Luk 22 - DAWAN BÎLA AISKA

Jisas alkaia dukiara mapara buan ba

¹ Brit îs mangkras piaia piua tara ba pat baila kan, Insal luan Yua Liliaka wi ba.

² Prîs wihta tara nani bara Lâ Smasmalkra nani sut pliki kan, nahki Jisas ba ikaia, kuna upla nani ra sibrin luki kata.

³ Bamna Sitan ba Judas kupia ra diman, witinka ba apastil 12 ba wina kumi kata, ai nina ba Iskariot mâki banhwi kata.

⁴ Bamna naha mita prîs wihta nani ra, bara tempel kiaptinka nani ra wih aisin, nahki Jisas ba baha nani mihta ra mangkaia.

⁵ Witin nani lilia taki bara Judas ra lalah yaia sin pramis munan;

⁶ Judas aitani lukan, bamna baha piua wina mahka sans pliki kan, nahki Jisas ba witin nani mihta ra mangkaia, upla wala nani nu apia kaka.

Jisas tutni pata pin ba

⁷ Brit îs âpu piaia piua tara ba balan, bahara sika Insal luan sîpka ba sakripais daukaia kata.

⁸ Bamna Jisas mita Pita bara Jan wal blikan wan, bara naku win: —Man nani was, Insal luan Yua Liliaka dukiara tutni pata ba ridi dauki bas.

⁹ Witin nani makabi walan: —¿Anira want sma yang nani ridi daukamna?

¹⁰ Jisas pana win: —Man nani tawan ra dimma ba ra, kaikma waitna kum lî watla twilki auya kabia. Witin nina blîks ani watla ra wih dimbia ba kat.

¹¹ Baha watla dawanka ra wis: ‘Smasmalkra ba mai wisa: ¿Ani rumka ra yang disaipilki nani aikuki Insal luan Yua Liliaka tutnika pata ba piaia?’

¹² Bamna mamrikbia purara rum tara kum pat ridi daukan sa; bahara tutni pata ba ridi dauks.

¹³ Witin nani wan ba ra, diara nani dukiara Jisas win ba sut wal prawan, bamna Insal luan Yua Liliaka tutnika pata ba ridi daukan.

¹⁴ Awarka balan piua ra, Jisas ai disaipilka sut aikuki tibil ra iwan.

¹⁵ Jisas mita wisata: —¡Yang brin ai dauki pali kan naha Insal luan Yua Liliaka tutnika pata na man nani wal piaia, kau pruras sna ba ra!

¹⁶ Bamna yang mai wisni, kli man nani wal nahmuna pata pimna apia, Gâd King aimaki lâka ba aimakbia ba kat.

¹⁷ Baku bamna, Jisas ai mihta ra kâp kum brih, tingki wih, ningkara naku win: —Naha na brih, man nani tilamra yui bris;

¹⁸ kan yang mai wisni, wain kiwka mâ ba wina kli dimna apia, Gâd king aimaki lâka ba balbia kat.

¹⁹ Baha ningkara, brit ba ai mihta ra brih, tingki wih, kriki, disaipil nani ra yabi, win: —Naha sika wîni tara, man nani sut dukiamra yan kabia ba. Naha na yang ra luki, dauki bas.

²⁰ Kâp ba wal sin baku daukan plun pin ningkara, bara naku wisata: —Naha kapka na sika lâ raya daukan ba yang tâilia mita, bara sut dukiamra laiwi ba.

²¹ Sakuna nanara waihli mihta ra ai mangkaia waitnika ba yang wal tibil ra nâra sa,

²² bamna Upla Luhpia Waitna auya witin ra mairikan yabalka ba bâk. ¡Sakuna waihli mihta ra ai mangkuya waitnika ba mapara lika alai pali kabia!

²³ Bara disaipil nani ba pana pana ai walka ra tawi makabi walan, ya pali mita waihla mihta ra mangkuya sapa.

Ya kau tara kabia dukiara blahwanka ba

²⁴ Disaipil nani ai tilara blahwan kum bri kan, baha ba lika ya kau tara kulkan kabia dukiara.

²⁵ Sakuna Jisas mita win: “Idan nani kingka nani ba lika dawan baku baha nani ba purara aimakisa, bara witin nani wihtka ba yamni dadaukra nani mâkisa.

