Luk 18 - DAWAN BÎLA AISKA

Piarka mairin wihta kum wal maprika lilka ba

¹ Jisas naha maprika lilka na aisin, baha nani ra marikaia dukiara nahki swapras kira ai pura sunaia ba.

² Witin bila: “tawan kum ra wihta kum bâra kan, witin lika Gâd ra sibrin lukras, bara upla kum ra sin kulkras kata.

³ Baha sim tawanka ra piarka mairin kum kata, baha piarka mairin ba kli kli naha wihta ra wan, witin ai waihla kum bri kan ba wal ai wapnika daukbia wisi makabi.

⁴ Wihta na piu wihka pali, piarka mairin lâka ba wapni dauki yaia want apia kan. Kuna ningkara lukan: ‘Yang lika Gâd ra sibrin lukras, upla ra sin kulkras,

⁵ ban sakuna, naha piarka mairin ban ambuk ai muni bamna, yang lâka ba nanara wapni dauki yamna, kli bal ambuk ai munan man si, kupi alki takaski brisna ba ban tikbia apia dukiara.’ ”

⁶ Bara Dawan bila: “Wals, wihta watawikira dîa aisin ba.

⁷ ¿Ban kra lukisma Gâd bui ai uplika nani bâk saki brin ba, kakna bara tihmia witin ra wini banhwi ba wapnika daukbia apia? ¿Hilp munaia ba wina wihka takaskbia lukisma ki?

⁸ Yang mai wisni, witin takaskras kira hilp munbia. Sakuna Upla Luhpia Waitna ba balbia ba ra, ¿kasak lukan lâka ba kau naha tasba ra sâkbia lukisma ki?”

Parisi bara lal mana saki ba wal maprika lilka ba

⁹ Jisas maprika lilka wala aisin, upla tila nani dukiara witin nani lukan kau painkira sa wala nani ba wal. Witin bila:

¹⁰ “Waitna wâl tempel ra wan ai pura sunaia, kum ba parisi bara wala ba lika lal mana sasakra Rom ra yaia dukiara.

¹¹ Parisi ba lika, ai mina ra bûi, naku ai pura sunan: ‘Gâd, tingki mai wisna, kan yang lika upla wala nani baku apia sna, âimplikra, saura dadaukra, marit lâka sasauhkra, bara naha waitnika lal mana sasakra ba wal sin baku apia sna.

¹² Wik bilara aima wâl Gâd ra luki plun piras sna, bara diara sakisna bani wina matawalsip mana ba maikisna.’

¹³ Sakuna lal mana sasakra Rom ra yaia ba laihura bûi kan, ai lal buki kasbrika pura tani ra sin sip tawi kaikras kan, ban sakuna witin ai lama pruki, naku aisin: ‘¡Gâd, umpira ai kaiks, yang lika upla saura sna na!’

¹⁴ Yang mai wisni, naha lal mana sasakra na kli ai watla ra wan Gâd bui pain kulkan ba kira, sakuna parisi ba lika apia. Kan ya ai wîna tara kulki ba, mâyara ikan kabia, sakuna ya mâyara bawi ba, tara kulkan kabia.”

Jisas tuktan nani ra yamni munisa

¹⁵ Tuktan sirpi lupia nani sin Jisas ra brih aidrubi balan, ai mihta ni kangbia wisi, sakuna disaipil nani naha kaikan ba ra, lawi dauki banhwan brih balan uplika nani ra.

¹⁶ Sakuna Jisas bui paiwi, naku win: —Tuktan sirpi nani ba swis yang ra balbia, baha nani ba takaskpara, kan Gâd king aimaki lâka ba bahmuna nani dukia sa.

¹⁷ Kasak pali mai wisna, ya Gâd king aimaki lâka ba tuktan sirpi nani baku briras kaka, bahara dimbia apia.

Wahma yuyakira kum Jisas wal aisisa

¹⁸ Wihta kum Jisas ra makabi walan: —Smasmalkra yamni, ¿dîa daukamna kaka, raya ban kaia lâka ba brimna ki?

¹⁹ Jisas pana win: —¿Dîa kan yang ra yamni ai wisma ki? Yamni ba wala âpu sa, kumi baman sa, baha ba Gâd.

