Luk 20 - DAWAN BÎLA AISKA

Jisas karnika tânka ba

¹ Yu kumi Jisas tempel ra upla nani ra smalki kan, bara swaki sakan lâka ba dukiara sin aisi kan, prîs wihtka nani, Lâ Smasmalkra nani bara wihta almuk nani ba sin aikuki aidrubi bal,

² bara witin ra win: —Wan wis, ¿dîa karnika ni man naha diara nani daukisma? ¿Ya naha karnika na maikan sa ki?

³ Jisas pana win: —Yang mita sin man nani ra diara kum mamkabi walaisna. Bamna man nani ai wis:

⁴ ¿Ya mita Jan ba blikan upla tahbi daukaia, Gâd mita, apia kaka, upla nani mita?

⁵ Witin nani ai mânka pana pana tawi aisi, win: “¿Dîa yawan wibia ki? Gâd wina blikan wibia kaka, witin wan wibia: ‘¿Dîa kan man nani bui witin ra kasak lukras kapram?’

⁶ Bara upla nani wina yawan wibia kaka, upla sut mita walpa ni sabi wan ikbia, kan witin nani kasak lukisa, Jan dîa aisi kan ba lika Gâd wina kata.”

⁷ Bamna witin nani bila: —Yang nani kaikras ya mita Jan ba upla tahbi daukaia blikan kan sapa.

⁸ Jisas mita pana win: —Yang sin sip mai wimna apia, ya karnika ni naha diara nani daukisna ba.

Wark tatakra saura nani maprika lilka ba

⁹ Ningkara, Jisas bui upla nani ra naha maprika lilka sturka na win: “Waitna kum bâra kan, witin ai nasla ra wain mâ mangki si, ai warkka uplika nani mihta ra swi si, plis laihura impaki wan, bahara sin piu wihka takaskan.

¹⁰ Mahka mâ krikaia piua balan ba ra, ai albika kum blikan wark tatakra nani ra, insla mâ witin ra yaia kan ba makabaia, sakuna wark tatakra nani mita alba ba ra pruki, diara kumi sin yaras ban blikan wan.

¹¹ Baku mika dawanka ba mita kli alba wala blikan, sakuna naha ra lika swira dauki, pruki muni, ban diara kumi sin yaras blikan wan.

¹² Ningkara, dawanka ba kli wala blikan, sakuna wark tatakra nani mita klakan, insla ba wina sin saki lulkan.

¹³ Ban tnata ra, insla dawanka ba bila: ‘¿Dîa daukamna? Yang luhpi laitwankira ba blikamna, bamna witin nani mita kaikbia, ban kra kulkbia sapa.’

¹⁴ Sakuna wark tatakra nani witin ba kaikan ba ra, pana pana tawi aisi banhwan: ‘Naha sika ai aisika dukia briaia ba, bamna kaisa yawan bui witin ba ikaia, bara diara sut ba yawan dawanka takbia.’

¹⁵ Bamna witin nani mita insla wina saki, bri si ikan.” Bamna Jisas mita makabi walan: “¿Insla dawanka ba mita baha uplika nani wal dîa daukbia ki?

¹⁶ Witin bal, wark tatakra nani ba sut iki tikbia, bara insla ba upla wala nani mihta ra mangkbia.” Naha walan ba ra, witin nani bila: —¡Baku pali lika takbiara!

¹⁷ Sakuna Jisas baha nani ra kaiki, naku win: —Baku bamna, ¿Ulbanka ra bâra ba, dîa wiaia tânka sa ki? Naku wisa: ‘Baha walpaya utla mâmakra nani mita lulkan ba, baha sika raya wihtka takan ba.’

¹⁸ Ani uplika baha walpaya purara kauhbia kaka, kriwi pîs pîs takbia; bara pana walpa ba mita upla purara kauhbia kaka lika, yuya baman daukbia.

¹⁹ Baha sim piua ra, prîs wihtka nani bara Lâ Smasmalkra nani mita Jisas ra alkaia luki kan, witin nani kaikan baha maprika lilka aisin ba lika witin nani ai mapara kata, sakuna upla nani ra sibrin luki banhwi kan.

Lal mana aibapaia tânka ba

²⁰ Bamna biki kakaira nani blikan, baha nani upla pain talia baku, Jisas ra munka diara kum saura aisabia ba ra, wihta tara mihta ra mangkaia wisi.

²¹ Baha mita witin nani naha makabi walanka na makabi wali banhwan: —Smasmalkra, yang nani kaikisna man dîa aisi smalkisma ba kasak sa, bara man upla mawan ba sin kulkras sma, sakuna diara kasak ba bara Gâd yabalka tânka ba kat smalkisma.

