Luk 6 - DAWAN BÎLA AISKA

Disaipil nani ris yua ra plawar mâ wahbisa

¹ Ris yua kum ra, Jisas ba insla mangkan nani bâk auya kan ba ra, ai disaipilka nani lika plawar mâ wihta nani dakbi, ai mihta ni titikbi, taya ba saki, mâ ba pi kan.

² Baku kan ba ra, parisi tila mita makabi walan: —¿Dîa kan man nani wark daukisma, ris yua ra daukaia lâ apia ba?

³ Jisas mita pana baha nani ra win: —¿Man nani aisi kaikras ki yu kum Debit daukan ba, ai uplika nani wal plun dauki kan ba ra?

⁴ Witin lika Gâd watla ra dimi, yamni munan britka nani bahara kahbi swin kan ba brih pin; bara ai uplika nani ra sin baha yaban. Baha britka nani ba prîs nani baman piaia lâ bri kan.

⁵ Kau sin win: —Upla Luhpia Waitna ba ris yua purara sin karnika brisa.

Waitna mihta lâwan ba

⁶ Ris yua wala ra, Jisas Ju nani priaska watla ra dimi smalki kata. Bahara waitna kum kan, mihta aihkika ba lâwan kan.

⁷ Lâ Smasmalkra nani bara parisi nani sut Jisas ra aihwaki kaiki kan, ris yua ra baha waitnika ba rakbia sapa, bara baku sip kabia dahra kwahkaia.

⁸ Sakuna Jisas baha nani dîa luki kan ba sut kaikan, bara mihta lâwan waitnika ra win: —Man naha lilapas kat bal bus. Waitna ba bal, lilapas kat buan.

⁹ Baku mika Jisas mita wala nani ra win: —Yang bui man nani ra diara kum mamkabi walaisna: ¿Dîa ba ris yua daukaia aitani kulkan sa, yamni, apia saura? ¿Rayaka swaki sakaia, apia kaka sauhki tikaia?

¹⁰ Jisas mita ai tnaya kir bûi banhwi nani ra tawi kaiki si, waitna ba ra naku win: —Mihtam ba sakbi bris. Witin baku daukan, ai mihta ba pain takan.

¹¹ Sakuna wala nani sut ba ai kupia kasak baikan, bara witin nani ai tilara pana pana makabi wali kata, Jisas mapara dîa daukaia sapa.

Jisas disaipil nani 12 ba bâk sakisa

¹² Baha piua nani ra Jisas il kum ra uli wan ai pura sunaia, bara witin tihmia aiska Gâd ra ai pura sunan.

¹³ Yu baiwan ba ra, witin ai disaipilka nani ba paiwi, 12 nani ba wahbi saki, apastil nani mâkan.

¹⁴ Baha nani sika: Saiman, nina wala Pita mâki ba; Saiman muihnika Andru ba; Jems bara Jan, Pilip bara Bartolomiu;

¹⁵ Matiu bara Tamas; Alfeo luhpia Jems ba; Saiman Karna Mamunra ba;

¹⁶ Jems muihnika Judas ba bara Judas Iskariot ba, witinka mita Jisas kau naika waihla mihta ra mangkan ba.

Jisas bui upla ailal ra smalkisa

¹⁷ Jisas il ba wina bal iwi, baha nani aikuki twi langni kum ra takaskan. Bahara upla sin manis pali kata, Judia lamara tawan sirpi nani ba wina, Jerusalem wina, bara kabu un tani Tiro bara Sidón wina sin. Naha nani aidrubi balan Jisas ra walaia bara ai sikniska nani wina sin rakbia dukiara.

¹⁸ Pirit saura nani mita rausauhki kan ba sin sut rakan.

¹⁹ Upla sut want taki kan Jisas ra kangbaia, kan witin bui upla nani sut ra ai karnika ni raki kan bamna.

Lilia sari ba wal

²⁰ Jisas ai disaipilka nani ra kaiki, win: “Man nani umpira nani, liliam bas, kan Gâd king aimaki lâka ba, man nani ra maikan kabia.

²¹ “Liliam bas, man nani nanara plun mai dauki ba, kan man nani âuyapah takma bamna. “Liliam bas man nani nanara inisma nani ba, kan ningkara kiki banhwi kama bamna.

²² “Liliam bas man nani upla nani misbara mai kaiki ba ra, mai kangbi mai saki, bara lamhtubi, swiram dauki bahki sin mai alki diara saura baku mai munbia, Upla Luhpia Waitna tâwan.

²³ Baha piua liliam pali bas, liliam aibanhwi bas, kan man nani kasbrika purara ba wina prisant tara brima; baha sim natka ra sika baha uplika nani damika nani mita prapit nani ra saura munan.

²⁴ “¡Sakuna, alai kabia baha nani yuyakira ba, kan witin nani pat lilia bri banhwan bamna!

²⁵ “¡Alai kabia man nani ra nanara âmyapah brisma ba, kan man nani plun mai dauki kabia bamna! “¡Alai kabia man nani ra, nanara kiki banhwisma ba, kan man nani sari ini banhwi kama!

²⁶ “¡Alai kabia man nani ra, tasba aiska mita mamyunbia ba ra, kan ai damika nani mita baku sika daukan ba prapit kuninkira nani ra!

