Luk 3 - DAWAN BÎLA AISKA

Jan Tatahbra upla iwras tasbaya ra smalkisa

¹ Tiberio Rom ra pat mani 15 king tara aimaki kan, Judia ra Pontius Pailat wihta tara aimaki kan, Herod lika Galili ra, ai muihnika Pilip lika Iturea bara Traconítide kuntrika ra, bara Lisanias lika Abilene ra.

² Anás wih Keyapas wal lika prîs tara aimaki kan. Baha sim piua nani ra Sakaraya luhpia Jan lika upla iwras tasbaya ra kan, bara Gâd bui bîla smalkanka kum yan.

³ Jan lika Jordan awala lamara plis nani sut bâk impaki, upla nani ra naku win: “Man nani kupiam laks, tahbi mai daukan kaia sa. Baku mika Gâd bui saurkam nani ba swih tikbia.”

⁴ Naha na ban baku takan, prapit Aiseya naha ulban kan ba baku: “Bîla baikra kum upla iwras tasbaya ra winisa: ‘Dawan yabalka ba ridi dauks; ai yabalka kum sin wapni dauks.

⁵ Albangka nani sut yakabi prakan kabia, il tara nani bara il sirpi nani ba sut langni daukan kabia, yabal warha nani ba sut wapni daukan kabia, yabal prumhni bri bani ba sin kriki langni daukan kabia;

⁶ bamna tasba aiska swaki sakan lâka Gâd mita yabi ba kaikbia.’ ”

⁷ Upla nani Jan Tatahbra mita tahbi daukan kabia dukiara aidrubi balan kan nani ra, witin naku aisi kan: “¡Piuta kiamka nani! ¿Ya mita man nani ra maisam pakan baha pâtka tara wan lamara aula ba wina plapi swak takaia?

⁸ Diara nani dauki mariks, saurkam nani wina kupiam lakram tânka ba, bara man nani pana pana sin aisapara: ‘¡Yawan lika Ebraham kiamka!’; kan yang pali mita mai wisna, Gâd sip sa naha walpaya nani na brih, baha ni Ebraham kiamka nani daukaia.

⁹ Asa ba pat ridi sa dus nani klakaia, bamna dus bani mâ pain sakras ba klakan kabia, pauta ra sin lulkka ambia.”

¹⁰ Baku mika upla nani makabi walan: —¿Yang nani dîa daukaia sna ki?

¹¹ Jan pana win: —Ya prâk wâl bri ba, prâk âpu uplika ra kum yaia sa; ya sin plun bri ba, plun âpu uplika wal yui briaia sa.

¹² Rom ra blikaia lal mana saki nani tila ba sin balan, Jan mita tahbi daukbia wisi, bara baha nani Jan ra makabi walan: —Smasmalkra, ¿yang nani dîa daukaia sna ki?

¹³ Jan bila baha nani ra: —Lal mana sakisma ba lâ ba kat sâks, kau pura lika apia.

¹⁴ Suldiar tila nani sin makabi walan: —¿Yang nani dîa daukaia sna ki? Bara Jan bila: —Upla kumi ra sin taibi, apia kaka, diara saura daukan wisi, lalahka dakbi bripara; mamna maiki ba kat sin aitani kulks.

¹⁵ Upla nani ai kupia sâp apia bîla kaiki kata, kan witin nani luki kan Jan ba ban Misaya sapa.

¹⁶ Sakuna Jan baha nani sut ra wisata: “Kasak pali, yang lika upla ra lî ni baman tahbi daukisna; sakuna kum aula, witin lika upla ra tahbi daukbia Spirit Holikira ni, pauta ni sin. Yang wal witinka ba kau karnika brisa bamna, ai sûska awa pan lanhkaia aitani apia sna.

¹⁷ Mâ singbi sakaika ba witin ai mihta ra brisa, plawar mâ ba klin daukaia, bara taya nani ba sin sait ra sakaia. Plawar mâ nani ba ai pata watla ra auhbia, sakuna taya nani ba lika pauta ra angkbia, baha pautika ban kaia ra sip dasras ba ra.”

