkira ai nina bliki kan. Bara Jisas kli disaipil 12 ba tnaya ra saki, dîa dîa takaia kan ba mahka smalkan.

³³ Witin nani ra win: “Man nani kaikisma, yawan Jerusalem ra uli auya. Bahara sika Upla Luhpia Waitna ba prîs tara nani bara Lâ Smasmalkra nani mihta ra mangkbia, bara witin nani mita pruaia pâtka ra lakbia ba ra, upla tringsar nani mihta ra mangkbia.

³⁴ Ai lawaska kikbia, yabalaya tuhbia, prukbia, bara ikbia, sakuna yu yumhpa ningkara, witin pruan wina kli bubia.”

Jems bara Jan wal diara kum makabisa

³⁵ Bamna Jems bara Jan wal, Sebedi luhpia nani ba, Jisas lamara bal, naku win: —Smasmalkra, yang nani mamkabisna ba wankma lukisna.

³⁶ Bara witin baha nani ra makabi walan: —¿Dîa want sma yang bui man nani ra dauki maikamna?

³⁷ Witin nani bila: —Man king iwaikam pranakira ra iwma ba ra, yang nani wina kumi mihtam aihkika ra iwaia, wala ba smihkam tani ra.

³⁸ Bara Jisas bila witin nani ra: —Dîa makabisma ba man nani tânka briras. ¿Man nani sip sma ki yang dimna kapka ba wina diaia, bara tahbi daukanka brimna ba sin briaia?

³⁹ Witin nani bila: —Yang nani sip sna. Jisas witin nani ra win: —Kasak pali: yang dimna kapka ba wina dima, bara yang ra tahbi ai daukbia ba man nani ra sin tahbi mai daukbia;

⁴⁰ sakuna yang mihti aihkika ra bara smihki ra sin iwaia ba lika, yang mita yaia sip apia sna. Baha lika ani uplika nani dukia wisi ridi daukan ba, baha nani ra yan kabia.

⁴¹ Disaipil matawalsip ba baha wali, Jems bara Jan wal mapara lawan.

⁴² Sakuna Jisas witin nani ra naku win: —Man nani kaikisma kuntri wihtka nani ba, kuntrika dawanka takisa, bara tilara kau tara nani ba baha nani purara karnika alkisa.

⁴³ Sakuna man nani tilamra baku kabiara. Baha man nani wina ya kau tara kaia lukisa kaka, wala nani napakanka takaia sa;

⁴⁴ bara ani uplika man nani tilamra tâura kaia lukbia ba, sut albika kaia sa.

⁴⁵ Kan Upla Luhpia Waitna ba sin balras upla mita dukia daukbia dukiara, sakuna upla dukia daukaia, bara rayaka sin yaia, upla ailal swaki sakaia ba mata.

Bartimius blain ba Jisas mita rakisa

⁴⁶ Bara witin nani Jeriko ra wan. Bara Jisas ai disaipilka nani, upla ailalka ai nina bliki kan ba aikuki tawan ba wina taki auya kan ba ra, blain waitna, yabal tnaya ra iwi diara makabi kan.

⁴⁷ Bara Jisas Nasaret wina ba walan ai lamara aula kan, bara diara kaikras ba mahka naku winan: —¡Jisas, Debit Luhpia Waitna, kupiam swapni ai kaikram!

⁴⁸ Upla ailal mita lawi daukan ai bîla prakbia wisi, sakuna kau ai bîla baikra tara wini kan: —¡Debit Luhpia Waitna, kupiam swapni ai kaikram!

⁴⁹ Bara Jisas takaski, naku win: —Witin ba paiws. Bara witin nani blain waitna ba wini, naku win: —Tâm baiki bus, witin mai winisa bamna.

⁵⁰ Bara ai kwalka lulki, pâli tit bûi, Jisas lamara balan.

⁵¹ Bara Jisas witin ra makabi walan: —¿Dîa want sma yang bui man ra mai daukamna? Blain ba witin ra wisata: —Smasmalkra, yang diara kaikaia want sna.

⁵² Jisas witin ra win: —Sip sma mahka waia; pat rawram sa, kasak lukram bamna. Baha nakra klipan kum ra blain ba kaiki kan, bara yabal ra Jisas nina blikan.