²⁶ Sakuna man nani lika baku kaia apia sma; ya man nani tilamra tara kulkan ba, witin lika kau wahma baku kaia sa; ya sin lal baku kulkan ba, witin ba upla wala dukia dadaukra takaia sa.

²⁷ Bamna, ¿ya ba kau tara kulkan sa ki, witinka tibil ra iwi plun piaia ba, apia kaka, plun tibil ra iwi ba? ¿Kasak apia witinka tibil ra iwi ba? Sakuna yang lika man nani tilamra sna, sim dukia dadaukra baku.

²⁸ “Man nani sika piu bani yang wal ban sma ba, traiki kaikanka nani tilara.

²⁹ Baha mita, yang bui man nani ra king lâka kum maikaisna, Aisiki mita yang ra aikan ba baku.

³⁰ Man nani plun pima, diara sin dima yang tibilki ra king aimakaisna ba ra, bara king iwaika nani ra iwi, Israel kiamka 12 ba lâka sin daukma.”

Jisas Pita witin ra kulkras wibia dahra sakisa

³¹ Bara Dawan naha sin aisin: —Saiman, Saiman, kaiks Sitan man nani ba makaban sa sim plawar mâ baku mai singbaia dukiara.

³² Sakuna yang bui man dukiamra puri sunri, kasak lukankam ba tiwaia apia. Man kli tawi balma ba ra, muihkam nani tâ baiks.

³³ Saiman bila: —Dawan, yang ridi sni man wal silak ra waia, bara pruaia sin.

³⁴ Bamna Jisas bila: —Pita, yang mai wisna, man naiwa kau kalila wainhka aiwanras ba ra, aima yumhpa wima yang ai kaikras.

Pât wahwaia pat baila kan ba

³⁵ Jisas disaipil nani ra makabi walan: —Yang bui man nani ra sakbat âpu, lalah watla âpu, sûs sin âpu mai blikri waram ba ra, ¿diara luha apia kapram ki? Bara witin nani bila: —Diara kumi sin apia.

³⁶ Bamna witin bila: —Nanara lika, ya sakbat brisa kaka, baha brih waia sa, lalah watla bri kaka sin; ya sord âpu kaka, ai prâka tara ba wauhi atki, kum atki bribia.

³⁷ Kan man nani ra mai wisni Ulbanka nani naha aisi ba sut yang ra ban aimakaia sa: ‘Witin ba watawikira nani tilara kulkan sa.’ Bamna dîa dîa yang dukira ulban ba, aimakaia sa.

³⁸ Witin nani aisin: —Dawan, sord wâl nâra sa. Bamna Jisas pana win: —Baha kat takasks.

Jisas Getsemani ra ai pura sunisa

³⁹ Jisas baha wina taki, ai natka kan ba baku, witin Olivet ilka ra wan; disaipil nani sin ai nina bliki wata.

⁴⁰ Baha pliska ra balan ba ra, witin bila: —Man nani puram suns, traika kaikan ra kauhmara sîa.

⁴¹ Ningkara, Jisas witin nani wina dakwi takan, sim walpa kum lulkan praiska ba baku, bara bahara witin ai lula krikan ai pura sunaia.

⁴² Witin bila: “Aisa, man wilin sma kaka, pât wahwaia sna ba wina swaki ai sâks, sakuna yang kupi lâka kat lika kabiara, kuna man kupiam lâka kat mika.” [

⁴³ Bamna kasbrika pura ba wina insal kum balan, witin ra tâ baikaia.

⁴⁴ Bara baku mika witin uya pali pât wahwi kan ba tilara, kau ai tâ baiki ai pura suni kata, bara ai laptika ba tala tahwan tara baku tasba ra tahwi kata.]

⁴⁵ Witin ai pura suni kan ba wina bûi, disaipil nani ra wan, bara baha nani yapi kan sakan, sari mita pura luan kan bamna.

⁴⁶ Bara witin bila: —¿Dîa kan man nani yapisma ki? Man nani bus, puram sin suns, traika kaikan ra kauhmara sîa.

Jisas alki silak ra brih auya

⁴⁷ Jisas kau aisi kan ba ra, upla ailal pali balan. Disaipil 12 ba wina kumi nina Judas mâki kan ba sika baha uplika nani tâ brih aula kan, bamna witin Jisas lamara balan kiawalaia.

