Luk 9 - DAWAN BÎLA AISKA

Jisas mita disaipil 12 ba saki blikisa

¹ Jisas ai disaipilka 12 ba asla paiwi, baha nani ra karnika bara adar sin yan, pirit saura nani kangbi sakaia bara siknis nani rakaia sin.

² Witin baha nani ba blikan, Gâd Kingka Lâka sturka ba smalkaia, sikniskira nani sin rakaia.

³ Bara sin win: —Yabal ra impakaia diara bripara, kîn, sakbat, plun, lalah sin apia. Prâk kumi baman brih was, wâl lika apia.

⁴ Ani ani watla ra wih dimma ba, bahara takasks tawanka ba wina taki waia kat.

⁵ Ani pliska kra wantkam apia takbia kaka, baha tawanka ba wina taks, tasba yuya minam nani ra alkan ba sin siauhbi sâks, baha ba lika witin nani mapara witnis kum baku kabia.

⁶ Bamna witin nani taki wan, bara tawan sirpi nani sut ra dimi swaki sakan lâka sturka ba smalki kan, bara plis bani ra sikniskira nani bâra kan ba sin rakan.

Jan Tatahbra pruanka ba

⁷ Jisas dîa dîa dauki kan ba sut wihta tara Herod kaikan ba ra, dîa lukaia sapa sin kaikras kan, upla kum kum aisi kan Jan ba pruan wina buan sa.

⁸ Upla wala nani aisi kan, witin ba prapit Ilayas kli bal takan; wala nani bila naha lika patitara prapitka nani kum pruan wina buan sa.

⁹ Sakuna Herod bila: —Yang pali mita sika blikri Jan Tatahbra ra lal dakbaia. ¿Bara naha uplika na ya, diara ailal dauki ba dukiara yang ai sturka walisna na? Bamna Herod lika Jisas ba kaikaia want pali dauki kata.

Jisas bui upla 5,000 ra plun dakakisa

¹⁰ Apastil nani kli aidrubi balan ba ra, dîa dîa witin nani daukan ba sut Jisas ra maisa pakan, bara witin baha nani brih, plis kum ra aihka saki brih wan tawanka nina ba Betsaida.

¹¹ Sakuna upla nani baha walan ba ra, ai nina blikan; bamna Jisas baha nani ba brih, Gâd kingka lâka dukiara smalkan, sikniskira nani bâra kan ba sut rakan.

¹² Yu pat tutni kan ba ra, apastil 12 ba Jisas ra bal, naku win: —Upla nani na yas mahka wabia, witin nani wih ris bribia bara plun sin plikbia tawan sirpi nani ra. Insla nani wan lamara nani na ra lika diara âpu.

¹³ Sakuna Jisas witin nani ra win: —Man nani yas plun piaia. Sakuna witin nani bila: —Yang nani brit matsip bara inska wâl baman brih banhwisna, naha uplika nani dakakaia dukiara, yang nani wih plun atkamna lika naha uplika sut dukiara.

¹⁴ Kan waitna nani ba 5,000 kata. Sakuna Jisas ai disaipilka nani ra win: —Man nani upla nani ba yas dakni dakni ra iwbia, dakni bani ba 50 prais.

¹⁵ Witin nani baku daukan, bara sut iwan.

¹⁶ Bamna Jisas ai mihta ra brit matsip ba bara inska wâl ba sin brin. Bara ai nakra buki, kasbrika purara kaiki, baha nani dukiara tingki win; ningkara, kriki muni ai disaipilka nani ra yan, upla nani ra yabia dukiara.

¹⁷ Upla sut pin, ai âuyapah pali; ningkara yuyaka nani baman 12 baskit banhkan.

Pita latan wisa Jisas ba Misaya

¹⁸ Yu kumi, Jisas yakan taki ai pura suni kan ba ra, ai disaipilka nani ba witin wal kan, bara witin mita baha nani ra makabi walan: —¿Upla nani, yang na ya sna wisa ki?

¹⁹ Baha nani mita pana win: —Upla kum kum bila man ba Jan Tatahbra wisa, wala nani bila lika man ba Ilayas, bara kau sin wala nani wisa, man ba patitara prapitka nani kum pruan wina buram sa.

²⁰ Bara witin baha nani ra makabi walan: —¿Bamna man nani pali, yang na ya sna wisma ki? Pita bila: —Man sika Misaya ba, Gâd wina ba.

