Malaquía 3 - DAWAN BÎLA AISKA

¹ Dawan karnika sut bri ba, naku aisisa: “Yang blikaisna bîli twatwilkra ba yabalki ba mahka daukaia. Man nani plikisma Dawankam ba, witin pat pali bal ai tempelka ra dimbia. ¡Man nani wal lâ daukaia bîla twatwilkra bîla kaikisma ba pat aula!”

² Sakuna, ¿baha yua ba ya bui takaskbia? ¿Ya ban bûi kabia? Witin pauta klauhi baku balbia, angki klin wan sakaia, sup baku wan tâskika nani ba sikbi sakaia dukiara aula.

³ Dawan bal iwbia prîs nani Libai kiamka nani ba sunu daukaia, silbar bara gul slaslilkra nani pauta klauhan ra kiski tâskika saki ba baku. Baha kat lika witin nani daukaia kata ba baku dauki si, prisantka nani Dawan ra brih balbia.

⁴ Bâra mika Dawan, Juda bara Jerusalem wal ai prisantka brih aula ba briaia lilia takbia, blasi piua lilia kata baku.

⁵ Karnika sut bri Dawanka ba aisisa: “Yang balamni man nani mampara lâmka ba param aisi daukaia. Sukia baku upla ra kunin munisma, upla maya lâka sauhki banhwisma ba, swer taki kunin aisi nani ba, upla warkka taki nani ra tataibra nani ba, piarka nani ra, rau nani ra, nisankam apia nani ra saura munisma ba, bara yang ra sin ai kulkras sma ba.

Diara matawalsip bani wina kumi, prisant wala nani sin yabaia ba

⁶ “Yang sika Dawan. Yang aihka takras. Baha mita Jekob kiamka man nani ba âpu mai daukras sa.

⁷ Man nani sin lâika nani daukaia ba wina laihura waram, damikam nani lâika wina laihura wan baku, witin nani ba yang bîli wali daukaia apia wisi. Yang karnika sut alki brisna Dawanka ba, man nani ra wisma: ¡Man nani kli yang ra tawi bal, bara yang sin man nani ra kli tawamni! Ban sakuna, man nani aisisma: ‘¿Dîa dukiara yang nani na man ra kli tawaia sna?’

⁸ Bara yang mamkabi walisna: ¿Upla kum sip sa ki Gâd ra kunin muni ba wina diara briaia? ¡Sakuna man nani lika kunin aisi yang wina diara brisma! Sakuna man nani kau ban makabi walisma: ‘¿Dîa pali yang nani dauki kunin mai munisna ki?’ ¡Diara 10 bani wina kumi aikaia bara prisant wala nani sin aikaia sma ba man nani aikras kapram!

⁹ Âu, man nani nisankam aiska, man nani sut ai implikisma, baha tâwan man nani sut ra lamhtubaisna. Yang, karnika sut alki brisna Dawanka ba, man nani ra mai wisni:

¹⁰ Man nani diara 10 bani wina kumi, yang duki ba tempel ra lalahki watla ra brih bal, baku yang waitla ra plun ailal bâra kabia. Man nani baku dauki tâinka kaiks, man nani kaikma kasbrika purara windarka nani ba bukutbi, yamnika ailal man sut puramra yakabras kamna sapa.

¹¹ Namsla mâ tilwan nani ba, wain nasla nani brisma ba sin swirka liwa nani mita pih tikbia apia.

¹² Nisan nani sut wibia man nani lilia pali sma, kan man tasba aihka painkira ra iwma ba dukiara. Yang, karnika sut alki brisna Dawanka ba, baku aisari.”

Dawan bui ai uplika nani ra umpira kaikisa

¹³ Dawan aisisa: “Man nani bui yang maipara bîla karna pali aisaram. Bara kau ban makabi walisma: ‘¿Dîa saura nani mampara aisari?’

¹⁴ Naha sika man nani aisaram ba: ‘Dawan warkka daukaia ba wark bahki sa. ¿Witin ai warkka daukaia wanki ba dauki wina yawan dîa yamnika sakaia sip sa ki, sari kwalka dimi, Dawan karnika sut bri ba mawanra watauki kaia ba?

¹⁵ Yawan nani kaikan aimayunra nani ba lilia sa, diara watawi nani ba wina, witin nani ra yamni baman takisa; witin nani mita Dawan traika kaikisa, sakuna klala kumi sin briras.’ ”

¹⁶ Gâd ra tara kulki nani kan ba, ai tilara naku aisi banhwan, bara witin nani aisi kan ba Dawan aman pali wali kan. Witin nani Dawan ai mawan kat bâra kan bara wauhkataya kum ulban, bahara ai kupia krauki kan, baha nani Dawan ra kulki mayuni nani ra, bara kulki saki brisa.

¹⁷ Karnika sut bri Dawanka ba aisisa: “Piua kum mangkaia yang ridi takisna, baha yua ra upliki nani ba kli yang upliki nani takbia. Luhpia ai aisa warkka dauki ba ra, aisika kaiki kupia swapni taki ba baku, yang sin witin nani ai dukiara baku kupi swapni takbia.

¹⁸ Bara man nani aima wala ra tânka brima yamni ba saura ba wal tânka aihka ba, Gâd ra mayuni ba, Gâd ra mayunras ba tânka.”