²² Bamna wan wis, ¿Rom kingka ra wan lal mana aibapaia ba aitani sa, apia kaka aitani apia sa ki?

²³ Sakuna Jisas witin nani lukanka saura ba tânka brin, bamna pana naku win:

²⁴ —Ai mariks lalah mâ kum. ¿Naha mawan na bara nina sin ulban na, ya dukia? Witin nani pana win: —Sisar dukia.

²⁵ Jisas pana win: —Bamna Sisar ra yas diara nani Sisar dukia ba, bara Gâd ra yas diara nani Gâd dukia ba.

²⁶ Bamna witin nani lika Jisas ra alkaia dukia kumi sin sip sakras kan, witin bui upla mawanra dîa aisi kan ba dukiara; sakuna, aisin ba dukiara tâ iwan bara ai bîla sin prakan.

Pruan wina kli buaia dukiara makabi walan ba

²⁷ Baha ningkara, sadiusi tila nani balan Jisas kaikaia. sadiusi nani bila pruan wina kli buaia tânka ba âpu sa wisa; baku bamna, witin nani bui Jisas ra naku win:

²⁸ Smasmalkra, Moses yang nani ra naku ulbi wankan sa: waitna kum ai luhpia sakras ban prubia kaka, muihnika ba ai piarkika wal marit takbia ai luhpia nani sâkbia, ai muihni pruan ba watlika ra.

²⁹ Baku bamna, waitna 7 bâra kan, sut ai muihni atia. Almukka ba mairin kum wal marit takan, kuna luhpa sakras ban pruan.

³⁰ Witin ningkika ba ai piarkika wal marit takan, bara baha sin luhpa sakras ban pruan.

³¹ Bamna wâl ningka ba ai piarkika wal brih marit takan, bara baku sin waitna 7 ba sut mairin ba wal marit takan, bara sut sin mairin ba wal luhpa sakras ban pruan.

³² Tnata ra mairin ba sin pruan.

³³ Bamna pruan wina bubia ba ra, ¿ani pali ba wal ai maya kabia ki, kan waitna 7 ba sut mairin ba wal marit takan bamna?

³⁴ Jisas mita pana win: —Naha tasba ra lika waitna nani bara mairin nani ba marit takisa.

³⁵ Sakuna baha nani tasba wala ra waia aitani kulkan ba, bara pruan nani kli bubia piua ra, bahara lika marit takbia apia, ai luhpia mairin nani sin marit sâkbia apia,

³⁶ kli prubia apia bamna. Witin nani lika insal nani wal baku kabia, bara witin nani Gâd luhpia nani kabia pruan wina kli buan ba mita.

³⁷ Pruan wina kli buaia dukiara, Moses pali mita sin kiaya dusa sturka ba ni latan wan marikan sa. Bahara wan wisa, nahki Dawan Gâd ba Ebraham, Aisak bara Jekob Gâdka sa.

³⁸ ¡Gâd lika pruan nani Gâdka apia sa, sakuna raya nani Gâdka sika; upla sut witin dukiara raya sa!

³⁹ Bamna tila Lâ Smasmalkra mita win: —Smasmalkra, man pain pali aisaram.

⁴⁰ Bara baha wina witin nani kli Jisas ra diara makabi walaia lukras kata.

¿Misaya ba ya Luhpia sa ki?

⁴¹ Jisas baha nani ra win: —¿Nahki kan upla nani wisa, Misaya ba Debit luhpia sa?

⁴² Kan Debit pali mita Pura Sunra Lawana nani wauhkataya ra ulban sa: ‘Dawan bui yang Dawanki ra win: Mihti aihkika ra iws,

⁴³ yang mita waihlam nani sut man minam kahbaika daukamna ba kat.’

⁴⁴ ¿Bamna, nahki Kraist ba Debit kiamka kabia ki, Debit pali mita witin ra Dawan mâkisa kaka?

Jisas Lâ Smasmalkra nani dahra sakisa

⁴⁵ Upla sut wali kan Jisas ai disaipilka nani ra naha na win piua:

⁴⁶ “Aman kaiki bas Lâ Smasmalkra nani dukiara, kan witin nani lihkisa prâk yari tara dimi taukaia, bara pulaia watla nani ra upla nani ai lakula wibia; Ju nani priaska watla nani ra sin kau plis pain ba ra iwaia plikisa, bara plun piaia piua ra sin kau plis painkira nani ra iwan daukisa.

⁴⁷ Baku sin, piarka mairin nani watla nani mihta dakbisa, bara kunin baman yari ai pura sunisa. Witin nani sika kau pât tara pali bribia ba.”