Luk 17 - DAWAN BÎLA AISKA

Saurka ra kauhaia trabilka ba

¹ Jisas ai disaipilka nani ra win: “Piua bani upla nani ra munka saura daukaia dukia nani ba bâra kaia sa, ¡sakuna saura pali kabia upla mina bataki uplika ba mapara!

² Kau pain kabia, baha uplika nana ra walpa tara kum wilki kabu ra lulkan kabia, naha sirpika lupia nani kum ra yarka saura daukaia ba wal.

³ ¡Man nani aman kaiki bas! “Muihkam saura daukbia kaka, lawi dauks; witin ai saurka wina ai kupia lakbia kaka, saurka swih tiks.

⁴ Yu aiska bilara aima 7 mampara saura daukbia kaka, bara aima 7 bal, ‘Yang kli mampara saura daukamna apia’ mai wibia kaka, man wilin kaia sma saurka swih tikaia.”

Kasak lukan lâka karnika ba

⁵ Apastil nani Dawan ra makaban: —Kau kasak lukan lâka ba yang nani ra aik.

⁶ Bara Dawan pana win: —Kasak lukan lâka ba sim mostard mâ lupia ba baku pan brisma kaka, naha kwah damni dusa tara ra sip sma wiaia: “Naha wina daiwi, kabu ra wih dimi was”, bara dusa ba baha kat daukbia.

Dukia dadaukra nani daukaia ba

⁷ “Man nani alba kum brisma kaka, bara baha albika insla ra tasba tukbi si, apia kaka daiwan nani main kaiki si balbia kaka, ¿ban sip sma ki wiaia: ‘Man nahara bal iwi, plun pis’?

⁸ Apia, sakuna kau ni wima: ‘Tutni pata ba mahka ridi dauks, bara maisam wilki, duki dauki bas, yang plun pimna kat. Baha ningkara, man sip kama plun piaia bara diara sin diaia.’

⁹ ¿Bamna baha albika ra dîa dîa win sut daukan ba dukiara witin tingki wisa ki? Man pain kaikisma, apia.

¹⁰ Baku sin man nani, Gâd mita dîa daukaia maikan ba sut dauki, naku wima: ‘Yang nani alba bahki sna, kan diara daukaia katna ba baha baman daukisna.’

Jisas bui waitna matawalsip lipar sikniska bri kan ba wina rakisa

¹¹ Jisas ba ban Jerusalem ra impaki kan, witin Sameria bara Galili wal tasbaya bâk luan.

¹² Tawan sirpi kum ra balan ba ra, waitna matawalsip lipar sikniska bri kan ba taki wan witin wal prawaia, sakuna sut laihura man bûi takaskan,

¹³ witin nani ai pura wini: —¡Jisas, Smasmalkra, yang nani ra kupiam yamni ai kaiks!

¹⁴ Jisas baha nani ra kaikan ba ra, naku win: —Man nani prîs nani ra was bara wînam ba mariks. Witin nani auya kan yabal ra, ai sikniska wina sut rawan kata.

¹⁵ Sakuna baha nani wina kumi ba kaikan ai sikniska wina rawan kan, bamna witin kli tawi, ai bîla baikra tara ni Gâd ra mayuni balan.

¹⁶ Bara Jisas mawan kat bal ai lula kriki, tasba kat aimakupan, tingki wiaia dukiara. Naha waitnika na lika Sameria wina kata.

¹⁷ Bamna Jisas bila: —¿Upla matawalsip ba sut rakan kata apia? ¿Bara wala nani 9 ba anira sa ki?

¹⁸ ¿Naha tringsar waitna na baman Gâd ra tingki wiaia balan ki?

¹⁹ Bara waitnika ra wisata: —Man mahka was; mai rakan sa kasak lukram bamna.

Gâd king aimaki lâka nahki balbia ba

²⁰ Parisi nani mita Jisas ra makabi walan ahkia Gâd king aimaki lâka ba balbia sapa, bara witin pana naku win: —Gâd king aimaki lâka ba lika wan nakra ni kaiki dukia sâtka apia sa.

²¹ Sip wibia apia: ‘Kaiks, nahara sa’, apia kaka ‘Bahara sa’; kan Gâd king aimaki lâka ba pat man nani tilamra sa.

²² Bamna ai disaipilka nani ra win: —Yua nani balbia ba ra, man nani want pali kama, Upla Luhpia Waitna piua kum, apia kaka wiria pan kaikaia, sakuna sip kaikma apia.

²³ Bara upla nani mai wibia: ‘Kaiks, nahara sa’, apia kaka ‘Kaiks, bahara sa’; kuna bahara wapara, nina sin blîkpara.

²⁴ Bamna imyula lipan ingnika kasbrika tâ kumi wina tâ wala kat kaikisma ba baku, sim sât kabia Upla Luhpia Waitna aula ba ra.

²⁵ Sakuna tâura witin kasak pât wahwaia sa, naha piua uplika nani mita sin lulki swin kabia.

²⁶ Noa piua ra nani ra takan ba baku kabia, Upla Luhpia Waitna balaia piua nani ra.

²⁷ Witin nani plun pi kan, diara di kan, marit taki kan, ai luhpia mairin nani sin marit saki kan, Noa ark watla ra aimakan piua ba kat; bamna lisamra balan ba ra, baha nani sut pruan.

²⁸ Lot piua nani ra sin baku takan: witin nani plun pi kan, diara di kan, diara pana pana atki kan, insla mangki kan, ai watla nani sin mâki kan;

²⁹ sakuna Lot Sodoma tawanka wina takan ba ra, pauta sulpa wal kasbrika pura wina auhan, bara sut kat iki tikan.

³⁰ Baku kabia Upla Luhpia Waitna balbia piua ra.

³¹ “Baha piua ra, upla kum utla bahna ra ba, ai dukia utla bilara bri ba bal iwi sâkbia apia; ya insla ra kabia ba, kli ai watla ra tawi balbia apia.

³² Lot maya mairin ra dîa takan ba luki bas.

³³ Ya ai rayaka swaki sakaia pliki ba, witin lika baha tikbia; sakuna ya ai rayaka tikbia kaka, witin lika baha ba swaki sâkbia.

³⁴ “Yang mai wisna, baha tihmika upla wâl krikri ra kabia: kumi ba brih wan kabia, bara wala ba lika swin kabia.

³⁵ Mairin wâl akbaia walpaya ra akbi kabia: kumi ba brih wan kabia, bara wala ba lika swin kabia.

³⁶ [Waitna wâl insla ra kabia; kumi ba brih sakan kabia, bara wala ba swin kabia.]

³⁷ Naha walan ba ra, makabi wali banhwan: —Dawan, ¿naha diara na ani pali ra baku kabia ki? Bara witin pana win: —Anira wîna tara pruan bâra kaka, bahara sika yakal tara nani asla tutukwi kabia.