Luk 23 - DAWAN BÎLA AISKA

Jisas Pailat mawanra

¹ Baha nani sut buan, bara Jisas ba Pailat mawanra brih wan.

² Bahara witin nani mahka Jisas dahra saki, naku wisata: —Yang nani naha waitnika na saki banhri wan uplika nani kupia warbi muni kan. Witin bila, Rom kingka Sisar ra lal mana aibapi banhwamna apia, bara sin wisa witin ba Misaya, wibia kaka, king kum sa.

³ Bara Pailat mita makabi walan: —¿Man sma ki Ju nani Kingka ba? Jisas pana win: —Man aisaram ba baku sa.

⁴ Bamna Pailat prîs tara nani ra bara upla sut ra sin win: —Yang naha waitnika na ra pât kumi sin sakras pali.

⁵ Sakuna witin nani ai tâ baiki pali aisin: —Witin ai smalkanka ni Judia aiska ba kupia warbi munisa, Galili ba wina ban naha pali kat sin baku daukisa.

Jisas Herod mawanra

⁶ Pailat naha walan ba ra, makabi walan naha waitnika na Galili wina sapa.

⁷ Witin nani âu win ba ra, Galili wihtka tara Herod ra blikan wan, baha piua nani ra witin sin Jerusalem ra kan bamna.

⁸ Herod lika Jisas kaikan ba ra, lilia pali takan, kan piua wihka witin kaikan dauki kan, bamna witin dukiara walan kan bara sin luki kan sain aihka kum pan daukka kaikaia.

⁹ Diara uya makabi walan, sakuna Jisas pana diara aisaras kata.

¹⁰ Baku sin bahara kata prîs tara nani bara Lâ Smasmalkra nani, bara witin nani karna pali ai dahra saki aisi kata.

¹¹ Ba ningkara Herod bara ai suldiarka nani aikuki bahki pali kulkata bara witin ra lawaska kikaia wisi, bamna kwala pranakira pali sin dingkan king baku. Ningkara, Herod mita witin ba kli Pailat ra blikan.

¹² Baha piua wina, Pailat ba Herod wal ai uplika takan, kaina piua ra lika wal ai waihla kan bamna.

Jisas lâka daukan ikaia dukiara

¹³ Bamna Pailat mita prîs tara nani, wihta nani bara upla nani sut asla paiwi,

¹⁴ naku win: —Man nani naha waitnika bri balram ba ra, ai wiram nahki witin mita upla nani kupia warbi munisa, bamna yang bui man nani mamwanra makabi walri, kuna kaikram yang bui witin swakwanka kumi sin sakras, man nani dahra kwahki aisisma ba.

¹⁵ Herod mita sin diara sakras, bara kli yawan ra blikan sa. Bamna kaikisma, witin pruaia pâtka kumi sin daukras sa.

¹⁶ Bamna yang wipi muni, lanhkamna.

¹⁷ [Lilia piua tara ra, Pailat silak uplika kum uplika nani ra lanhki yaia lâ bri kata, ai natka kan baku.]

¹⁸ Sakuna sut mahka ai tâ baiki winan: —¡Naha waitnika kaikan wan daukras! ¡Barabas lika pri sâks!

¹⁹ Naha Barabaska na silak ra mangkan kata, witin tawan ra war bukan bara upla nani sin ikan bamna.

²⁰ Pailat Jisas ba pri sakaia want kan bamna, witin nani ra kli aisin;

²¹ sakuna witin nani kau ai tâ baiki winan: —¡Dus prihni ra sas! ¡Dus prihni ra sas!

²² Naha kira aima yumhpa Pailat mita win: —¿Bamna dîa saura daukan sa ki? Pruaia pâtka kumi sin witin ra yang sakras sni. Yang wipamni ningkara, pri sakamna.

²³ Sakuna witin nani ai tâ baiki wini, makabi kan dus prihni ra sabia. Witin nani taibi wini kan, bamna dîa witin nani want kan ba kat brin.

²⁴ Pailat wilin takan witin nani dîa makabi kan ba kat daukaia,

²⁵ bara baku, witin nani makaban waitnika ba pri sakan, witinka tawan ra war bukata ba bara upla nani sin ikan ba, sakuna Jisas lika witin nani want kan ba kat daukaia yan.

Jisas dus ra saban ba

²⁶ Jisas ba dus ra sabaia brih auya kan ba ra, Cirene wina waitnika kum wal prawan nina Saiman bara baha ba alki banhwan; witinka ba tawan sirpi kum wina aula kan, bara dus prihni ba witin ra yan twilkaia Jisas nina tani ra.

²⁷ Upla ailal ai nina bliki kan, mairin nani sin ini, sarikira pali witin dukiara wini banhwi kata.

²⁸ Sakuna Jisas baha nani ra tawi kaiki, naku win: —Jerusalem mairka nani, yang puri mata inpara, sakuna man nani puram mata ins, bara luhpiam nani pura mata ini banhs.