²⁰ Man lika Gâd lâka nani ba kaikisma: ‘Marit lâka sauhkpara; upla ikpara; implikpara; upla wala dukiara kunin aisapara; aisikam yaptikam wal ba pain kulks.’

²¹ Waitnika ba bila: —Naha diara sut na bîla wali daukri tuktan piua ba wina.

²² Jisas naha walan ba ra, witin bila: —Kau diara kumi man daukaia sma: diara brisma ba sut wauhi atks, bara upla umpira nani ra yas; baku lika man kasbrika purara yuyakam ba bri kama; bara ningkara bal, nini blîks.

²³ Sakuna waitna ba naha walan ba ra, sari pali takan, kan witin ba yuyakira kata.

²⁴ Wahma ba sari kan Jisas mita kaiki, naku win: —¡Nahki karna pali sa upla yuyakira kumi Gâd king aimaki tasbaya ra dimaia!

²⁵ Kiamil kum ba silak untika bâk dimi luaia kanra yamni sa, yuyakira Gâd king aimaki tasbaya ra dimaia ba wal.

²⁶ Baha nani naha na walan ba naku aisan: —Ban kaka, ¿ya swaki sakan kabia ki?

²⁷ Bara Jisas bila: —Upla daukaia sip apia ba, Gâd lika sip sa.

²⁸ Bara Pita bila: —Dawan, dîa dîa yang nani bri katna ba sut swiri, man ninam blikaia dukiara.

²⁹ Pana Jisas baha nani ra win: —Kasak pali mai wisni, ani uplika kabia, ai watla, ai maya mairin, ai muihni nani, ai aisika, ai yaptika, ai luhpia nani sin baha Gâd king aimaki lâka ba tâwan swibia kaka,

³⁰ witin naha tasba ra kau manis bribia, bara baha tasbaya naika aula ba ra raya ban kaia lâka ba bribia.

Jisas kli pruaia dukiara aisisa

³¹ Jisas ai disaipilka 12 ba wiria tnaya ra bri si, naku win: “Nanara yawan Jerusalem ra auya, bahara sika prapit nani bâk, Upla Luhpia Waitna dukiara dîa ulban ba sut aimakbia.

³² Ju apia nani mihta ra ai mangkan kabia laiwaska kikaia, bara yabalaya ai tuhbia.

³³ Witin nani mita ai prukbia, ningkara ai ikbia, sakuna yu yumhpa ra pruan nani tila wina kli buamna.”

³⁴ Disaipil nani naha diara nani tânka briras kata, dîa dukiara witin nani ra wi kan ba sin tânka briras, kan baha diara nani ba lika witin nani tânka briaia apia dukia kan.

Jisas blain kum Jeriko wina ba rakisa

³⁵ Jisas pat Jeriko lamara balan kan ba ra, blain waitna kum yabal tnaya ra iwi, upla nani ra diara makabi kata.

³⁶ Waitna ba walan upla ailal pali bal auya kan, bara makabi walan dîa taki kan sapa.

³⁷ Upla nani mita win, Jisas Nasaret wina ba bahak lui auya sa.

³⁸ Baku mika witin winan: —¡Jisas, Debit Luhpia, yang ra kupiam yamni ai kaiks!

³⁹ Tâura wapi kan nani ba mita lawi dauki win, ai bîla prakbia, sakuna witin kau ai tâ baiki winan: —¡Debit Luhpia, kupiam yamni ai kaiks!

⁴⁰ Bara Jisas takaski, adar yan waitna ba bri balbia. Ai lamara bri balan ba ra, makabi walan:

⁴¹ ¿Dîa want sma yang bui man ra dauki maikamna? Blain waitna ba bila: —Dawan, diara kaikan ai daukisa.

⁴² Jisas pana win: —¡Namkra bris! Kasak lukram bamna, mai rakan sa.

⁴³ Baha sim piua ra, blain kata ba sip kan diara kaikaia, bara mahka Jisas nina blikan, Gâd nina mayuni. Bara upla nani naha kaikan ba sin sut Gâd ra mayunan.