Wan waihla nani ra latwan kaikaia ba

²⁷ “Yang ra ai walisma nani ra lika mai wisna: Waihlam nani wal lamtwan bas, misbara mai kaiki nani ra yamni muns,

²⁸ lamhtubi nani ra pana yamni muns, swiram dauki nani ba dukiara puram suns.

²⁹ Ya kra mita mamwan tanhtika kumi ra mai prukbia kaka, mawan tanhtika wala ba sin laki yas mai prukbia; ya kra mita prâmka pura tani ba mihtam dakbi brih wabia kaka, prâmka pali ba sin yas brih wabia.

³⁰ Upla mita dîa mamkabia ba, yas; upla mita dukiam mihtam dakbia kaka, kli maikbia makapara.

³¹ Upla mita man nani ra daukbia want sma ba, baha sika man nani mita upla wala ra daukaia sma ba.

³² “Man nani ra latwan mai kaiki nani ra baman latwan kaikisma kaka, ¿baha ba dîa yamni daukisma ki? Kan saurakira nani sin baha daukisa.

³³ Baku sin, yamni mai muni uplika ra baman yamni munisma kaka, ¿baha ba dîa yamni daukisma ki? Kan upla saura nani sin baku daukisa.

³⁴ Bara diara sin upla ra lin munisma kaka witin wina kli diara briaia luki, ¿baha ba dîa yamni daukisma ki? Kan upla saura nani ba ai tahkia ra diara lin munisa, bara bîla kaikisa baha nani wina kli diara briaia.

³⁵ Sakuna man nani lika waihlam nani ra latwan kaikaia sma, yamni sin munaia, bara diara lin munisma kaka, kli briaia bîla kaikpara. Baku lika mamna tara brima, bara Gâd Laih Purara iwi ba luhpia nani kama, kan witin lika latwankira sa, tingki lukras nani bara saurakira nani mapa ra sin.

³⁶ Man nani kupiam swapnikira bas, man nani Aisikam kupia swapni ba baku.

Upla wala lâka aisi daukpara

³⁷ “Upla wala lâka aisi daukpara, baku mika Gâd bui man nani lâmka aisi daukbia apia. Upla wala pât ra dingkpara, baku mika Gâd bui man nani pât ra mai dingkbia apia. Upla nani pâtka swih tiks, baku mika Gâd bui man nani pâtkam swih tikbia.

³⁸ Yas upla wala nani ra, bara Gâd bui pana man nani ra maikbia. Pakitkam ra aitani pali maikbia, lasbi, singbi, bara banhki pali. Gâd bui man nani ra mai kulkan kabia, dîa kulkanka wal pana upla wala ra kulkma ba.”

³⁹ Jisas naha maprika sturka na aisin: “¿Blain kum mita sip sa ki blain wala ra tâ briaia? Apia pali. Wâlsut lika unta pakni kum ra dimbia.

⁴⁰ Disaipil kumi sin ai smasmalkra ba wal kau purara apia sa. Sakuna witin diara sut lan takbia ba ra lika, ai smasmalkra wal baku kabia.

⁴¹ “¿Dîa kan man muihkam nakra ra diara tâski yuya ba kaikisma, sakuna man namkra ra dus tara bâra ba lika sip kaikras sma?

⁴² Bara man tânkam briras sma kaka namkra ra dus tara brisma ba, ¿nahki sip kama muihkam ra wiaia: ‘Muihki, ai swis namkra ra diara yuya ba sakamna’? ¡Kuninkira! Namkra ra dus tara ba pas sâks, bara baku lika sip kama pain kaikaia, bara muihkam nakra ra diara yuya sirpi bâra ba sakaia.

Dus mâ wina tânka kaiki ba

⁴³ “Dus yamni kumi sin âpu sa mâ saura sakaia sip ba; dus saura kumi sin âpu sa ai mâ pain sakaia sip ba.

⁴⁴ Bamna dus bani ai mâ ba wina tânka kaikaia sip sa: kiaya wina upla kwah damni mâ wahbras, rahra kiaika wina sin wain mâ wahbras.

⁴⁵ Upla yamni ba sturi yamni baman aisisa, kan ai kupia ra diara pain baman bâra sa; bara upla saura ba sturi saura baman aisisa, kan saurka ba ai kupia ra sa. Bamna wan bîla ni aisi ba, wan kupia ra bri ba wina takisa.

Playa bapanka sât wâl ba

⁴⁶ “¿Dîa kan man nani bui yang ra ‘Dawan, Dawan’ ai wisma, sakuna dîa mai wisna ba lika daukras sma?

⁴⁷ Man nani ra mai wimna, baha nani yang ra aula bara bîli sin wali dauki ba ya wal baku sa:

⁴⁸ baha ba lika waitna kumi ai watla mâkan baku sa, witinka ai watla playa ba kasak pakni salhkan bara walpa purara bapan. Lisamra ba dingkan, lî ba baha watla ra karna prukan, sakuna sip batakras kan, ai watla playa ba walpa ra kasak bapan kata bamna.

⁴⁹ Sakuna ya yang bîli wali, dîa wisna ba kat daukras ba lika waitna kumi ai watla paskan ba baku sa, witinka ba ai watla playa ba kasak bapras kan; bamna lisamra dingkan ba pupuhki, ai karnika aiska ni watla ra prukan ba ra, aiska pali kauhi slingwan.”