Mark 1 - DAWAN BÎLA AISKA

Jan Tatahbra upla iwras tasbaya ra smalkisa

¹ Naku sika, Gâd Luhpia Jisas Kraist sturka yamni tâ krikan ba.

² Prapit Aiseya naku ulban kan: “Yang bîli twatwilkra ba, man kainamra blikisna, yabalkam ba ridi daukaia dukiara.

³ Upla iwras tasbaya ra, upla kum bîla baikra karna winisa: ‘Dawan yabalka ba ridi dauks, yabal wapni kum kwâki banhs.’ ”

⁴ Diara nani takan ba sika, Jan ba balan upla nani ra tahbi dauki kan upla iwras tasbaya ra. Witin nani ra sin ban naku aisi kan: “Man nani kupiam laks, bara tahbi mai sâkbia, baku mika Gâd mita watawankam nani ban swih tikbia.”

⁵ Judia bara Jerusalem tawanka nani sut witin ra walaia balan kan, bara ai saurka nani dahra sakan, Jan mita tahbi dauki kan Jordan awala ra.

⁶ Jan prâka ba kiamil tâwa ni daukan kata, ai maisa wila ba bîp taya ni paskan kata; bara ai pata ba lika tristrisia nani bara nasma laya kan.

⁷ Upla nani ra smalki bara naku aisi kan: “Yang ninira wala kum aula ba, witin lika yang purkira kau karnika brisa, yang bawi ai sûska awa ba pan lanhkaia aitani apia sna.

⁸ Yang bui man nani ra lî ni baman tahbi mai daukisni, sakuna witin lika, Spirit Holikira ni tahbi mai daukbia.”

Jisas ra tahbi daukisa

⁹ Baha yua nani ra, Nasaret tawanka wina Jisas taki wan, baha ba Galili kuntrika ra sa. Bara Jan mita Jordan awala ra tahbi sakan.

¹⁰ Bara kaiks, lî wina taki aula kan ba ra, Jisas kaikan kasbrika pura ba kwawan, bara Spirit Holikira ba butku baku ai purara bal iwan.

¹¹ Bîla baikra kum sin kasbrika pura ba wina naku wisata: “Man ba yang Luhpi laitwankira sma; man ba bâk saki mai briri.”

Jisas ra traika kaikan ba

¹² Baha ningkara, Spirit mita Jisas ba upla iwras tasbaya ra brih wan.

¹³ Bahara Jisas yu 40 takaskan, daiwan kraskira nani tilara, bahara Sitan mita ai traika kaikan; bara insal nani bal ai dukia dauki kan.

Galili ra Jisas ai warkka tâ krikan ba

¹⁴ Witin nani Jan Tatahbra silak watla ra mangkan ba ningkara, Jisas Galili ra wan, Gâd wina sturi yamni win ba aisi smalkaia.

¹⁵ Jisas naku aisi kan: “Pat piua ba aimakan sa, bara Gâd king aimaki ba lâka sin pat baila sa. Gâd ra kupiam laks, bara sturi yamni ba bris kasak lukan lâka wal.”

Jisas inska âialkra walhwal ra paiwisa

¹⁶ Jisas Galili lakunka unku wapi auya kan, kaikan Saiman ai muihni Andru wal bâra kan. Naha nani lika inska âialkra kan, bara mahka ai iliska liura lulki kan.

¹⁷ Jisas mita win: —Man nani nini blîks, bara yang bui upla âialkra nani mai daukamna.

¹⁸ Baha sim piua ra ai tanka nani swin, bara witin nani lika Jisas wal wan.

¹⁹ Jisas kau wirâ ai kanra wan, bara Jems ai muihnika Jan wal bâra kaikan, Sebedi luhpia nani ba, duri tara kum bilara tân nani kalwan ba witin nani mami kan.

²⁰ Baha ningkara winan, bara witin nani ai aisika Sebedi ba wark tatakra nani aikuki duri ba kat swin, bara mahka Jisas wal wan.

Waitna pirit saura bri kan ba

²¹ Bara witin nani Kapernaum ra diman. Ris yua ra, Jisas prias watla ra dimi, upla ra mahka smalkan.