Jisas ai pruanka dukiara aisisa

²¹ Ningkara, Jisas ai disaipilka nani ra lâ karna yabi win, baha sturka ba upla kumi ra sin wibia apia.

²² Bara sin wisata: —Upla Luhpia Waitna pât kasak wahwaia kabia, bara wihta almuk nani mita, prîs wihta nani bara Lâ Smasmalkra nani sin bahki kulkbia, ban sin ikbia, sakuna yu yumhpa ra pruan wina kli buan kabia.

²³ Ningkara, alsut ra win: —Upla kum nini blikan dauki kaka, ai wîna ba kulkaia apia, ai dusa prihni yu bani brih, nini blikaia sa.

²⁴ Kan ani uplika ai rayaka swaki sakaia munbia ba, witin lika tikbia, sakuna ani uplika yang tâiwan ai rayaka ba tikbia kaka, witin lika swaki sâkbia.

²⁵ ¿Bamna upla mapara dîa yamnika bâra kabia ki, witin tasba aiska ba saki bribia, sakuna ai rayaka ba tanis tikbia kaka?

²⁶ Kan ani uplika yang dukira, smalkanki nani ba baha dukiara ai swira lukbia kaka, Upla Luhpia Waitna ba mita sin witin dukiara swiri lukamna, king baku Aisiki prana wal bara insal holikira nani kira balamna piua ra.

²⁷ Kasak pali man nani ra mai wisni, nahara tilara upla kum kum nâra sa, witin nani prubia apia, Gâd kingka lâka ba kaikras kaka.

Jisas wîna tara aihka takan ba

²⁸ Naha diara aisin ba wina yu 8 luan ningkara, Jisas il kum ra uli wan ai pura sunaia, bara witin yula kahbi wan Pita, Jems bara Jan.

²⁹ Bara Jisas ai pura suni kan, ai mawan ba sât aihka takan, ai kwalka ba pihni pali, ingni sin kata.

³⁰ Tisku kan, waitna wâl bal witin wal aisi kan, baha nani lika Moses bara Ilayas kata,

³¹ ingni pranakira pali witin nani ra kir ingwan, bara aisi kan Jisas prura pâtka Jerusalem ra wauhbia ba dukiara.

³² Pita ai pânika nani wal yapan dauki kan, sakuna ban yapras raya kan, bara Jisas prana ba kaikan, bara waitna wâl witin lamara kan ba sin.

³³ Bamna baha waitnika nani mahka Jisas wina dakwi taki wan ba ra, Pita bila: —¡Smasmalkra, yawan nâra kaia wirâ pain sa! Kaisa utla sirpi yumhpa daukaia: kumi ba man wamtla, wala ba Moses watla, bara yumhpika lika Ilayas watla. Sakuna Pita witin dîa aisi kan ba tânka briras kata.

³⁴ Bahara kau aisi kan ba ra, kasbrika kum bal sut ra madiskan, bara witin baha bilara kan ai dara walan, bara sibrin daukan.

³⁵ Bara kasbrika ba wina bîla baikra kum walan, naku win: “Naha sika yang Luhpi bâk sakri ba; man nani bui witin ra wali banhs.”

³⁶ Baha bîla baikra walan ba ningkara, kaikan Jisas yakan kan. Witin nani diara kaikan ba baha piua ra yukuki bri kan, upla kumi ra sin wiras kata.

Jisas mita tukta waitna kum pirit saura bri kan ba rakisa

³⁷ Yu wala, witin nani il wina bal iwan ba ra, upla ailal Jisas wal prawaia balan.

³⁸ Bara upla nani tila ba wina waitna kum ai bîla baikra karna wini, win: —Smasmalkra, pliskam luhpi na kaiks, witin na baman yang brisna bamna;

³⁹ bara pirit kum mita alki muni, ai bîla baikra karna yan winisa, lasa sin yan prukisa, bara ai bîla wina ukata yan takisa. Saura pali munisa, swih taki wan sin daukras.

⁴⁰ Yang disaipilkam nani ra makabri piritka saura ba sâkbia, sakuna sip sakras kata.

⁴¹ Jisas pana win: —¡Kasak lukras upla warha nani! ¿Ahkia kat yang na man nani wal kamna, bara kupi sin alki takaskamna ki? ¡Luhpiam ba nâra bri bal!

