Luk 21 - DAWAN BÎLA AISKA

Piarka mairin umpira ai prisantka yan ba

¹ Jisas tempel ra kaikan, lalah auhbaia watla ra yuyakira nani lalah mangki kan.

² Witin sin kaikan, piarka mairin umpira kumi lalah sint wâl mangkan.

³ Baku mika, Jisas bila: —Kasak mai wisna, naha piarka mairin umpira na kau mangkan, wala nani sut ba wal.

⁴ Kan baha nani yabi ba lika, ai dukia nani bri ba wina kau tâka takaskan ba sika; sakuna piarka mairin na, ai umpirka ra, raya kaia dukia lupia bri kan ba sut pali yan.

Jisas bila tempel ba sauhki tikan kabia

⁵ Upla tila mita tempel ba dukiara aisi kan, tempel walpaya nahki painkira nani ba ni skahkan ba dukiara, bara diara sât sât upla nani ai prisantka yan kan ba dukiara sin. Bamna Jisas bila:

⁶ —Yua nani balbia ba ra, naha diara nani man nani kaikisma na sut sauhki tikan kabia, bara walpa kumi sin walpa wala purara ban swin kabia apia.

Tnata piua kainara sainka nani ba

⁷ Bara makabi walan Jisas ra: —Smasmalkra, ¿ahkia naha diara na takbia? ¿Naha dukia nani takaia sainka nani ba ani kabia?

⁸ Jisas bila: “Aman kaiki bas, yarka sin kunin mai munbiara. Upla ailal yang nini bri balbia, bara ban naku wibia: ‘Yang sika Kraist’; bara ‘Nanara sika piua ba.’ Sakuna nina blîkpara.

⁹ Man nani war nani sturka bara blahwan lâka nani sturka walma ba ra, si bripara, kan naha diara nani na pas takaia sa, sakuna tnata ba kau kabia.”

¹⁰ Bamna Jisas kau ban aisi, win: “Nisan kumi nisan wala mapara aiklabia, kuntri kumi kuntri wala mapara war daukbia.

¹¹ Tasba nikban tara nani kabia, plun tiwan bara siknis sât sât nani plis ailal ra, bara kasbrika purara diara sibrinkira nani, sain aihka nani sin kabia.

¹² “Sakuna naha diara nani sut kainara, man nani ra mai alkbia, bara ninam bliki rau mai sauhkbia. Lâmka daukaia prias watla nani ra mai brih wabia, yang nini ba tâwan silak watla ra mai mangkbia; king nani mawanra, wihta tara nani mawanra sin mai brih wabia.

¹³ Naha na man nani mampa ra sans kum kabia, yang dukira witnis aisaia.

¹⁴ Baha mita piua kainara, man nani sinskam ba ridi bri bas, witniskam aisaia wisi trabil taki lukma apia ba dukiara,

¹⁵ kan yang mita dîa aisaia sma bîla nani bara sinska lâka ba sin maikamni, bamna waihlam nani kumi sin baha mapara bubia apia, aisabia sin apia.

¹⁶ Aisikam, yaptikam, muihkam nani, tamya nani, uplikam nani sin waihlam mihta ra mai mangkbia. Man nani tilam wina kum kum mai ikan kabia,

¹⁷ yang tâiwan sin tasba aiska na misbara mai kaikbia.

¹⁸ Sakuna tâmwa ba wina mina kumi sin tiwbia apia.

¹⁹ ¡Ban bapi bûi kama kaka, raya ban kaia lâka ba brima!

²⁰ “Ani piua Jerusalem tawanka ba suldiar nani mita kutbi bri kabia ba ra, damra wali bas, sauhki tikan kaia ba baila sa.

²¹ Bamna baha nani Judia ra banhwi ba il nani ra plapi waia sa; Jerusalem tawanka bilara nani ba takaia sa, baha nani insla ra ba sin tawan ra kli bal dimaia apia sa.

²² Baha piua ba lika pât wahwaia piua nani kabia, bamna Ulbanka nani dîa aisi ba sut aimakaia sa.

²³ ¡Umpira pali kabia, mairin kwihra nani ba bara ai luhpia nani tiala dakaki ba sin! Kan tasba na ra latwan tara uya kabia, bara pât saura pali sin naha uplika nani mapara kabia.

²⁴ Upla tila nani war ra pruan kabia, bara wala nani ra lika priski brih wan kabia plis wala nani ra; bara Ju apia nani mita Jerusalem ba ai mina ni taibia, piua mangkan ba tnata alkbia ba kat.

Upla Luhpia Waitna kli balbia ba

²⁵ “Bamna sain nani takan kabia lapta ra, kati ra bara slilma nani ra sin, naha tasba ra nisan nani ba aihka aimawahkan kabia, bara sibrin tara sin takbia kabu ripka binka tara ba mita.

²⁶ Naha diara nani tasba ra takaia ba dukiara luki, upla nani kupia sin lap tiwbia; kan kasbrika purara karnika nani sut nikban kabia.

²⁷ Bâra mika, Upla Luhpia Waitna, kasbrika ra aula ba kaikbia, karnika tara bara ai prana ba wal.

²⁸ Naha diara nani na mahka takaia ba ra, kupiam karna dauki, lamla ba purara buks, kan pri sakan lâka ba pat baila sa.”

²⁹ Jisas naha maprika lilka na sin wisata: “Kwah damni dusa ba ra kaiki bas, apia kaka dus sât wala nani ra sin.

³⁰ Ai wahia nani saki kan kaikisma ba ra, man nani mita kaikma lapta piua ba pat baila sa.

³¹ Baha sim natka ra, naha diara nani takan kaikisma ba ra, damra wals Gâd King aimaki lâka ba pat baila sa.

³² “Kasak mai wisna, diara nani na sut takbia, naha piua uplika nani kau prui tiwras ba ra.

³³ Kasbrika pura ba bara tasba na sin lui wabia, sakuna yang bîli nani ba lui wabia apia.

³⁴ “Bamna aman kaiki bas, tasba brinka nani ba mita, bla lâka nani mita bara naha tasba trabilka nani mita sin yarka kupiam nani ba karna takbiara, baha piua kra damra walras kaprika mai alkbiara sîa.

³⁵ Mina alkaia kumi ai bîla prakuya ba baku kabia, naha tasba ra iwi uplika sut ra.

³⁶ Bamna man nani ridi bas, bara piu bani sin puram suni bas, bara baku mika sip kama naha diara nani takaia ba wina swakwaia, ban sin Upla Luhpia Waitna maiwanra kaia.”

³⁷ Kakna piua ra Jisas tempel ra smalki kan, kuna tihmia piua, Olivet ilka ra taki wi kan bahara takaskaia.

³⁸ Bamna upla nani sut yu bani titan pali tempel ra bali kan, Jisas smalkanka walaia.