²² Witin aisi kan ba dukiara upla nani tâ iwan, kan smalkaia karnika bri uplika baku smalki kan, Lâ Smasmalkra nani baku lika apia.

²³ Ju nani priaska watla ra waitna kum kan, witin lika pirit saura bri kan, bara ai bîla baikra tara ni winan:

²⁴ —Jisas Nasaret wina, ¿dîa muni yang nani tilira dimisma? ¿Yang nani ra rau ai sauhkaia balram ki? Yang lika man ra pain mai kaikisna. Man sika Gâd Holikira pali sma.

²⁵ Jisas pirit saura ba ra lawi dauki, naku win: —¡Bîlam prak praks, bara waitnika na wina mahka taki was!

²⁶ Pirit saura ba mita waitnika ra yan lasa prukan, bara karna pali ai bîla baikra wini, witin wina taki wan.

²⁷ Upla sut tâ iwi, pana pana witin nani naku makabi wali kan: —¿Naha na dîa ki? ¿Smalkanka raya na dîa pali sa ki? ¡Waitnika na, pirit saura nani kangbi sakaia karnika brisa, bara ai bîla sin walisa!

²⁸ Bara isti pali Galili tasbaya aiska ra Jisas sturka walan.

Saiman Pita maya yaptika ba, Jisas mita rakisa

²⁹ Jisas, Jems, Jan wal Ju nani priaska watla wina taki, Saiman bara Andru watla ra wan.

³⁰ Saiman maya yaptika rih dauki kan, bara witin nani bui Jisas ra win, witin siknis sa.

³¹ Jisas ai lamara wih, mihta ra alki bukan, bara rihka ba mahka swin, bamna mairka ba mahka witin nani dukia daukan.

Jisas bui upla sikniskira ailal rakisa

³² Lapta diman bara pat tihmia kan, upla sikniskira nani, pirit saura bri nani sut, Jisas ra brih balan,

³³ bara tawan uplika sut dur lamara asla takan.

³⁴ Jisas mita siknis sât sât bri nani ba sut rakan, pirit saura nani sin ailal kangbi sakan. Jisas mita baha piritka saura nani yan sturi sip aisaras, kan baha nani kaikan witin ba ya kata.

Jisas Ju nani priaska watla ra sturi yamni ba aisi smalkisa

³⁵ Titan, yu baiwras, kau tihmia kan, Jisas mahka buan bara tawan wina taki yakan ai pura sunaia wan plis kum yakan bâra kan ba ra.

³⁶ Saiman ai uplika nani wala ba wal Jisas ra plikaia wan,

³⁷ bara wal prawi muni, naku win: —Sut mai plikisa.

³⁸ Sakuna witin bila: —Kaisa tawan wala nani wan lamara ba ra sturi yamni ba bahara sin smalkaia, kan yang baha dukiara balri.

³⁹ Baku Jisas Galili kuntrika aiska ra tauki kan, tawan bani ra Ju nani priaska watla ra smalki, bara pirit saura nani sin kangbi saki kan.

Jisas lipar sikniska bri uplika kum ra rakisa

⁴⁰ Lipar sikniska bri waitnika kum Jisas ra bal, ai lula kriki, naku aisin: —Man wilin sma kaka, sip sma sikniski na wina ai rakaia.

⁴¹ Bara Jisas kupia swapni takan, ai mihta ni kangbi, naku win: —¡Yang wilin sna, bamna mai rakisna!

⁴² Naha aisan wal baku, lipar sikniska ba rawan, bara klin takan.

⁴³ Waitnika ba mahka blikan wan, sakuna kasak karna pali, naku win:

⁴⁴ —Kaiks, upla kumi ra sin wipara. Prîs ra baman was, bara prisantkam sin yas, klin takaia dukiara, Moses win ba baku. Bara upla nani kaikbia man pat rawram ba.

⁴⁵ Sakuna waitna ba wan, upla sut ra win diara takan ba. Baha mita Jisas sip tawan ra param takras kan, bara tawan wina laihura baman tauki kan, upla âpu tasbaya ra. Sakuna upla tasba ailal wina bal kaiki kan.