Luk 16 - DAWAN BÎLA AISKA

Ai dawanka dukia nani pain main kaikras kan ba maprika

¹ Jisas ai disaipilka nani ra win: “Lalahkira waitna kum witin ai warkka uplika kum bri kata, bara upla nani bal maisa pakan naha warkka uplika ba mita ai dukia nani ba bahki baman tikisa.

² Bamna wark uplika dawanka ba mita paiwi, win: ‘¿Man dukiamra upla nani ai wi na dîa sa ki? Man warkkam nani wauhkataya ba bri sal aik, kan man kli yang warkki dauki kama apia.’

³ Baku mika, wark uplika ba ai kupia wal aisin: ‘¿Nanara yang dîa daukaia, dawanki mita warkki na mihti wina sâkbia kaka? Tasba tukbaia karnika sin âpu sna, bara upla nani ra wih diara makabaia sin swiri ai daukisa.

⁴ Nanara pat kaikisna dîa daukaia sna ba, bamna baku lika wark âpu kamna ba ra, upla nani sip kabia ai watla nani ra ai dingki briaia.’

⁵ Bamna baha nani ai dawanka wal tras bri kan ba, tila nani ra paiwan. Pas balan uplika ba ra makabi walan: ‘¿Dawanki wal man nahki tras brisma ki?’

⁶ Uplika ba bila: ‘Batana baril 100 yaia tras brisna.’ Wark uplika watawikira ba bila: ‘Nahara ki traskam wauhkataya ba; aihni pali iwi, batana 50 baril baman uls.’

⁷ Ningkara, wala ra makabi walan: ‘Bara man, ¿nahki tras brisma yaia?’ Baha bila: ‘Plawar 100 bîk tras brisna.’ Wark uplika ba bila pana: ‘Nahara ki traskam wauhkataya ba; aihni pali iwi, 80 bîk baman uls.’

⁸ Bamna dawanka ba wark uplika watawikira ba âuya mâira pali diara nani daukan ba kaikan, witin ra mayunan. Kan tasba uplika nani ba ridi banhwisa pana pana ai bisniska nani ba pain daukaia, sakuna ingni uplika nani lika baku apia.

⁹ “Yang mai wisna, upla wal uplikam kaia dukiara man nani naha tasba yuya saura nani ba yus muns, baku mika yuyakam nani ba sut âpu takbia, upla kra sip kabia ban kaia ra ai watla ra mai bri kaia.

¹⁰ “Ya diara wiria lupia mapa ra kasak kabia kaka, witin sip kabia diara ailal mapa ra sin pain kaia; bamna ya diara wiria lupia mapa ra kasak apia ba, diara ailal mapa ra sin sip pain kabia apia.

¹¹ Bamna naha tasba dukia saura nani wal sip pain apia sma kaka, ¿ya mita sip kabia diara manira nani ba mihtam ra mangkaia?

¹² Upla dukia wal sip pain apia sma kaka, ¿ya mita man nani pali dukiam ba maikbia ki?

¹³ “Alba kumi sip apia sa dawan wâl dukia daukaia; kan kumi ra misbara kaikbia bara wala ra lika latwan kaikbia; apia kaka, kumi ba mapara kasak kabia, bara wala ba ra lika saura kaikbia. Sip apia sa Gâd bara lalah wâlsut warkka daukaia.”

¹⁴ Parisi nani, witinka nani lalah laik kaiki nani ba, naha diara nani na wali, Jisas lawaska kikan.

¹⁵ Bara Jisas baha nani ra win: “Man nani sika upla nani mawanra wînam kasakkira sakaia lihki banhwisma ba, sakuna Gâd lika upla nani kupia ba kaikisa; bamna upla bui tara kulki nani ba, Gâd mita lika baha nani ba bahki kulkisa.

Lâ bara Gâd king lâka ba wal

¹⁶ “Jan Tatahbra piua kat baman, Moses lâka bara prapit nani smalkanka ba ban kan. Baha wina lika Gâd king aimaki lâka sturka yamni ba smalkan sa, bara upla sut sin dimaia trai kaikisa.

¹⁷ “Sakuna kau swapni sa kasbrika pura bara tasba ba lui waia, lâ wina ulban markka lupia kumi aimakras kabia ba wal.

Wan maya swiaia lâka ba Jisas smalkisa

¹⁸ “Ya ai maya mairin ra mahka swisa ba, mairin wala wal marit takbia kaka, witin lika marit lâka sauhkisa; bara ya sin maya waitna mita swisa mairka kum wal marit takbia kaka, witin sin marit lâka sauhkisa.

Waitna yuyakira kum Lasarus ba wal

¹⁹ “Yuyakira waitna kum bâra kan, witin kwala painkira nani baman dimi kan, bara yu bani lilia dauki, ai prana ra iwi kata.

²⁰ Waitna umpira kum sin bâra kan, nina ba Lasarus. Witin ai wîna tara aiska ba sukwi kan bara tasba ra iwi kan, yuyakira waitna durka ba lamara.

²¹ Lasarus lika brin dauki kan, waitna tibilka wina plun yuya nani kauhi ba ni ai biara ba banhkaia; yul nani pali sin ai lamara bal, ai sukwanka nani ba dabi kan.

²² Yu kumi Lasarus ba pruan, bara insal nani bui brih wan Paradais ra, Ebraham wal kaia. Ningkara waitna yuyakira ba sin pruan, bara bikan.

²³ “Pruan nani tasbaya ra waitna yuyakira ba pât tara wahwi kan ba ra, ai nakra bukan ba ra, laih pali ra kaikan Ebraham ba Lasarus wal kata.

²⁴ Bamna witin winan: ‘Aisiki Ebraham, yang ra umpira lukram, bara Lasarus ba blîks ai mihta tâ ba lî buski muni bal twisi tâ na pan buski kauhla daukbia, kan yang na naha pauta ra kasak pât wahwisni.’

²⁵ Sakuna Ebraham bila: ‘Luhpi, luki kaiks raya katma piua nani ra diara sut ba man pain baman briram, sakuna Lasarus lika diara sut ra saura baman kan. Nanara lika witin ba maisa nihkan sa, sakuna man lika pât wahwisma.

²⁶ Naha sut purkara, wan lilapas ra albangka tara pali kum bâra sa; baku bamna, upla naha wina bahara luaia want ba sip luras, pana upla baha wina sin sip naha tani ra lui balras.’

²⁷ “Bara waitna yuyakira ba bila: ‘Ban kaka, Aisiki Ebraham, mamkabisna, Lasarus ba blîks yang aisiki watla ra;

²⁸ bahara yang kau muihki matsip brisna, bara witin baha nani ra wih smalkbia, witin nani sin naha pât wahwan pliska ra balbiara sîa.’

²⁹ Sakuna Ebraham bila: ‘Baha nani ba brisa, dîa Moses ulban lâka nani bara prapit nani ulban ba sin; ¡swis baha nani bîla walbia!’

³⁰ Waitna yuyakira ba pana win: ‘Âu, kasak, aisiki Ebraham, sakuna pruan nani wina kum wabia kaka, witin nani ai saurka nani wina ai kupia lakbia.’

³¹ Sakuna Ebraham bila: ‘Moses bara prapit nani ra sin bîla walan daukras banhwisa kaka, pruan wina kum wih smalkbia sin, walbia apia.’