¹⁸ Naku natka ni, bara kupia kraukanka sât wala uya ni, Jan mita upla nani ra sturi yamni ba smalki kan.

¹⁹ Baha purkara, wihta tara Herod ra sin lawi daukan, witin ai muihni Pilip maya Herodías wal bri kan, diara saura wala uya sin daukan bamna.

²⁰ Sakuna Herod baha nani alki briaia watlika ra diara saura wala sin daukan, bara Jan ba silak ra mangkan.

Jisas tahbi daukan ba

²¹ Naha kainara, Jan upla nani tahbi dauki kan, Jisas sin tahbi daukan kata; witin ai pura suni kan, kasbrika pura ba kwawan,

²² bara Spirit Holikira ba latan kaikan butku baku witin purara bal iwan, bara bîla baikra kum kasbrika pura ba wina takan, naku win: —Man ba yang Luhpi laitwankira sma, bâk mai saki mai briri.

Jisas Kraist ya atia wina bal takan

²³ Jisas ai warkka tâ krikan, 30 mani bri kan. Upla nani luki kan witin ba Josep luhpia, bara Josep ba lika Elí luhpia;

²⁴ Elí ba Matat luhpia, Matat ba Libia luhpia, Libia ba Melquí luhpia, Melquí ba Janai luhpia, Janai ba Josep luhpia;

²⁵ Josep ba Matatías luhpia, Matatías ba Emus luhpia, Emus ba Nahum luhpia, Nahum ba Eslai luhpia, Eslai ba Nagai luhpia;

²⁶ Nagai ba Máhat luhpia, Máhat ba Matatías luhpia, Matatías ba Semeí luhpia, Semeí lika Josec luhpia, Josec ba Juda luhpia;

²⁷ bara Juda ba Johanán luhpia, Johanán ba Risá luhpia, Risá lika Zorobabel luhpia, Zorobabel ba Salatiel luhpia, Salatiel ba Nerí luhpia;

²⁸ Nerí ba Melquí luhpia, Melquí lika Adai luhpia, bamna Adai ba Cosam luhpia kata, Cosam ba Elmedam luhpia kan, Elmedam ba Er luhpia kata;

²⁹ Er ba Jisas luhpia, Jisas ba Eliézer luhpia, Eliézer ba Jorim luhpia, Jorim ba Matat luhpia;

³⁰ Matat ba Libai luhpia kata, bara Libai ba Simian luhpia kata, Simian ba Judas luhpia, Judas ba Josep luhpia, Josep lika Jonam luhpia kata, Jonam ba Eliaquim luhpia;

³¹ Eliaquim ba Meleá luhpia, bara Meleá ba Mená luhpia, Mená ba Matatá luhpia, Matatá lika Natán luhpia;

³² Natán ba Debit luhpia, Debit ba Jesé luhpia, Jesé ba Abid luhpia kata, bara Abid ba Booz luhpia, Booz ba Salmón luhpia, Salmón ba Nahasón luhpia,

³³ Nahasón ba Aminadab luhpia kata, bara Aminadab ba Admín luhpia, Admín ba Arnai luhpia, Arnai ba Hesrón luhpia, Hesrón lika Fares luhpia, Fares ba Juda luhpia;

³⁴ bara Juda ba Jekob luhpia, Jekob lika Aisak luhpia, Aisak ba Ebraham luhpia, Ebraham ba Térah luhpia, Térah ba Nahor luhpia;

³⁵ Nahor ba Serug luhpia, Serug ba Reú luhpia, Reú ba Péleg luhpia, Péleg ba Éber luhpia, Éber ba Sélah luhpia;

³⁶ Sélah ba Kenan luhpia, Cainán ba Arfaxad luhpia, Arfaxad Sem luhpia, Sem ba Noa luhpia, Noa ba Lámec luhpia;

³⁷ Lámec lika Matusalén luhpia, Matusalén ba Henoc luhpia kata, bara Henoc ba Jéred luhpia, Jéred ba Mahalalel luhpia, Mahalalel ba Cainán luhpia;

³⁸ Cainán ba Enós luhpia kata, bara Enós ba Set luhpia, Set ba Adam luhpia, bara Adam ba Gâd luhpia.