⁴² Tukta ba Jisas lamara aula kan ba ra, pirit saura ba mita tasba ra lulki saban, bara kli munan lasa prukan; sakuna Jisas pirit saura ba ra lawi daukan, tuktika sin rakan, bara ningkara kli aisika ra yan.

⁴³ Bara upla sut tâ iwan Gâd karnika ba dukiara. Jisas diara dauki kan ba dukiara upla sut tâ iwan taki kan, witin ai disaipilka nani ra win:

Jisas kli ai pruanka dukiara aisisa

⁴⁴ —Man nani naha na pain wals, bara âmya sin tikpara: Upla Luhpia Waitna ba upla nani mihta ra ai mangkan kabia.

⁴⁵ Sakuna witin aisi kan ba dukiara ai disaipilka nani tânka briras, kan Gâd mita witin nani ra adar yabras kan baha tânka ba briaia; witin nani sin sibrin dauki kan, dîa Jisas aisin ba tânka param saki wibia dukiara makabaia.

¿Ya ba kau tara sa?

⁴⁶ Bamna disaipil nani pana pana blahwi kata, ya ba kau tara kabia sapa dukiara.

⁴⁷ Baha nani ai kupia ra luki kan ba Jisas kaikan, bara witin tuktan kum ai lamara brih,

⁴⁸ naku win: —Ya yang nini ra luki naha tuktika na bribia kaka, yang ai brisa; bara ya yang ai bri ba, ai blikan ba ra sin brisa. Bamna ani uplika man nani tilamra kau mâyara kulkan ba, baha sika kau tara ba.

Ya wan mapara apia ba, baha lika wan hilpka sa

⁴⁹ Bara Jan bila Jisas ra: —Smasmalkra, yang nani kaikri nahki waitna kum man ninam brih, pirit saura nani kangbi saki kan. Bara yang nani wîri baha takaskbia, kan witin yawan aikuki taukras sa.

⁵⁰ Sakuna Jisas bila: —Man nani bui witin ba takaskaia trai munpara; kan yawan mapara apia ba, yawan wan hilpka sa.

Jisas mita Jems bara Jan wal ra lawi daukisa

⁵¹ Jisas kasbrika purara brih waia ba piua pat baila kan ba ra, ai kupia karna brih Jerusalem ra tawi wan.

⁵² Witin mita ai kainara tila upla blikan. Bara witin nani Sameria tawanka lupia kumi ra diman, takaskaia pliska kum ridi daukaia dukiara.

⁵³ Sakuna Sameria uplika nani mita Jisas ba ai tawanka ra want sa win, witin Jerusalem ra auya kan ba mita.

⁵⁴ Ai disaipilka nani Jems bara Jan wal naha kaikan ba ra, naku win: —Dawan, ¿man want sma ki yang nani kasbrika purara ba wina pauta klauhan paiwamna naha nani sut âpu daukaia?

⁵⁵ Sakuna Jisas witin nani ra tawi kaiki, lawi daukan.

⁵⁶ Baha ningkara, witin nani tawan sirpi wala ra wan.

Jisas nina blikaia want kan nani ba

⁵⁷ Witin nani yabalku auya kan ba ra, waitna kum Jisas ra win: —Dawan, ninam blikaia want sna ansa ansara wama ba ra.

⁵⁸ Jisas pana win: —Sikiski nani ai watla nani brisa, tnawira nani sin ai watla nani brisa; sakuna Upla Luhpia Waitna ba lika ai lal kahbaika sin briras sa.

⁵⁹ Bara Jisas mita wala ra win: —Nini blîks. Sakuna witin bila: —Dawan, ai swis yang wih aisiki pas bikamna.

⁶⁰ Sakuna Jisas pana win: —Swis pruan nani ai pruanka nani ba bikbia; sakuna man lika Gâd king aimaki lâka sturka ba upla nani ra wih maisa paks.

⁶¹ Bara wala kum bila: —Dawan, ninam blikaia want sna, sakuna ai swis yang waitla uplika nani ra pas aisabi wimna.

⁶² Sakuna Jisas pana win: —Ya ai mihta ra tasba tukbaika alkan ningkara, witin ai nina ra tawi kaiki ba, baha lika Gâd king aimaki ba lâka mapa ra pain apia sa.