²⁹ Kan piua nani ba balbia ba ra, naku wibia: ‘Yamni pali sa baha mairka nani sip luhpa baikras ba, sip kwihra tiwras kan ba, bara ai luhpia ra sin tiala dakakras kan nani ba.’

³⁰ Baha piua ra upla nani ba il nani ra wibia: ‘¡Yang nani purira kauhs!’; il sirpi nani ra sin wibia: ‘¡Yang nani puri biks!’

³¹ Bamna dus kura lupia ra naha diara sut na muni kaka, ¿dus lâwan ra dîa mika munras kabia ki?

³² Saura dadaukra wâl sin brih auya kata, Jisas wal ikaia.

³³ Witin nani Lalkamhka mâki ba tasbaya ra balan ba ra, Jisas ba dus prihni ra saban, saura dadaukra wâl ba sin: kumi ba aihkika tani ra, wala ba smihka tani ra.

³⁴ Witin nani dus prihni ra sabi kan ba ra, Jisas bila: —Aisa, naha pâtka na witin nani ra ban swih tiks, kan witin nani dîa dauki sapa ai tânka briras. Bamna suldiar nani Jisas kwalka ba yaura tawbia sapa kaikaia, lat lulkan.

³⁵ Upla nani sin bahara bûi kaiki kata, wihta tara nani mita sin ai lawaska kiki, naku aisi kan: —Upla wala nani ra swaki sakan; bamna nanara witin swak takbia, witin ba kasak Misaya sa kaka, Gâd mita bâk sakan ba.

³⁶ Suldiar nani sin ai lawaska kiki, ai lamara bal, wain swahwan yan diaia.

³⁷ Witin nani sin wi kata: —¡Man ba kasak Ju nani Kingka sma kaka, man silp swak taks!

³⁸ Wauhtaya kumi ulbi witin lal purara mangkan kata ba ra baha ba naku kata: “Naha sika Ju nani kingka.”

³⁹ Saura dadaukra nani witin aikuki dus ra paman kan ba wina kumika mita witin ra swira dauki, naku wi kata: —¡Man ba Misaya kaka, wînam swak sâks bara yang nani na sin swaki ai sâks!

⁴⁰ Sakuna wala ba mita ai pânika ba ra lawi dauki, win: —¿Man lika Gâd ra sibrin lukras sma ki, man sim pâtka mununhtara sma ba?

⁴¹ Man ba yang wal lika pât wahwaia aitani pali sa, kan dîa yawan daukan ba mana sika aibapi na; sakuna naha waitnika lika diara saura kumi sin daukras.

⁴² Bamna witin bila: —Jisas, man king aimaki kama ba ra, yang ra luki bas.

⁴³ Jisas pana wisata: —Kasak mai wisni, naiwa yang wal man Paradais ra kama.

Jisas ba pruan

⁴⁴ Yu ba 12 aklak kan ba ra, tihmia iwan tasba aiska ra, ban tutni 3 aklak kat.

⁴⁵ Lapta ba ai ingnika ba sakras, bara tempel ra kwala paman kan ba lilak kalwan.

⁴⁶ Bara Jisas ai bîla baikra tara winan: —¡Aisa, spiritki na man mihtam ra mangkisna! Naha aisin ningkara, witin pruan.

⁴⁷ Rom kiaptinka baha kaikan, Gâd ra mayuni, win: —Kasak pali naha waitnika na pâtkas pali kata.

⁴⁸ Upla sut aidrubi balan kan ba dîa takan ba sut kaiki kan, bara witin nani ai lama pruki, kli mahka wan.

⁴⁹ Sakuna Jisas kakaira nani sut bara mairin nani sin Galili wina ai nina bliki banhwan kan ba, laih wina naha diara nani na kaiki kata.

Jisas raiti ra bikan

⁵⁰ Waitna kasak pain kulkan waitnika kum bâra kan, ai nina ba Josep, witinka ba Judia tawanka kum nina Arimatea wi ba wina kata. Witin na sin Ju lâ dadaukra wihtka nani kum kata.

⁵¹ Naha Josep lika Gâd king aimaki lâka bîla kaiki kata, bamna witin lâ wihtka nani dîa dauki kan ba tilara dimras kan.

⁵² Bamna witin Pailat ra wih, Jisas wîna tara ba makaban.

⁵³ Dus prihni wina lahbi ikan ba ra, kwalyapa kum ni karbi, walpa ni daukan raitka kum ra tnikan bara bahara kau upla kumi sin bikras kata.

⁵⁴ Baha piua ba lika ris yua ba dukiara ridi takaia kan, bara piua ba pat baila kata.

⁵⁵ Mairin nani Jisas wal Galili wina balan kan ba sin wan, raiti ba sin kaikan bara wîna tara sin nahki tnikan ba sut pain pali kaikata.

⁵⁶ Ai watla ra kli tawi balan ba ra, isint kîa pain nani bara batana nani sin ridi daukan. Ris briaia lâka ulban ba kat mairin nani ba baku daukan,