⁴⁸ Baku mika, Jisas bila: —Judas, ¿kiawalanka kumi ni Upla Luhpia Waitna na waihla mihta ra mangkisma ki?

⁴⁹ Baha nani Jisas wal kan ba, diara nani taki kan ba kaikan, makabi walan: —Dawan, ¿yang nani sord ni mapara aiklabamna ki?

⁵⁰ Witin nani wina kum mita prîs nani wihtka albika kum ra klaki, kiama aihkika ba taih dakban.

⁵¹ Sakuna Jisas bila: —Ban swis; pat aitani daukram sa. Bamna Jisas mita albika ba kiama ra kangbi, rakan.

⁵² Ningkara, Jisas prîs tara nani ra, tempel kiaptinka nani ra bara wihta almuk nani ra, witinka nani witin ra alkaia balan ba ra win: —¿Man nani bal takram sord nani bara dus nani kira, yang na âimplikra kapri kan baku?

⁵³ Yang yu bani man nani wal tempel ra katna piua ra, wiria sin ai kangbras kapram; sakuna naha na man nani awarkam sika, tihmia mita pura lui ba.

Pita Jisas kaikras wisa

⁵⁴ Bamna witin nani mita Jisas ba priski brih wan prîs tara watla ra; Pita lika laih wina nina bliki kan.

⁵⁵ Utla lamara pauta kum mukan, bara baha kir iwan. Pita sin baha nani tilara iwan.

⁵⁶ Bamna dukia dadaukra mairka kum Pita pauta mukan ba tnaya un ra iwi kan kaiki, witin kat aman pali kaiki si, naku wisata: —Naha waitnika sin witin wal kata.

⁵⁷ Sakuna Pita apia wisi, naku win: —Mairin, witin ba yang kaikras.

⁵⁸ Wiria ningkara, wala kum bal kaiki, wisata: —Man sin baha nani wina kum sma. Sakuna Pita bila: —Apia, yang baha apia sni.

⁵⁹ Awar kum luan prais ba ra, kli wala kum bal karna aisi, wisata: —Kasak, naha waitnika sin witin ba wal kata, kan witin na sin Galili wina sa.

⁶⁰ Sakuna Pita bila: —Waitna, dîa dukiara pali aisaram sapa yang tânka briras. Baha sim piua ra, kau Pita aisi kan ba ra, kalila wainhka kum aiwanan.

⁶¹ Dawan tawi Pita kat kaikan, bara Pita ai kupia krawan, Dawan bui witin ra dîa wisata ba dukiara: “Naiwa kau kalila wainhka aiwanras ba ra, pat aima yumhpa ai kaikras wima.”

⁶² Bamna Pita latara taki, sarikira ai nakra laya sakan.

Jisas lawaska kiki banhwisa

⁶³ Waitna nani Jisas main kaiki bri kan ba ai lawaska kiki, witin ra sin pruki, latwan yaban.

⁶⁴ Nakra nani sin praki, makabi walan: —¡Ai wis ya mita mai prukan!

⁶⁵ Bara diara wala uya witin mapara aisi, swira dauki kata.

Jisas lâ wihtka tara nani mawanra

⁶⁶ Bamna yu baiwan kan, Ju almukka nani, prîs tara nani bara Lâ Smasmalkra nani sut asla aidruban, bara Jisas ba lâ wihta tara nani mawanra brih wan. Bahara witin ra makabi walan:

⁶⁷ —Wan wis, ¿man ba Misaya ki? Witin bila: —Yang âu mai wimna kaka sin, man nani kasak ai kulkma apia.

⁶⁸ Bara diara makabi walamna kaka, man nani pana ai wima apia.

⁶⁹ Sakuna naha piua wina, Upla Luhpia Waitna ba, Gâd karnika sut bri ba mihta aihkika ra iwi kabia.

⁷⁰ Bamna sut mita makabi walan: —Ban kaka, ¿man na Gâd Luhpia? Jisas pana wisata: —Âu, yang sna, man nani aisaram ba baku.

⁷¹ Baku bamna, witin nani bila: —¿Dîa kan yawan witnis nani kau briaia sa ki? Witin bîla wina yawan walan sa.